Yesaya 48 - Wunta Mempori

Ondae i Ue mokogagio tuwua lembuiano anu wo'ohu 48:1-11

¹ Rongeomo pau andio, hei suku inuleno i Yako, anu pinewuaako nee Isaraeli anu mepu'u inso a inuleno i Yehuda, anu mesumpa a nee-Do i Ue ka umakuio Ue Alado to Isaraeli, sine nahi a menteeano ntu'u ka moleo aroa.

² Mia anu tendeano mempauo koroido te'inso a Ngkota Mempori, ka mpehonda ndi Ondae Ue Ala Isaraeli, anu nee-Do Ueno luwuakoano,

³ ”Mongkona luwuno anu gagi a tempo anu telalo Kupauomo mompu'u i ndi'ipua, Kupauomo ka Kupaleleo. Mepobingko Aku weweuo ka luwuno atuu gagi mengkaa.

⁴ Hangano Kuto'orio, nine omue motea aroa, motea ulu ka me'ulu watu,

⁵ onaemo ka Kupauakomu mompu'u i ndi'ipua, se'eluno mongkona atuu gagi mengkaa, Kupaleleo ndi omue ka si'upotae: Lahumoaku anu weweuo, tinaha pina'oku ka tinaha tinawaku anu parentao.

⁶ Luwuno atuu urongeomo, ka kitaomo. Omiu isa'a, nahi mebeheke me'akuio? Kupaleleakomu luwuakoano anu wo'ohu mompu'u kanandio-andio ka luwuakoano anu tewuni anu napi uto'orio.

⁷ Dandiopo luwuakoano atuu ipinokogagi ka komba inso mompu'u i ndi'ipua, ka se'eluno nahi urongeo, ka si upotae: Lano kuto'oriomo!

⁸ Omue nahi urongeo ke ba uto'orio, ka birimu mbo'u nahi te'ungkahi mompu'u i ndi'ipua. Sine, Kuto'oriomo nine poweweumu tedoa mosa'o, ka domempauo mia nine omue Puu Mpe'ewa mompu'u inso a mpe'anakaa.

⁹ Hangano nee-Ku Ku'ontoo tekuda-Ku ka hangano telele-Ku Kupehohawako, onaemo ka nahi Kupokotampulako.

¹⁰ Menteeano, Kupokomorinakomo, sine komba kana salaka. Ku'arahakomumo a laro pompotuwua api marasaia.

¹¹ Aku weweuo hangano Ongkue, oo hangano Ongkue-Ku, hangano kana'umpe ka ta kinokoburuti nee-Ku? Nahi Aku meweengakono maramba-Ku a nsusuaano!”

Ondae i Ue tumolosio Isaraeli molalo i Koresi

¹² ”Ronge Akumo, hei Yako, ka omue Isaraeli anu pinoboi-Ku! Ongkuemo anu mengkena mpiha, Ongkuemo anu tese'elu, Ongkue koa mbo'u anu telembui!

¹³ Kae-Kumo anu monaakono empehino tolino, ka kae ngkoana-Ku wileo langi. Tempono Kupoboi ira, luwudo pada mpe'umbaako.

¹⁴ Impepumpumo luwu ka imerongeo! Isemake i olodo pauo luwuno andio? Ondae i Ue mehohawao; onaemo anu weweuo po'ehe-Do i Ue a nto Babeli ka mopokitao rosono kae-Do a nto Kasidimi.

¹⁵ Ongkue, Ongkuemo anu pauo ka anu moboio mbo'u, Ongkuemo anu moboio, ka luwuno pe'i'iseino ta mehasili.

¹⁶ Perangkuhakomo ndi Ongkue, rongeomo andio: Inso i ndi'ipua nahi Kuhori mepau rahasia ka tempono igagi luwuno atuu kongko Aku i tu'ai.” Kanandio-andio, Ondae Ue Ala tumena aku a Mpenaa-Do.

¹⁷ Kanandiomo pau-Do i Ue, Pontolosimu, Anu Tedoa Mempori, Ue Alado to Isaraeli, ”Ongkuemo Ue, Ue Alamu, anu paguruakomu hapa anu mentudu, anu tumaateko a nsala anu asalakono kotumondao.

¹⁸ Tewala upekokoongakono luwuno parenta-Ku, rodoamu ta kana korono, ka manangaimu ta hadio ntu'u kana bomba-bombano tahi.

¹⁹ Inulemu ta kana one ka ana'uemu ta kana one molaba hadiono; needo nahi ta pinokotampula ke inonini inso i aro-Ku.”

²⁰ Peluarakomo inso i Babeli, polaimo inso i Kasidimi! Pauomo saru kokora-kora mawongko ka paleleomo mongkona andio! Paleleomo hawe i tompano tolino! Pauomo, ”Ondae i Ue Dotolosiomo i Yako, tetenaa-Do!”

²¹ Ondae nahi domemarasai mokoranga, tempono Dowawa ira lumaloo luwuno po'ianga anu londa. Ondae moluarakoako ira uwoi inso a ntorukuno watu; Dobansio torukuno watu, ka mombusi-mbusiomo uwoi.

²² Pau-Do i Ue, ”Nahina rodoa tiado mia mosa'o gau!”