Yesaya 56 - Wunta Mempori

LAMORO 56–66 PO'IHIIA TEKADUDUIA KA LUWUNO ATORANO Tekaduduia onaemo tiano luwuno mia 56:1-8

¹ Kanandiomo pau-Do i Ue: Tondaomo songka ka teahakonomo moleoa, hangano saraimo koa ta hawe tekaduduia anu inso ndi Ongkue, ka moleoa-Ku ta pinokomengkaa.

² Me'uraomo mia anu weweuo, ka anano mia anu me'ini ndi onae: anu mekakaakono oleo Saba ka nahi kokoburutio, ka anu meteao koroino inso a sompo wineweu mosa'o.

³ Mia hawe anu ntepo'asa ndi Ondae i Ue kasi dompotae, ”Manasaomo Ondae i Ue Ira monsia aku inso a bawaa-Do”; ka mia sinu'ului si dompotae, ”Menteeano, ongkue andio keu anu motu'i.”

⁴ Hangano, kanandiomo pau-Do i Ue, ”A mia anu mensinu'ului anu mpekakaakono luwuno oleo Saba-Ku ka anu binikio hapa anu inehe-Ku ka anu me'ini a mpedandia-Ku,

⁵ ndi ondae Aku weeako ira laro raha-Ku ka i horino rere watu po'ianga-Ku asa tondonino pepopoto'ori ka nee, anu moikoopo sekonopo luwuno nana'ote ntama ka beine, asa nee nahi bali anu nahi ta tampula Aku weeako ira.

⁶ Mia mehawe anu ntepo'asa ndi Ondae i Ue ka mekakaako Ira, ka dompehohawao nee-Do i Ue ka domegagi tetenaa-Do, luwuno anu mekariao oleo Saba ka nahi domengkokoburutio, ka anu me'ini a mpedandia-Ku,

⁷ ondae Aku wawa ira a ntorukuno-Ku anu mempori ka Aku moweeako ira mawongkoa a raha pekakaia-Ku. Aku memoikoo luwuno pesomba tinunu ka pesomba sinumbeledo anu pinesombaakodo a wawo meda pontunua pesomba ndi Ongkue, hangano raha-Ku ta pinewua raha pekakaiado luwuno tongku.

⁸ Pau-Do Ue Ala anu pumpu ira to Isaraeli anu ntesiarawo: Aku mopumpu mbo'u mia ndi onae gagi tiangido miano anu tepumpuomo.”

Luwuno petewawa anu mosa'o gaudo 56:9–57:5

⁹ Hei luwuno kondehora mo'ila, hei luwuno kondehora a ntobu, aiwamo ka impongkaamo!

¹⁰ Hangano, luwuno anu mpodagai a bawaa-Ku onaemo mia memorawu, luwudo nahi domponto'ori hapa-hapa; luwu dahu mebebe, nahi domponto'ori mpohopa; ondae mpepombole, mpenoro-noro, ka moturi koa inehedo;

¹¹ dahu memodoko mpongkaa, anu nahi domponto'ori mowohi! Ondae atuu puu pompakambi, anu nahina tino'orido! Luwudo mpo'ala salado ondaedo, singge mia molulu untu, nahina pinesusua.

¹² ”Aiwamo,” dompotae, ”aku mo'ala anggoro, moikoomo tompo'inu ara tehadio ntu'u; tisomo mengkena kana oleo andio, ka laluaopo moiko mbo'u!”