Yesaya 55 - Wunta Mempori

Pepoboi mpetonda a laro ntekaduduia anu inso ndi Ondae i Ue

¹ Hei luwuno mia anu mokoranga, aiwamo ka impo'inumo uwoi, ka hei mia anu nahina doino, aiwamo! Tarimaomo gandu siimo inowahi ka pongkaamo, anggoro mbo'u ka susu nahi inowahi!

² Tembio ka impo'oliako doi anu komba kaanga, ka tambono pe'iseimu anu nahi mompokomowohi? Ronge Akumo asalakono komiu mpongkaa anu moiko ka pongkaa kaanga anu mo'ahi ntu'u.

³ Ta'oomo birimu ka aiwamo ndi Ongkue; perorongeakonomo asalakono komiu mentuwu! Aku mowutu pedandia anu nahi bali saru omiu, montonda pompehohawa-Ku anu moroso ndi Daudi.

⁴ Menteeano, Kupakosiomo onae gagi sakosiido luwuno tongku, gagi asa petewawa anu meparenta a luwuno suku tongku;

⁵ Menteeano, omue komompoboi tongku anu nahi uto'orio, ka tongku anu nahi uto'orio ta aiwa ndi omue, hangano Ondae Ue Alamu, Anu Mempori ntu'u, Ue Alado to Isaraeli, melangkaiko.

⁶ Ungke Iramo i Ue tempono da inehe-Do totepohaweako Ira; peboolimo ndi Ondae tempono da umpeda Ira!

⁷ Moikoomo mia mosa'o gauno bintao salano, ka mia lambaha bintao tinoono. Moikoomo ipepokule ndi Ondae i Ue, asalakono Ira mehohawao, ka ndi Ondae Ue Alato, hangano Ondae mo'onini hala hadio ntu'u.

⁸ Hangano, tinoo-Ku komba tinoomiu, ka salamiu komba sala-Ku, kanandiomo pau-Do i Ue.

⁹ Kana mantandeno langi inso i tolino, kanatuumo mantandeno sala-Ku inso a nsalamiu ka tinoo-Ku inso a ntinoomiu.

¹⁰ Hangano kana usa ka seru baku metii inso i langi ka nahi pekule i tu'ai, tendeano umuwoio tolino, mokomewaloo ka mompokotuwu pinopaho, moweeako ira inii a puu mporawo ka kaanga a mia anu ta mongkaa,

¹¹ kanandiomo pau-Ku anu meluarako inso a nganga-Ku: onae nahi ta mekule mpena ndi Ongkue, sine onae ta weweuo hapa anu inehe-Ku, ka ta mehasili a hapa anu Kutenaakono.

¹² Mentee ntu'u, komiu mpelungka memawongko ka ta tineoako sintuwu; luwuno torukuno ka pongku ira mpo'unde ka mengkokora-kora maroa i aromiu, ka luwuno keu a mpada ira mpotopa-topa.

¹³ Gagi euno ewo rui ta tuwu keu sanobari, ka gagi euno kecubu ta tuwu keu muradi. Mongkona atuu ta gagi telele-Do i Ue, gagi petondoni nahi bali anu nahi ta tampula.