Yesaya 62 - Wunta Mempori

Tekaduduino Sioni taronga hawe 62:1-12

¹ Hangano Sioni nahi aku menoro-noro, ka hangano Yerusale nahi aku momperodo, hawe menteeano mepansari kana wanta ka tekaduduiano melanga kana hulu.

² Luwuno tongku ira mengkitao menteemu, ka luwuno mokole ira mengkitao marambamu. Mia ira meneeakomu nee wo'ohu anu Ira tumantuio i Ue.

³ Omue kogagi ramba-ramba ulu popelangkai a ngkae-Do i Ue ka peboo ulu poparentaa a ngkae-Do Ue Alamu.

⁴ Omue nahi kopinau mbo'u ”beine anu bininta”, ka witamu nahi ta pinau mbo'u ”beine nahi pinerio”, sine omue konineeako ”beine inehe-Ku” ka witamu ”beine hinao tamano”, hangano Ondae i Ue inehe-Do ndi omue, ka witamu ta hinao tamano.

⁵ Hangano, kana asa mangalitau gagi kombiano asa ana beine, kanandiomo Ondae anu wanguko Ira gagi tamamu, ka kana mawongkono aroano asa umbungkoroi kumitao umbungkoroi beineno, kanandiomo Ondae Ue Ala Ira mawongkoakomu.

⁶ A wawo rere watumu, hei Yerusale, Kunaa iramo puu mpopadaso. I larono asa oleo ka asa wongi, ondae nahi ira hori mperodo-rodo. Hei omiu anu mpebooli mopoto'oriako Ira i Ue, siimo impenoro-noro

⁷ ka si po'inee Ira mo'ia menoro-noro, ranta ka Doteahakono Yerusale ka ranta Doweweuo gagi telele i tolino.

⁸ Ondae i Ue mesumpa Iramo a ngkae ngkoana-Do, a ntokia-Do anu moroso, ”Menteeano, nami Aku mbo'u meweengakono gandumu gagi kaangado iwalimu. Menteeano, mia mehawe nahi ira mpo'inu uwoi anggoromu anu hinawemu a mpe'iseimu.

⁹ Sine, mia anu sumowio ta kumaano koa mbo'u ka umunde-unde Ira i Ue, ka mia anu umopuo ta uminuo koa mbo'u a luwuno kintala po'ianga mempori-Ku.”

¹⁰ Pelempamo, pelempamo telalo a luwuno pewowa langkai, patindaomo salado bawaa, ungkahiomo, ungkahiomo sala langkai, liahako iramo watu, pontade iramo banderado luwuno tongku!

¹¹ Hangano, onaemo andio anu Dopoporongeomo i Ue hawe a tompano tolino! Pauomo a ana beine Sioni: Menteeano, tekaduduiamu hawe; menteeano, ondae anu gagi tambono pe'i'isei-Do kongko saru Ondae ka ondae anu pinongko'ala-Do mpelempa i aro-Do.

¹² Mia ta pau ira ”tongku mempori”, ”luwuno mia anu tinolosi-Do i Ue”, ka omue kopinau ”anu pinerorohi”, ”kota anu nahi bininta”.