Yesaya 53 - Wunta Mempori

¹ Isemake anu me'ala-alao lele anu rinongemami, ka ndi semake ipinokomengkaa pabawano kae-Do i Ue?

² Kana tumba onae tuwu i aro-Do i Ue ka kana haka inso a wita motu'i. Onae nahi montama ke tengkita maramba ba ikinita, ka nahina a rupano anu weweu kita ineheakono.

³ Onae tinata ka dome'olaiakono mia, asa mia anu bukeako tebobarasaia ka leleo marasai mompemahaki. Mia mbo'u domentutuwio rupado ba domengkitao; kanatuumo itinata ka ndi ontae nahi tewinso a mporeke.

⁴ Menteeano, hakitomo anu tinembino, ka tebobarasaiato anu tinembino, kahinaano potaeto onae ikonao pohuku, tinunduhi ka Dopokomahakio Ue Ala.

⁵ Sine onae tinobo hangano pe'ewato, onae pinirego hangano poweweuto anu mosa'o. Ponsepi anu mowawa tekaduduiato pinotii ndi onae, ka hangano lia-liambano ontae pinokotompa.

⁶ Ontae luwu ntesaa kana bimba, ontae singge mpo'ala salato ontaeto, sine Dopotiiomo i Ue ndi onae mosa'ono wineweuto luwu.

⁷ Onae binobarasai, sine ipo'ineeo koroino pinokomahaki ka nahi pepau kana ana bimba anu winawa a mposumbelea; kana ineno bimba anu beebe i arodo mia anu megontio wuluno, nahi pebeeli.

⁸ Umarino rinako ka hinuku onae winawa lumako, isema anu merioo hapa anu gagi ndi onae? Mentee ntu'u, onae te'otuhi inso a witado mia mentuwu, ka hangano pe'ewado bawaa-Ku onae kona pohuku.

⁹ Mia menaao kaburuno i olodo mia mosa'o gauno, ka kaburuno kongko i olono mia kaea, maupo nahi pobobarasai ka pompopo'oo nahina a laro ngangano.

¹⁰ Sine po'ehe-Do i Ue piregoo, mokomahakio. Tewala sumangano pineweengako gagi pesomba pontolosi sala, onae ta kumitao inuleno, tinuwuno ta melai, ka po'ehe-Do i Ue ta mokoweweuo.

¹¹ Umarino masusano sumangano ta kumitao mewine ka gagi teende aroano; hangano ponto'orino, tetenaa-Ku, mia mentee atuu, ta mompokomentee hadio mia ka mosa'odo itembio.

¹² Onaemo pu'uno, Aku tumiaakono rinontu i olodo mia anu langkai potorodo; ka onae ta tumiao rinontu meronga mia memoroso, hangano ipeweengakonomo penaano a laro matea; hangano onae mbo'u tewinso i olodo anu mpe'ewa, kahinaano onae tumembio halano mia hadio, ka mekakai tiado mia anu mpe'ewa.