Yesaya 61 - Wunta Mempori

Lele moiko ndi Sioni 61:1-11

¹ Penaa-Do Ue Ala kongko ndi ongkue, hangano Do'urapi akumo i Ue. Dotena akumo mohaweo lele moiko a mia memarasai, ka mekakaako ira mia anu masusa aroano, ka paleleo pompotolaa a mia mentinawa, ka tepotolaado mia anu nte'uko a torungku,

² ka paleleo ta'u pompehohawa-Do i Ue ka oleo pombaloa-Do Ue Alato, ka tumarero ira mia anu mpo'inombo,

³ ka moweeako ira ramba-ramba ulu gagi euno awu, lana pakea a mpogawea gagi euno sawu po'inombo, penani po'unde-unde gagi euno roso anu molema, ka dompotaeako ira mia ”keu tarabanti menteea,” anu pinaho-Do i Ue ka mopokitao maramba-Do.

⁴ Ondae ira wali mewanguo anu tekale-kale tehineomo ntu'u, ka montadeo luwuno po'ianga anu mompu'u i ndi'ipua gagi boni-boni. Ira mempokowo'ohuo luwuno kota anu tekale-kale, luwuno po'ianga anu mapa'api-apiomo inule gagi boni-boni.

⁵ Luwuno mia susua ira mpekakaakomiu kana puu mpopakambi bawaano bembe bimbamiu, ka mia mehawe ira mpo'anggaakomiu kana puu mpelere ka puu mpelere anggoromiu.

⁶ Sine, komiu mempinau sando mpesomba-Do i Ue ka komiu menineeako puu pompekakaako-Do Ue Alato. Komiu mperapio kaeado tongku ka komiu pompelangka-langkaiako luwuno arataado.

⁷ Gagi euno mokoko'iimiu anu meluka mpedua hadiono, ka gagi euno tesosa'ori, komiu mengkokora-kora mawongko hangano tia anu hinawemiu. Komiu mpohawe pusaka meluka mpendua i witamiu ka mawongkoa nahina tampulaano ta gagi tiamiu.

⁸ Hangano Ongkue, Ue, kumekewoio songka, umo'aliaakono porontua ka molengkua. Aku moweeko tambomiu anu mentee, ka mowutu pedandia anu nahina tampulaano saru omiu.

⁹ Inulemiu ta teto'ori i olono luwuno tongku, ka ana'uemiu i tonga-tongado suku tongku, ranta luwuno mia anu kumita ira, ira me'akuio nine ondae inuledo anu rinonso-Do i Ue.

¹⁰ Mawongko aku ndi Ondae i Ue, sumangaku kokora-kora mawongko ndi Ondae Ue Alaku, hangano Dopokonaakune sangka tekaduduia ka sumoumbuakune lemba meloe menteea, kana umbungkoroi tama anu mompokona ramba-ramba ulu ka kana umbungkoroi beine anu mompake ramba-rambano.

¹¹ Hangano, kana tolino moluarako pinopaho, ka kana lere motuwuo inii anu rinawo, kanatuumo Ondae Ue Ala Ira motuwuo menteea ka po'unde-unde i arodo luwuno tongku.