Yesaya 58 - Wunta Mempori

Pesomba ntu'u anu nahi mentee ka anu mentee ntu'u 58:1-12

¹ Pebooliakonomo temeroku, siimo onto-ontoo! Pokolangkaio suaramu kana tawuwua, pauako iramo bawaa-Ku pe'ewado ka a inuleno i Yako halado!

² Oleo me'eu oleo dome'ungke Aku ka inehedo mento'orio luwuno sala-Ku. Kana tongku mpoweweu anu mentee ka anu nahi bintao songka-Do Ue Alano dompesikenoakono ndi Ongkue luwuno songka anu mentee, inehedo me'umpeda ndi Ondae Ue Ala, dompotae,

³ ”Tembio omami mempuasa ka Omiu nahi pekokoongakono? Tembio omami mpe'urumako ka Omiu nahi perioo?” Menteeano, a oleo puasamu omue da kongkomu umanggao anggaamu, ka ipokonsii ira luwuno anu mpo'anggaakomu.

⁴ Menteeano, omiu mempuasa kontongaamiu mpegaga ka mpe'u'ua saru mpetitidu. Tewala kanandio imempuasa suaramiu nahi ta rinonge a mpo'ianga mantande.

⁵ Kanandioke puasa anu inehe-Ku: oleo tiado mia mpobobarasai koroido, ka metuundu kana gelaga ka mowile sawu kampili ka awu gagi pe'empehi moturi? Onaemoke atuu anu pinaumu puasa, oleo pompehohawa-Do i Ue?

⁶ Naahi! Mepuasa anu inehe-Ku onaemo ka ulolohi ira pompongu lambaha ka motola ira kolorono tinembi, ka upokomaradeka ira anu ntebobarasai ka puduo sompo tinembi,

⁷ ka usiba-sibao rotimu tiado mia anu mokoninggo ka wawao a rahamu mia mongkokolaro anu nahina rahano, ka tewala mongkitako mia kolambe-lambe, ka upoweeakono sangka ka si pewuniako ira pepaekompomu omuemu!

⁸ I tempomo atuu mewinemu ta mewanta kana towea ka mobelamu ta ronga tompa; menteea gagi baresi i aromu ka maramba-Do i Ue baresi i bungkumu.

⁹ I tempomo atuu omue komebooli ka Ondae i Ue Ira sumangki, omue komebooli mepetulungi ka Ira mepau: Ndio Aku! Tewala nami upokonaako ira tinembi a mpe'asa miamu ka nami utitiso ira mia ka mompau pegaupi,

¹⁰ tewala omue mompeweengako a mia mokoninggo kaangamu omuemu ka mokosompoo kineredo mia anu tepokonsii asalakono mewinemu ta mesabaako a laro wongi-wongi ka wongi-wongi ta kana mewineno ntonga oleo.

¹¹ Ondae i Ue Ira tumaateko mpiha ka mokosompoo kirenemu a wita anu morungku, ka mokowo'ohuo rosomu. Omue ta kana lere anu inuwoi moiko ka kana mata uwoi anu nahi hori mompatambo.

¹² Terawo-rawo anu tehineomo ntu'u kowali wanguo ka pundasi anu ninaado hadio inule kowali mokomoikoo. Omue kopinau ”anu mokomoikoo rere watu anu telompa”, ”anu mokomoikoo sala ka luwuno pinokompo'ianga”.

Mompelangkai oleo Saba 58:13-14

¹³ Tewala nahi upelempa a oleo Saba ka nahi upo'angga a oleo mempori-Ku; tewala upauo oleo Saba ”oleo pesana-sanaa,” ka oleo-Do i Ue ”oleo anu pinelangkai”; tewala upelangkaio ka nahi uweweuo luwuno anggaamu ka nahi uweweuo orusuamu ke mompopau kineremu,

¹⁴ asalakono komesana-sanaa hangano Ondae i Ue, ka Aku weweuko telalo a luwuno punsuno pongku i tolino Aku moweeko kaanga inso a ntia pusakano i Yako, uempu'umu, hangano nganga-Domo i Ue anu pauo.