Yesaya 57 - Wunta Mempori

¹ Mia mentee mate, nahina maupo te'asa mia anu mekakaakono; luwuno mia moleo tebite penaano, nahina maupo te'asa mia anu merioo; mentee ntu'u, hangano lumeleno wineweu mosa'o, tebiteomo penaano mia mentee

² Sine onae ta mewinso a laro sintuwua; mia anu tuwu moleo aroa mohawe mateano a wawo mpoturiano.

³ Sine omiu, imperangkuhakomo ramai, hei anado beine puu ponsihiri, hei inuleno mia anu monsosabo ka beine belesu!

⁴ Isemake anu pinengingisiimiu, te'aro ndi semake impenganga malua ka mpo'elo-elo? Kombake omiu andio anado mia anu me'ewa, inuleno puu mpegaupi,

⁵ Omiu mentondao lahi po'eheno aroamiu umpeda a luwuno ngkeu me'onitu, i totono sompo keu anu marombo, omiu sumumbele ira nana'ote a luwuno lembono, i olo-olono pongku watu.

Pompesombaia lahumoa kana ponsosabo 57:6-13

⁶ Tiamu kongko ia watu-watu molori a ngkorono, ka butu koa ondae anu pinakosi tiamu; ndi ondae koa mbo'u utawao pesomba tinawa, ka mompesombaako pesomba kaanga. Nde asalakonoke Aku sabara mongkona atuu?

⁷ Omue monaa poturiamu a wawo ntorukuno anu malanga ka a wawo ntorukuno mbo'u atuu komewuatako mompesombaako pesomba sinumbele.

⁸ Omue monaa tondonino lahumoamu i arono pewowa rahamu, oo, ubinta Akumo ka lumoholambeo koroimu. Mewuatakoko a mpoturiamu ka upokomolueo; mowutuko pedandia saru ondae, u'i'ineheakono poturiado ka omue kumikitao watu tinaha.

⁹ Omue aiwa me'aro ndi Molo saru mowawa lana ka mompokohadio mina-minamu. Utena ira saru ngkarumu melako a mpo'ianga olai, ranta metii hawe ia mpo'iangado mia mate.

¹⁰ Hangano olaino pelempaamu gagikomo telusa, sine nahi upotae, ”Siimo, nahina tuduno!” Omue mbo'u mohaweko roso wo'ohu, onaemo pu'uno, ka nahi upompemolema.

¹¹ Ndi sema upondende ka doito, ranta ka upegaupi ka nahi urambe Aku ke numaa Aku a laro aroamu? Kombake hangano tehineomo nahi Kupepau, onaemo ka nahi udoito ndi Ongkue!

¹² Aku koa mokopauo tinuwumu anu moleo ka luwuno wineweumu, sine luwuno atuu nahi ta mentudu ndi omue;

¹³ tewala mebooliko, po'ineeomo dompotolako lahumoamu anu hadio! Luwudo ta puurio angi, ta paneeo pepuurino penaa. Sine, mia anu mepekadudui ndi Ongkue ta mompe'ue wita ka ta me'ueo torukuno-Ku anu mempori.

Pau pontarero 57:14-21

¹⁴ Hinao anu mepau, ”Ungkahiomo, ungkahiomo, patindaomo sala. Tandeomo watu tetidua inso a nsalado bawaa-Ku!”

¹⁵ Hangano, kanandiomo pau-Do Anu Tedoa Mantande ka Maramba, anu mo'ia ranta nahina tampulaano ka mempori nee-Do, ”Ongkue mo'ia a mpo'ianga mantande ka mempori sine saru mbo'u mia anu terago-rago aroano ka me'urumako, mokorosoo rosono mia anu me'urumako ka motuwuo aroado mia anu terago-rago.

¹⁶ Mentee ntu'u, komba ranta nahina tampulaano Aku teposangki, ka komba Aku tekuda mpiha, ka si molema rosodo i aro-Ku; Ongkuemo anu weweuo penaa tuwua

¹⁷ Ongkue tekuda hangano hala modokono, Kusepio, wunio rupa-Ku ka tekuda, sine ipebungkui Aku ka itondao sala anu bininikino aroano.

¹⁸ Kukitaomo luwuno salano atuu, sine Aku mokotompao ka Aku tumaateo ka momuleakono pontarero.

¹⁹ A wiwido mbo'u miano anu mpo'inombo Aku mokogagio po'unde-unde. ’Rodoa, rodoa manangai tiado anu me'olai ka tiado anu me'umpeda,’ pau-Do i Ue ’Aku mokotompao!’

²⁰ Sine, mia mosa'o gaudo kana tahi anu mebomba, hangano nahi pokorodo mpiha, ka uwoino mompepasiako rompo ka rege.

²¹ Nahina manangai tiado mia mosa'o gaudo atuu,” pau-Do Ue Alaku.