Yesaya 47 - Wunta Mempori

Tedontano Babeli

¹ Petiimo ka pentoromo a wawo pampawu, hei ana beine, ana beine Babeli! Pentoromo a wita nahi saru kadera poparentaa, hei ana beine Kasidimi! Hangano omue nahi kopinau mbo'u i ana beine tekosi hadio gelu.

² Alaomo watu pogili ka giliomo tarigu, oninio soumbumu; sungkeomo hawumu, posabaomo pa'amu, saki iramo korono!

³ Po'ineeomo ka isaba anumu ka mokoko'iiamu tengkita! Aku moweweu pombaloa ka nahina pinehohawa maupo te'asa mia.

⁴ Pontolosimami, Ondae Ueno luwuakoano nee-Do, Anu Tedoa Mempori, Ue Alado to Isaraeli.

⁵ Pentoromo perodo-rodo ka pewinsomo a laro wongi-wongi, hei ana beine Kasidimi! Hangano, omue nami kopinau mbo'u Mokole beine a luwuno poparentaa.

⁶ Ongkue hieno tekudaako ira bawaa-Ku, ka mengkokoburutio tia pusaka-Ku, ka meweengako ira a ngkaemu; Omue nahina pompehohawamu ndi ondae, tendeano tedoa upokomobeo tinembi a mia anu mota'u.

⁷ Horiko mepau, ”Ranta nahina tampulaano aku gagi mpiha mokole beine!” sine nahi upekokoongakono ka nahi upewowoloo pokotampulaano luwuno atuu.

⁸ Onaemo pu'uno, rongeomo andio, hei mia anu tuwu mesana-sanaa, anu rodo mentoro, ka motae a laro aroano, ”Butu ongkue; nahina anu susua i horiku! Nahi aku gagi tuwu beine ka anaku ira mekongko mpiha ndi ongkue!”

⁹ Orua rupa andio ta umaluko i larono asa mpiniro, a oleo anu mengkena. Meropu ira nana'ote ka tuwu beine ta kumonaiko tedoa marasai, maupo hadio sihirimu ka moroso ntu'u pobasa-basamu.

¹⁰ Omue roodo a laro wineweumu anu mosa'o, potaemu, ”Nahina anu kumita aku!” Pandemu mompewowolo ka ponto'orimu mokontesaako, onaemo ka upotae a laro aroamu, ”Butu ongkue; nahina anu susua i horiku!”

¹¹ Sine, urasa'o ta umaluko, nahi uponto'ori tumempuakono pobasa-basamu; masolaa ta umaluko, nahi upolio umo'ontoakono po'onto bala; matea ta mepobingko umaluko, nahi ukoo-kooo.

¹² Po'iamo mpiha saru luwuno pobasa-basamu ka sihirimu anu hadio atuu, anu upolempaomo mompu'u umongura; bara'ura kome'ura, bara'ura kopolio mompokodoito mia.

¹³ Omue molemakomo hangano hadiono patudu! Po'ineeomo dome'aiwa ka mengkaduduiko mia anu memparesao luwuno siuno langi, anu mpekokoongakono anano wula ka a sompo sabaano wula mempauo hapa anu ta gagi ndi omue!

¹⁴ Menteeano, ondae kana seami anu tinununo api; ondae nahi dompokompetolahako inso a mpabawano langano api, komba waro api pelahoi, komba api pominua!

¹⁵ Kanatuumo ndi omue mia anu tinenamu atuudo, anu mpebalu-balu iramo saru omue mompu'u tempo monguramu. Ondae singge mia kobangku-bangku a luwuno pe'aroa, nahina anu mokokaduduiko.