Yesaya 60 - Wunta Mempori

Marambano Sioni anu ta hawe 60:1-22

¹ Pentademo, gagimo mewine, hangano mewinemu hawe, ka maramba-Do i Ue saba ndi omue.

² Hangano menteeano, wongi-wongi tumutuwio tolino, ka wongi-wongi tumutuwi ira tongku; sine mewine-Do i Ue saba ndi omue, ka maramba-Do gagi mengkaa ndi omue.

³ Luwuno tongku mpetonda-tonda me'aiwa a mewinemu, ka luwuno mokole me'aiwa a wanta anu saba ndi omue.

⁴ Pengkitamo raane ka kitaomo limbu-limbu, luwudo me'aiwa ntepumpu ndi omue; luwuno ana ntamamu me'aiwa ira inso a olaiano, ka luwuno anamu beine mebinaba.

⁵ I tempo atuu omue kokohali-hali mengkita ka mompesanaa, omue kotekokodoho ka komawongko, hangano mare'ea inso i asatowano tahi ta melimba ndi omue, ka kaeano luwuno tongku ta melimba ndi omue.

⁶ Hadio ntu'u unta ta buketio witamu, unta memongura inso i Midia ka Epa. Luwudo ira me'aiwa inso i Sieba, mpowawa wulaa ka dupa, saru mempaleleo tepalele-Do i Ue.

⁷ Luwuno bembe bimbano i Kedari ta tepumpu ndi omue, luwuno bimba lakinono i Nebayoti ta tepatinda tiano pesombamu; luwuno ta pinesombaako a wawo meda pontunua pesomba ndi Ongkue gagi pesomba anu Kupemoikoo, ka Aku mokomaroao raha mempori-Ku.

⁸ Isemake ondae andio anu menee-nee kana seru ka kana marapatii a mpewowa ukoano?

⁹ Mentee ntu'u, Ongkuemo anu sinisikorino luwuno togo; luwuno kapala Tarasisi sumomba i arono ta wawa ira ana ntamamu inso a olaiano, saru salaka ka wulaano, tiano nee-Do i Ue, Ue Alamu, Anu Tedoa Mempori, Ue Alado to Isaraeli, hangano Dopelangkaiko.

¹⁰ Rere watumu ira mewanguo mia mehawe, ka luwuno mokoledo ira mpekakaakomu; hangano a laro ntekuda-Ku Kuhukukomo, sine a laro bobotolino aroa-Ku Kupehohawako.

¹¹ Luwuno pewowa langkaimu ta te'ungkahi mpiha, moiko meene maupo wongi nahi ta tetondo, ka domewawao kaeado luwuno tongku ndi omue, luwuno mokoledo mbo'u winawa mperonga.

¹² Mentee ntu'u, tongku ka poparentaa anu nahi behe metenunu ndi omue ta tampula; luwuno tongku atuu ira mepingko mempinepate.

¹³ Marambano Libano, ta winawa ndi omue: keu sanobari, beranga ka cemara, ta mokomaroao po'ianga mempori-Ku; Aku mokomemporio pelandaano karu-Ku.

¹⁴ Luwuno anado mia anu mokonsiiko ira me'aiwa mpetuundu ndi omue, ka luwuno mia anu mepaukiakomu ira mpenggolontu mpesomba a pelengkarumu; Ira mempauko ”kota-Do i Ue,” ”Sioni, tia-Do Anu Tedoa Mempori, Ue Alado to Isaraeli.”

¹⁵ Gagi euno teweweumu i ndi'ipua, tempono ka ubininta, ino'aliaako, ka nahina telalo maupo te'asa mia, kanandio-andio Aku weweuko gagi po'undea nahina balino, gagi mawongkoako mapa'api-api inule.

¹⁶ Omue ko'umosoo susudo luwuno tongku ka uminuo susudo luwuno poparentaa ka kotumo'orio, nine Ongkue, Ue, Puu Pongkaduduimu, ka Puu Pontolosimu, Anu Tedoa Moroso, Ue Alano i Yako.

¹⁷ Gagi euno mala Aku mowawa wulaa, ka gagi euno labu Aku mowawa salaka, gagi euno keu, mala, ka gagi euno watu, labu. Aku moweeakomu rodoa gagi taloimu ka moleoa gagi podagaimu.

¹⁸ Nahi ta hina mbo'u lele mongkona pobobarasaia i witamu, mongkona matea ke tekale-kalea i witamu. Omue kopauo rere watumu ”Tekadudui” ka luwuno pewowa langkaimu ”Po'unde.”

¹⁹ Ndi omue mata'oleo nami gagi mbo'u pompokomewine tempono meene ka wantano wula nami pompowee mbo'u mewine tempono wongi, sine Ondae i Ue Ira gagi pompokomewinemu anu nahi bali ka Ondae Ue Alamu Ira gagi marambamu.

²⁰ Ndi omue ta hina mata'oleo anu nahi hori sumoo ka wula anu nahi hori sumoo, hangano Ondae i Ue Ira gagi pokomewinemu anu nahi bali, ka luwuno oleo po'inombomu ta menaa-naa.

²¹ Palilimu luwuno mia mentee, ondae mpe'ueo wita ranta nahina tampulaano; ondae onaemo tumba anu Kupotuwuo Ongkue-Ku mopokitao maramba-Ku.

²² Anu lalu kodei ta gagi suku anu langkai, ka anu lalu molema ta gagi tongku anu moroso. Ongkue, Ue, Aku ronga weweuo a tempono.