Yesaya 50 - Wunta Mempori

Sioni tumembio salano onaeno 50:1-3

¹ Kanandiomo pau-Do i Ue, ”Nde isuaomoke wunta teposuano inemu tondonino Kusaariomo? Ke ndi semake i olodo puu ponsinga-Ku Kuhori umasako? Menteeano, hangano salamu omuemu ka imempinoko'asa ka hangano salamu omuemu inemu sinaari.

² Tembio tempono Ku'aiwa nahina mia, ka tempono Kupepoboi nahina anu sumangki? Nde owowalahike kae-Ku mongkadudui ke nahinake roso-Ku mompotola? Menteeano, butu pau tekuda-Ku Kupokotu'io tahi, luwuno korono Kuweweuo gagi pada one; luwuno bou manaboo hangano nahina uwoi ka memate mokoranga.

³ Langi Kupokonaakono sangka wongi-wongia ka kukolimbuakono sawu po'inombo.”

Petenunu ka modato aroano tetenaa-Do i Ue 50:4-11

⁴ Ondae Ue Ala Dopoweeakunemo elono asa mia ana guru, kai butu pau kupolio moweeakono roso mia anu telusa molema. Mo'oru me'eu mo'oru Dopokomontasoo porongeku ka kuporonge kana asa ana guru.

⁵ Biriku Do'ungkahiomo Ue Ala, ka nahi ku'umewa, nahi kupewolili mbo'u i bungkuno.

⁶ Kupeweengakono bungkuku a mia anu mentunduhi aku, ka kombisiku a mia anu mebutao danggoku. Nahi kuwunio rupaku tempono kutinata ka inonui.

⁷ Sine Ondae Ue Ala tumulungi aku; onaemo pu'uno nahi kupohawe mokoko'iia. Onaemo ka kupokorosoo aroaku kana rosono torukuno watu hangano kuto'orio nine nahi aku mohawe mokoko'ii.

⁸ Ondae anu mokomengkaao mentee aku umpeda Iramo. Isemake anu mosia megaga saru ongkue? Aiwamo ka tolako meronga-ronga! Isemake taroku mekara-kara? Po'ineeomo ka i'umpeda ndi ongkue!

⁹ Menteeano, Ondae Ue Ala tumulungi aku; isemake anu mosia mokomengkaao nine ongkue sala? Menteeano, luwudo tamo kana tahu sangka; ule-ule ta kumaa ira.

¹⁰ Isema i olomiu anu dumoitoako Ira i Ue ka merorongeakono pauno tetenaa-Do? Tewala onae tuwu a laro wongi-wongi ka nahina wanta pansario, moikoomo ka ipompe'ala-ala a nee-Do i Ue ka momperorohi ndi Ondae Ue Alano!

¹¹ Menteeano, omiu luwu anu mpopokomelanga api ka mpeparewaako pana-pana api, impewinsomo a laro langano apimiu, ka a ntongano pana-pana api anu imempasaomo! Kae-Kumo anu ta mokogagio mongkona atuu ndi omiu; komiu mpepombole a mpo'ianga tebobarasaia.