Yesaya 59 - Wunta Mempori

Ondae i Ue momuleo Isaraeli inso a halano 59:1-21

¹ Menteeano, kae-Do i Ue nahi makura ondauno ba Dopongkadudui, ka poronge-Do nahi makura montasono ba Doporonge.

² Sine, wineweumumo mosa'o anu monsiako inso ndi Ondae Ue Alamiu ka halamumo anu weweuo rupa-Do tewuni inso ndi omiu, ranta ka nahi Dorongeo.

³ Hangano kaemiu tesosa'aiako rea ka wunga ngkaemiu hangano wineweu mosa'o; elomiu mompau pegaupi, ngangamiu mpomuti-muti bukeako pau molengku.

⁴ Nahina anu mowinso kara-kara anu mentee pu'uno, ka nahina anu mobitara anu moroso pu'uno. Mia mpoperorohi anu nahina tuduno ka mompau pegaupi, mia mentiaako masolaa ka me'anaako lambaha.

⁵ Ondae mpowotu su'uluino ule beluda, ka mpohoru inenano kaangga; isema anu mongkaa su'uluino atuu ta mate, ka tepeha i dinanso, meluarakoomo asa ule beluda.

⁶ Inena anu hinoru atuu nahi ta pinokopake gagi pesangka, ka wineweudo atuu nahi ta pinokopake gagi sawu. Poweweudo onaemo poweweu anu mosa'o, ka pobobarasai iweweuo kaedo.

⁷ Karudo magasi mpoweweu anu mosa'o, liu ira mpo'uwu reano mia nahina salano. Tinoodo onaemo tinoo anu mosa'o, matea ka tekale-kalea kongko a luwuno pesalaado.

⁸ Sala sintuwu nahi domento'orio, ka nahina moleoa a hanga ngkarudo. Domentondao luwuno sala anu molengku, ka sompo mia anu mesala i tu'ai nahi ta hori monto'ori sintuwu.

⁹ Onaemo pu'uno, moleoa olai mpiha inso ndi omami ka menteea nahi hawe ndi omami. Omami mposisikori mewine, sine anu hina butu wongi-wongi, mposisikori kami wanta, sine tendeano mpelempa kami a laro wongi-wongi.

¹⁰ Omami merare-rareo rere kana mia morawu, ka kana nahina mata; mperare-rare kami. Ntetidu kami ntonga oleo kana-kana tekamburiomo, ka mpo'ia a wongi-wongiano kana mia mate.

¹¹ Luwumami mpenggere kana berua; meraali kana marapatii. Mposisikori kami moleoa, sine nahina; mposisikori tekaduduia, sine olai mpiha inso ndi omami.

¹² Mentee ntu'u, pe'ewamami hadio i aro-Miu ka halamami mesakosii umewai kami; mentee ntu'u, kimento'orio pe'ewamami ka kime'akuio wineweumami anu mosa'o:

¹³ mpe'ewa kamimo ka humapu Ira i Ue, ka mepansia inso ndi Ondae Ue Alamami. Mpontoo kami porontua ka mpoweweu anu molengku, mentiaako pegaupi a laro aroa ka mpe'anaakono a mpau.

¹⁴ Songka tehidiomo i bungkuno, ka moleoa mentade olai, hangano menteea tetidu a mpo'iangado mia hadio ka moleo aroa nahi po'iangano.

¹⁵ Tewala kanandio menteea tetadiomo, ka isema anu olaiakono wineweu mosa'o, ta gagi pomurua. Sine Ondae i Ue kumitao, ka Ondae nahi Dope'eheo hangano songka nahi tineahako.

¹⁶ Dokitao nine nahina maupo te'asa mia anu mentade, ka Ondae tekonto hangano nahina anu mo'alaako. Ka kae-Do isa'a anu tumulungi Ira, ka moleoa-Domo anu tumulungi Ira.

¹⁷ Dopokonao moleoa kana lemba labu ka songko tekaduduia a ulu-Do; Dopokonao sangka pombaloa ka mesoumbuako kohili kana lemba meloe.

¹⁸ Menunu saru wineweudo, kanandiomo Dopompowee pombaloa: mokulano tekuda-Do a luwuno iwali-Do, pohuku a luwuno iwali-Do; maupo a luwuno togo anu olai Dopoweeakono pohuku.

¹⁹ Mia ta doitoakono nee-Do i Ue i sumooano oleo ka a maramba-Do i sabaano oleo, hangano Ira hawe kana uwoi mansolo anu idandao penaa-Do i Ue.

²⁰ Ira hawe gagi Puu Pontolosi tiano Sioni ka tiado inuleno i Yako anu ntepidi inso a mpe'ewado, kanandiomo pau-Do i Ue.

²¹ Ndiomo pedandia-Ku saru ondae, pau-Do i Ue, Penaa-Ku anu medongkoiko ka pau-Ku anu kunaao a laro ngangamu nahi ta bintao ngangamu saru ngangado inulemu ka inuledo, mompu'u kanandio-andio hawe nahina tampulaano, pau-Do i Ue.