Yesaya 52 - Wunta Mempori

Lele moiko tiano Sioni

¹ Pekaangakomo, Pekaangakomo! Pokonaomo rosomu, hei Sioni! Pokonaomo sangka pinelangkaimu, hei Yerusale, kota anu mempori! Hangano, mia anu nahi petindi ke anu mokoburu nahi ta mewinso mbo'u i laromu.

² Petapisakonomo pampawu inso ndi omue, pewangumo, hei Yerusale anu tinawa! Lohu iramo po'onggo inso a we'umu, hei ana beine Sioni anu tinawa!

³ Hangano kanandiomo pau-Do i Ue: Omiu me'inasa mpena, onaemo pu'uno komiu mbo'u mentinolosi nahi inowahi.

⁴ Hangano kanandiomo pau-Do Ue Ala: I ndi'ipua bawaa-Ku mpelungka melako i Masiri ka dompo'ia i tu'ai gagi mia mehawe, ka i'amba Asuri mokonsiio nahina pu'uno.

⁵ Sine kanandio-andio hapa mbo'u ta wineweu-Ku i ndi'ai? Kanandiomo pau-Do i Ue. Bawaa-Ku mewinawa iramo melako kanatuumo koa. Ondae anu mempabawaio me'unde-undeo koroido, kanandiomo pau-Do i Ue, ka nee-Ku pinepaukiako mpiha i larono asa ngkeu oleo.

⁶ Onaemo pu'uno bawaa-Ku ira mento'orio nee-Ku ka i tempo atuu ira mento'orio nine Ongkuemo Ondae anu mepau. Ongkuemo andio!

⁷ Tekosi ntu'u iwawono luwuno pongku pelela-lelano mia anu mowawa lele, anu mompalele lele rodoa ka paleleo lele moiko, anu paleleo lele tekadudui ka motae ndi Sioni, ”Ondae Ue Alamu moparenta gagi mokole!”

⁸ Ronge iramo anu medagaiko mpontande suara; ondae mperonga mengkokora-kora mawongko. Hangano, domengkitaakono matado ondaedo Ondae i Ue mekule i Sioni.

⁹ Impo'undemo, mengkokora-koramo mawongko mperonga-ronga, hei tekale-kaleno Yerusale! Hangano, Ondae i Ue Dotarero iramo bawaa-Do, Yerusale Dotolosiomo.

¹⁰ Dopopokitaomo i Ue kae-Do anu mempori i arono matado luwuno tongku; luwuno tompano tolino kumitao tekaduduia inso ndi Ondae Ue Alato.

¹¹ Pe'olaiakomo, pe'olaiakomo! Peluarakomo inso i ra'ai! Osi'i ntu'u omue tedanggiako anu mokoburu! Peluarakomo inso i tonga-tongano, pokomemporiomo koroimiu, hei mia anu mpontande parewano raha-Do i Ue!

¹² Mentee ntu'u, nahi komiu memadara mpeluarako ka melako mpolai hangano Ondae i Ue Ira melempa i aromiu, ka Ondae Ue Alado to Isaraeli Ira gagi pokotompaano baresimiu.

Tetenaa-Do i Ue anu marasai 52:13–53:12

¹³ Menteeano tetenaa-Ku ta mehasili, onae ta pinelangkai, inunde-unde ka pinokomaramba.

¹⁴ Kana'umpe hadio mia ira ntededengke mengkitao – tedoa mosa'o rupano, komba kana mia mbo'u, ka tadeno komba kana mia mbo'u –

¹⁵ kanatuumo onae ta weweu ira hadio tongku mengkohali-hali, luwuno mokole ira mengkomuo ngangado mengkitao; hangano hapa anu nahi domempinauako ira mengkitao, ka hapa anu nahi domerongeo ira mpokonto'orio.