Yesaya 63 - Wunta Mempori

Pohuku pombaloa a nto Edomi 63:1-6

¹ ”Isema onae anu hawe inso i Edomi, anu hawe inso i Bosora melembaako anu motaha, onae anu mewantaako sangkano, anu melempaako rosono anu langkai?” ”Ongkuemo anu mepau a moleoa ka anu pabawa mongkadudui!”

² ”Tembioke sangka-Miu ka imotaha kanatuu, ka lemba-Miu kana lembano puu ponsesa wua anggoro?”

³ ”Ongkuemo asa-asaku anu monsesa, ka inso i olodo bawaa-Ku nahina anu mokowali Aku! Kusesa iramo tongku a laro ntekuda-Ku, ka Kulolanda iramo a mokulano tekuda-Ku. Pewurosino reado tepidiki a lemba-Ku ka luwuno sangka-Ku tesosa'aiomo.

⁴ Hangano oleo pombaloa Kupakosiomo ka ta'u pontolosia haweomo.

⁵ Mengkita Aku ngkoraane: nahina anu montulungi; Tekokodoho Aku nahina mompokowali. Ka i'amba kae-Ku moweea-Kune pontulungi, ka mokulano tekuda-Ku, onaemo anu mokowali Aku.

⁶ Ongkue lumalanda ira tongku a laro ntekuda-Ku, kumale-kale ira a laro mokulano tekuda-Ku ka weweuo pewurosino reado waa a wita.”

Pekakai mangakua ka po'emado to Isaraeli 63:7–64:12

⁷ Aku tumutuluo pompehohawa-Do i Ue anu nahi bali, luwuno wineweu-Do i Ue anu telele, anu wineweu-Do i Ue ndi ontae ka moikoa anu langkai a nsukudo to Isaraeli, anu wineweu-Do ndi ondae menunu saru pompehohawa-Do ka pompehohawa-Do nahi bali anu langkai.

⁸ Ondae mepau, ”Mentee ntu'u, ondaemo bawaa-Ku, nana'ote anu nahi ta moweweu molengku.” Ondaemo Puu Pongkaduduido

⁹ a laro luwuno ma'isoado. Komba asa mia sarungkoroi ke tinena, tendeano Ondaemo anu kumadudui ira. Ondaemo anu tumolosi ira a laro pompehohawa-Do ka pe'aroa-Do. Dotande ira ka baba ira i larono tempo se'eluno.

¹⁰ Sine, ondae me'ewa ka mokomasusao Penaa-Do anu mempori; onaemo ka Dopewolili gagi iwali, ka Ondae-Do isa'a metea umewai ira.

¹¹ Ka i'amba nterorambe iramo bawaa-Do a tempo se'eluno, tempono i Musa: Isua Irake anu wawa ira mpewuatako inso a ntahi meronga saru luwuno puu mpopakambi bawaano bembe bimba-Do? Isua Irake anu numaao Penaa-Do anu mempori a laro ngkoroido;

¹² anu kumongkomio i Musa i koana saru kae-Do anu maramba; anu monsiao uwoi i arodo weweuo nee-Do teto'ori mpiha;

¹³ anu tumaate ira molalo tahi malua? Kana ngara molalo pada one nahi dohori ntetidu;

¹⁴ kana pinotuwu anu metii a laro bangano Penaa-Do i Ue wawa ira a mpo'ianga penaa-naaa. Kanatuumo Iwawa ira bawaa-Miu weweuo nee-Miu maramba.

¹⁵ Ipensiroiomo inso i suruga ka Ikitaomo inso a mpo'ianga-Miu anu mempori ka maramba! Isuake mahakino aroa-Miu ka moroso-Miu, pebundeno aroa-Miu ka pompehohawa-Miu? Kime'emao siimo Ipo'iaakono!

¹⁶ Kombake Omiu Amamami? Mentee ntu'u, i Burahima nahi to'ori kami, ka Isaraeli nahi dome'akui kami. Oo Ue, Omiu isa'a Amamami; nee-Miu Puu pontolosimami mompu'u i ndi'ipua se'eluno.

¹⁷ Oo Ue, tembio ka Ipo'inee kami ntesaa inso a nsala-Miu, ka tembio ka Ipokomoteao aroamami, ranta nahi kimedoito ndi Omiu? Ipepokulemo hangano luwuno tetenaa-Miu, hangano luwuno sukudo mia-Miu!

¹⁸ Tembio ka ibutu sarai bawaa-Miu anu mempori mpe'ueo po'ianga mempori-Miu, ka tendeano domelolandao anu umewai kami?

¹⁹ Kana ntu'u mompu'u i ndi'ipua se'eluno nahi kimehori mpo'ia i totono poparenta-Miu, kana ntu'u omami nahi hori pinau saru nee-Miu.