Yesaya 5 - Wunta Mempori

Penani mongkona lere anggoro 5:1-7

¹ Aku menaniako penani mongkona pinehohawaku, penanino pinehohawaku mongkona lere anggorono: Pinehohawaku hinao lere anggorono a laano pongku anu mewalo.

² Ibingkuo ka itadi ira watuno, ipompahoakono keu anggoro bininiki; onae mowangu asa menara podagaia i tonga-tongano ka mongkeke aa pomporo'ia anggoro. Ka i'amba sumikorio lere atuu ka ipehasiliako wua anggoro, sine anu ipehasiliako wua anggoro anu mo'olo.

³ Kanandio-andio, hei palilino Yerusale, ka to Yehuda, bitaraomo olono ongkue ka lere anggoroku.

⁴ Hapa mbo'uke anu asalakono wineweu a lere anggoroku atuu anu napi kuweweuo ndi onae? Kusikorio ka ipehasiliako wua anggoro, tembio anu ipehasiliako butu wua anggoro anu mo'olo?

⁵ Gagi kanandio-andio, aku pauakomiu hapa anu aku weweuo a lere anggoro-Ku atuu: Aku tumuehio wala ruino, ranta lere atuu ipingko kinaa, aku mobangkuo rere watuno, ranta ka ilinolanda lere atuu;

⁶ aku mo'ineeo nahi pinesampai ka nahi binondei, ka ituwu ewo ka rui; aku parenta ira seru, ka si dopompotii usa i wawono.

⁷ Hangano lere anggoro-Do Ueno luwuakoano onaemo sukudo to Isaraeli, ka to Yehuda onaemo bonde anu inehe-Do; Dosikorio moleoa, sine butu lambaha anu hinao, Dosikorio menteea, sine butu marisua anu hinao.

Pontekudaako mongkona mperupa-rupa nahina moleoa

⁸ Masola ntu'u mia anu mansa mompewinsoki raha melimba a raha susua ka moronto lere melimba a lere susua, ranta nahina mbo'u po'iangado mia susua. Imeweweuo butu koroimiu anu mpo'iangario wita atuu.

⁹ A biriku teronge sumpa-Do Ueno luwuakoano, ”Menteeano hadio raha ta gagi boni-boni; luwuno raha anu langkai ka tekosi nahi ta hina mo'iangario.

¹⁰ Menteeano, lere anggoro anu maluano hopulu semedi ta mehasiliako butu asa bati anggoro; ka inii asa homeri ta mehasiliako butu asa efa tarigu.”

¹¹ Masola ntu'u mia anu mewangu mo'o-mo'oru ka tetutu mo'ungke inua anu mompokomolangu, ka i'amba mentoro-toro hawe wongi, molanguako anggoro!

¹² Katapi ka gambusu, rebana ka siloli, saru anggoro mokomaroao luwuno pogawedo, sine wineweu-Do i Ue nahi pinelangkai ka inangga-Do i Ue nahi pinerio.

¹³ Onaemo pu'uno, bawaa-Ku asalakono melako a pontadia, hangano nahi domponto'ori hapa-hapa; luwuno mia anu maramba ira memokoninggo, ka mia hadio ira memarasai mokoranga.

¹⁴ Onaemo pu'uno, tolinodo mia mate ta umungkahio burokono temalua ka ta konganga-nganga nahina otuano, ranta i larono tampulaomo mewantano ka maroano Yerusale, magagano ka mawongkoa i kota atuu.

¹⁵ Ka mia ta pinokompetuundu, ka mia ta pine'uru-uru, humbee, mia mompelangka-langkai ta pine'uru-uru.

¹⁶ Sine Ondae Ueno luwuakoano lano tedoa mantande a laro moleoa-Do, ka Ondae Ue Ala anu tedoa mempori mokomengkaao pentoroa-Do a laro menteea-Do.

¹⁷ Bimba ira mpongkaa ewo i ra'ai kana a mpada po'iangado, anano bembe ira mpo'ungke mpongkaa a nterongkano rahano mia kaea.

¹⁸ Memasola ira ntu'u anu mpo'ungke-ungkeako sala mompake koloro pegaupi ka hala mompake kolorono porende roda,

¹⁹ anu mpotae, ”Moikoomo Ondae Ue Ala ka Doronga mokogagio wineweu-Do, ka tomengkitao; moikoomo tinoo-Do Anu Tedoa mempori, Ue Alado to Isaraeli, ka i'umpedamo ka imengkaa, ka tomento'orio.”

²⁰ Masola ntu'u anu motae wineweu mosa'o atuu moiko ka moikoa atuu mosa'o, anu balio wongi-wongi gagi mewine ka mewine gagi wongi-wongi, anu balio mopa'i gagi mo'ahi, ka mo'ahi gagi mopa'i.

²¹ Masola ntu'u mia anu tumuduo koroino pande mosongka, anu tumuduo koroino pande!

²² Masola ntu'u mia anu mokora mo'inu ka anu pande ntu'u monsalo inua anu mompokomolangu;

²³ anu mokomenteeo mia mosa'o gauno hangano pompowee nahi pototono ka anu humapuo tiano mia mentee.

²⁴ Onaemo pu'uno, kana elo api mongkaa seami, ka kana ewo mokari pingko tampula a laro langano api, kanatuumo luwuno hakado ta moboo, ka sisino mpenee kana awu, hangano nahi domentarimao pompaguru-Do Ueno luwuakoano ka mentatao pau-Do Anu Tedoa mempori, Ue Alado to Isaraeli.

Tongkudo mia mehawe gagi pesalaano tekuda-Do i Ue 5:25-30

²⁵ Onaemo pu'uno, tesingkaomo tekuda-Do i Ue a bawaa-Do, kae-Do Dopotiio ndi ondae ka Dotunduhi ira; torukuno mpondidi-ndidi, ka wata ngkoroido kana ta'i a ntonga nsala. Maupo gagiomo luwuno andio, tekuda-Do napi temonto, ka kae-Do kongkono pinotii.

²⁶ Ira mowuatako bandera tiano tongku anu inso a olaino, ka momansu moboi ira inso i tompano tolino; menteeano ira koa ronga me'aiwa mpotuturako!

²⁷ Nahina maupo te'asa mia i olodo anu mokendo, nahina maupo te'asa mia anu tetidu; ondae nahi domerodo ka nahi dontekoturi, nahi tepotola peboo ntongado, nahi tebite onggono sandalado;

²⁸ ana mpanado pinokomontasoomo, ka luwuno panado linongkuomo; kukuno ngarado motea kana watu api ka bolano karetado kana lompiu.

²⁹ Pengaolido kana singa waino, kana singa mongura dompengaoli; ondae mperaali ka mporako kaangado, mewawao mpelulu ka nahina mokompotolao.

³⁰ A oleo atuu ira mperaali kana tahi u'uru. Tewala mia mengkita i tolino, tengkita butu wongi-wongi anu mompokoma'iso, ka mewine gagi wongi-wongi hangano seru!