Yesaya 51 - Wunta Mempori

Pau pontarero tiano Sioni 51:1-23

¹ Ronge Akumo, hei omiu anu mpolulu hapa anu mente, hei omiu anu umungke Ira i Ue! Kitaomo torukuno watu anu inso ndi onae imempina'o, ka a aa pongkekea watu anu inso ndi onae imengkineke.

² Kitaomo i Burahima, uempu'umiu, ka i Sara anu me'anaakomiu. Tempono i Burahima asa-asano, Kupoboio, ka Ku'amba rumonsoo ka weweuo gagi hadio.

³ Hangano Ondae i Ue tumareroo Sioni, tumareroo luwuno tehoano; Ondae weweuo pada oneno kana i Paradesi ka pada maluano kana lere-Do i Ue. I tu'ai hinawe mawongkoa ka po'undea, penani po'unde-unde ka unino penani anu meroku.

⁴ Pekokoongakono suara-Ku, hei bawaa-Ku, ka ta'oomo birimu ndi Ongkue, hei tongku-Ku! Hangano pompaguru ta meluarako inso ndi Ongkue ka songka-Ku gagi mewine tiado tongku.

⁵ I larono asa mpiniro tekaduduia inso ndi Ongkue ta umpeda, tolaa anu Kuweeakomiu ta hawe, ka kae pabawa-Ku ta parenta ira tongku; ndi Ongkuemo luwuno togo mpesisikori, wineweuno kae-Ku domperorohio.

⁶ Po'aroomo matamu i langi ka pengkitamo i tolino i totono; hangano langi ta tampula kana ahu, tolino kanaomo tahu sangka ka palilino ira memate kana tiporo. Sine, tekaduduia inso ndi Ongkue ta kongko mpiha ranta nahina tampulaano, ka moleoa-Ku nahi ta menaa-naa.

⁷ Ronge Akumo, hei omiu anu mento'orio hapa anu mentee, hei tongku anu menaao pompaguru-Ku a laro aroamiu! Siimo doito a pontatano mia ka siimo makura aroa hangano pepaukido.

⁸ Hangano ondae ta kumaa ira ule-ule kana sangka ka ule-ule ta kumaa ira kana sangka wulu bimba; sine moleoa-Ku ta kongko mpiha ranta nahina tampulaano ka tekaduduia inso ndi Ongkue ta motilalo mpiha ranta a luwuno inule.

⁹ Pekaangakomo, pekaangakomo! Pokonaomo roso, hei kae-Do i Ue! Pekaangakomo kana i tempo se'eluno ntu'u, ia tempo inule anu ndi'ipua ntu'u! Komba Omiuke anu purokio i Rahabi, anu montobo naga ranta mate?

¹⁰ Komba Omiuke anu moko'areo tahi, uwoi a ntahi malua anu mongkokongiri, anu weweuo tahi anu ondalo gagi sala, ka dompokompesakiako mia anu tinolosi?

¹¹ Luwuno mia anu pinotola-Do i Ue ira mpekule ka mpewinso i Sioni mengkokora-kora mawongko, po'unde nahina tampulaano ta gagi peramba-ramba uludo; mawongkoa ka po'unde ta buketi ira, masusaa ka pompemasusa me'olaiako.

¹² Ongkue, Ongkuemo anu tumarero komiu. Omue andio isema ranta ka udoito a mia anu ta mate, a anano mia anu tinadi kana ewo?

¹³ Omue kumolupe Ira i Ue anu mokogagiko, anu wileo langi ka numaao empehino tolino. Omue doito mpiha asa ngkeu oleo a ntekudano anu mompokonsii atuu, tempono ipepatinda mompokoropu. Isuaomoke tekudano anu mompokonsii atuu?

¹⁴ Onae anu pinanga tepongu ta ronga pinotola; onae nahi ta mate metii a laro ngkaburu ka nahi ta makura ngkaanga.

¹⁵ Hangano Ongkuemo Ue, Ue Alamu, anu bembuao tahi, ranta ka ipebunde bombano, – nee-Do Ue Alano luwuakoano.

¹⁶ Aku numaao pau-Ku a laro ngangamu ka dumagaiko a laro mpo'engoino kae-Ku, Ongkue anu wileo langi ka numaao empehino tolino, ka mepau ndi Sioni: Omuemo bawaa-Ku!

¹⁷ Pekaangakomo, Pekaangakomo, pewangumo, hei Yerusale, hei omue anu mo'inukomo inso a ngkae-Do i Ue ihino piala mokulano tekuda-Do, omue anu mo'inukomo, umosoo ka ipingko ihino sangkiri anu mompokomokolili ulu!

¹⁸ Inso a luwuno ana anu pine'anaakono nahina anu tumaateo inso a luwuno ana anu pinokolangkaino nahina anu uminio kaeno.

¹⁹ Orua urasa'o andio i'alukomo, – isemake anu ta mompemasusa saru omue? – matea maupo tekale-kalea, mokoninggoa maupo ponai. Isemake anu ta tumareroko?

²⁰ Luwuno anamu ntebangku iramo nami domemoroso, a luwuno tompano sala kana sapi mo'ila kona oho; ondae itutuwi ira mokulano tekuda-Do i Ue ka pau meroku-Do Ue Alamu.

²¹ Onaemo pu'uno, rongeomo andio, hei omue anu tepokonsii, hei omue anu molangu, sine komba hangano anggoro!

²² Kanandiomo pau Uemu, Ue Alamu anu tumeahakono kara-karano bawaa-Do, ”Menteeano, Ku'alao inso a ngkaemu piala saru ihino anu mompokomokolili, ka ihino sangkiri mokulano tekuda-Ku nahi ko'uminuo mbo'u.

²³ Sine, Aku meweengakono a ngkaeno anu mokonsiiko anu hieno motae ndi omue, ’Petuundumo, ka kintelalo lumolanda komiu!’ Ka bungkumu upetunduakono merete wita, gagi pesalaano mia anu telalo i wawono.”