Yesaya 6 - Wunta Mempori

I Yesaya mohawe pepoboi-Do Ue Ala

¹ A nta'u mateano mokole Usia, kukita Ira i Ue mentoro a wawo ngkadera poparentaa anu mantande ka kontasi-tasi, itotono lemba meloe-Do buketio Raha Mempori.

² Luwuno Serapimi mpentade i hori-Do, singge mia hinao onoo panino, orua pani anu tumutuwio rupado, orua pani anu tumutuwio karudo ka orua pani peneedo.

³ Ondae mpebooli mpesangki-sangki, ”Mempori, mempori, mempori Iramo Ueno luwuakoano, asa wawontolino buke maramba-Do!”

⁴ Onaemo ka itelelu empehino montoweano pewowa pebooli hangano peboolido ka raha mbo'u atuu bukeako ahu.

⁵ Ka ku'amba motae, ”Masola akumo ntu'u! mate aku! Hangano ongkue andio asa mia anu mokoburu wiwino, ka ongkue mo'ia itonga-tongano tongku anu mokoburu wiwido, sine mataku kumita Iramo Ondae Mokole, Ueno luwuakoano.”

⁶ Ka i'amba asa i olodo Serapimi atuu menee te'aro ndi ongkue; a ngkaeno hinao waro anu i'alaakono sipi inso a wawo meda pontunua pesomba.

⁷ Itengkuakono a ngangaku saru motae, ”Kitao, wiwimu itengkuomo waro andio, onaemo pu'uno salamu tinadiomo ka halamu pinokotampulaomo.”

⁸ Ka ku'amba rumongeo suara-Do i Ue mepau, ”Isemake anu Aku tumenao, ka isemake anu behe lumakoa Kita?” Sangkiku, ”Ndio aku, Itena akumo!”

⁹ Ka Do'amba mepau, ”Lakomo, ka pauako iramo tongku andio: Imperorongeakono ntu'u, sine nahi komiu mento'orio! Imengkitaomo tementee ntu'u, sine nahi komiu mempokonto'orio!

¹⁰ Iweweuomo aroano tongku andio motea ka birido mobea moronge ka matado metako tepusu, kasi domengkitaakono matado ka merongeakono birido ka mpokonto'oriakono aroado, ka do'amba mpepokule ka gagi tompa.”

¹¹ Ka ku'amba mesikeno, ”Hawe opia tehineno, Oo Ue?” Ka Do'amba sumangki, ”Hawe luwuno kota gagi terawo-rawo nahina palilino, luwuno raha nahina miano, wita tepo'ia ka boni-boni.

¹² Ondae iUe Ira tumadio mia te'olai, ranta i wita atuu hadio po'ianga anu bininta.

¹³ Tewala i ra'ai da mpo'ia asa ntia hopulu inso ndi ondae, ta kumaa ira api pohonapo mbo'u, kana keu tarabanti ka keu langkai susuano anu tinuehi butumo koa tu'ono tebinta. Tu'o atuu gagi wuku mpinopaho anu mempori.”