Yesaya 54 - Wunta Mempori

Pedandia manangai saru Sioni

¹ Mengkokora-koramo mawongko, hei beine bita anu nahi hori me'ana! Po'undemo saru mengkokora-kora mawongko ka pebolikimo, hei omue anu nahi hori mompembasai mahaki me'ana! Hangano luwuno anano beine anu bininta asa-asano ta laluaopo hadio anano sekonopo nana'ote inso a beine anu hinao tamano, pau-Do i Ue.

² Pokomaluaomo po'iangano kemamu, ka wileomo tenda po'iangamu, sii tidahio; poko'ondau iramo kolorono kemamu ka tandapako iramo pandoramu temoroso!

³ Hangano omue kotetiangi i koana ka i manggali, inulemu ira mpetorokio witado luwuno tongku, ka mpo'iangario luwuno kota anu boni-boni.

⁴ Siimo doito, hangano nahi komohawe mokoko'ii, ka siimo mokoko'ii, hangano nahi kotinata. Hangano, omue kokumolupeo pontata tempono kontelaamu, ka nahi komewowoloo mbo'u mokoko'iia tuwu beinemu.

⁵ Hangano anu ta gagi tamamu onaemo Ondae Anu Mokogagiko, Ueno Luwuakoano, nee-Do; anu gagi Puu Pontolosimu onaemo Anu Tedoa Mempori Ue Alado to Isaraeli; Ondae pinau Ue Alano asa wawontolino.

⁶ Omue kana beine mekombia anu bininta ka anu masusa aroa tempono Dowali moboiko i Ue; kana'umpe beineno inso tempo da mongura nahi ta hori tumarimao? Pau-Do Ue Alamu.

⁷ Komba ta tehine Kubintako, sine hangano pompehohawa anu langkai Kuwali umalako.

⁸ A laro ntekuda anu tedoa langkai Kuwuniomo rupa-Ku sarai koa ndi omue, sine a laro mompehohawa anu nahina balino Kupehohawakomo, pau-Do i Ue, Puu Pontolosimu.

⁹ Mongkona andio ndi Ongkue kana lolowi tempono i Noho. Kana Kupesumpa ndi onae nine lolowi nahi ta tumutuwio mbo'u tolino, kanatuu koa mbo'u Kupesumpa nine nahi Aku tekuda ndi omue ka nahi Aku wurasaiko mbo'u.

¹⁰ Hangano maupo dompelimba torukuno ka luwuno pongku mpelelu, sine pompehohawa-Ku nahi ta melimba inso ndi omue ka pedandia sintuwu-Ku nahi ta melelu, pau-Do i Ue, anu mehohawako.

¹¹ Hei anu tepokonsii, anu rinumpaino angi mokora, anu nahi tinarero! Menteeano, Aku monaa empehimu inso a watu mo'ito ka pundasimu inso a watu lasuaradi.

¹² Aku weweuo luwuno punsuno rere watumu inso a watu delima, luwuno pewowa langkaimu inso a watu manika motaha ka luwuno rere watu petidamu inso a watu paramata.

¹³ Luwuno anamu ira megagi ana guru-Do i Ue, ka langkaiomo manangaido anamu.

¹⁴ Omue kotineahako a menteea. Omue ko'olai inso a porontua, hangano omue siimo doito mbo'u, ka omue ko'olai inso a doitoa, hangano onae nahi ta umpedaakomu.

¹⁵ Tewala mia monsapoi, atuu komba tepu'u inso ndi Ongkue; isemamo koa anu sumapoiko, ta tebangku umaropiko.

¹⁶ Menteeano, Ongkuemo anu mokogagio puu mpolabu anu mompuuri api ka moweweu parewa mpetea montonda ponto'orino, sine Ongkue koa mbo'u anu mokogagio poropu anu sumolangio.

¹⁷ Sompo parewa mpetea anu linabu umewaiko nahi ta mehasili, ka sompo mia anu tumuluriko a laro mpobitaraa, komokomengkaao onae sala. Onaemo tiado tetenaa-Do i Ue ka menteea anu tinarimado inso ndi Ongkue, kanandiomo pau-Do i Ue.