Yesaya 45 - Wunta Mempori

Ondae i Ue moboio i Koresi gagi pesalaa-Do 45:1-8

¹ Kanandiomo pau-Do i Ue, ”Ndiomo pau-Ku a mia anu Ku'urapio, ndi Koresi anu kae ngkoanano Ku'inio ka Kupokompetuundu ira tongku i arono ka mokoko'ii ira mokole, ka Ku'ungkahi ira pewowa i arono ka luwuno pewowa langkai ka sikongko tetondo;

² Ongkue isa'a melempa i aromu ka mokomerete ira torukuno; Aku rumongka ira pewowa mala ka pudu ira polanso labu.

³ Aku moweeakomu arataa anu tetano ka arataa pompoli anu tewuni, ka uto'orio nine Ongkuemo Ue, Ue Alado to Isaraeli, anu moboiakomu neemu.

⁴ Hangano tetenaa-Ku i Yako ka Isaraeli, bininiki-Ku, onaemo ka Kupoboiakomu neemu, ka moweeakomu potoro, maupo nahi uto'ori Aku.

⁵ Ongkuemo Ue ka nahina anu susua; sangkadio Ongkue nahina Ue Ala. Kupoweeakomumo parewa mpetea, maupo nahi uto'ori Aku,

⁶ ka domento'orio mia inso i sabaano oleo hawe a nsumooano, nine nahina anu susua sangkadio Ongkue. Ongkuemo Ue ka nahina anu susua,

⁷ anu mokogagio mewine ka mokogagio wongi-wongi, anu mokogagio sintuwu manangai ka mokogagio masolaa; Ongkuemo Ue anu weweuo luwuno andio.

⁸ Hei langi, potiiomo moleoa inso i wawono, ka moikoomo luwumo seru umuwuo! Moikoomo tolino montarima ka mentumbaako tekaduduia, ka moikoomo ituwu moleoa! Ongkuemo Ue anu mokogagio luwuno andio.”

Butu Ondae i Ue anu mompokogagi

⁹ Masola ntu'u mia anu megagaako Ira anu Mokogagio; onae butu sibano kuro inso a wita! Kana'umpe wita pulu ta mepauakono anu weweuo, ”Hapa anu wineweumu?” ke anu Doweweuomo atuu motae, ”Nahina pabawa-Miu a wineweu-Miu!”

¹⁰ Masola ntu'u mia anu motaeakono amano, ”Hapake anu inulemiu?” ka a ineno, ”Hapake anu pine'anaakomiu?”

¹¹ Kanandiomo pau-Do i Ue, Anu Tedoa Mempori ka Anu Weweuo Isaraeli mongkona luwuno anu ta hawe, ”Kana'umpe ka usikeno Aku mongkona luwuno ana-Ku ke parenta Aku mongkona wineweuno kae-Ku?

¹² Ongkuemo anu mokogagio tolino ka anu mokogagi ira mia i wawono; kae-Kumo anu wileo langi, ka Ongkuemo anu parenta ira luwuno sorodaduno.

¹³ Ongkuemo anu lumeluo i Koresi me'empehiako moleoa, ka luwuno salano Aku mokomereteo. Onaemo anu ta wanguo kota-Ku ka motola ira bawaa-Ku anu mekongko a laro pontadia, nahi inowahi ka nahina pompowee anu nahi pototono,” pau-Do Ueno luwuakoano.

¹⁴ Kanandiomo pau-Do i Ue, ”Hasilino wita Masiri ka luwuno ura inso i Etiopia ka to Sieba, mia anu malanga koroido, ira mpelimba ndi omue ka gagi miamu. Ira merinante ka dompelempa i bungkumu; ira mpesomba ndi omue ka mpo'ema, dompotae, ’Butu i olomiu hinao Ue Ala, ka nahina anu susua; sangkadio Ondae nahina anu pinesombai susua!’

¹⁵ Mentee ntu'u, Omiu Ue Ala anu wunio koroi-Miu, Ue Alado to Isaraeli, Puu pongkadudui.

¹⁶ Sine, anu mpoweweu lahumoa asalakono ira mpeliahako bukeako mokoko'iia, ira memokoko'ii ka mpohawe mbo'u mokoko'iia.

¹⁷ Sekono Isaraeli Dokaduduiakono i Ue tekaduduia anu nahina tampulaano; nahi komiu memokoko'ii ke mpohawe mokoko'iia ranta nahina tampulaano.”

¹⁸ Kanandiomo pau-Do i Ue, anu mokogagio langi; Ondaemo Ue Ala anu weweuo tolino, anu mokogagio ka kumorahakono; anu mokogagio komba ka imooa, tendeano weweuo ka ipino'iangari, ”Ongkuemo Ue ka nahina anu susua.

¹⁹ Nahi Kuhori mepau rahasia ke a wongi-wongiano i tolino. Nahi Kuhori mepau a inuleno i Yako ’ime'ungke Aku a mpo'ianga anu mooa!’ Ongkue, Ue, wela mepau mentee, wela mompau hapa anu moleo.”

Luwuno tongku mpesomba i aro-Do i Ue

²⁰ ”Mpepumpumo ka aiwamo, ime'aiwamo meronga-ronga, hei luwumiu anu mentola i olodo tongku! Nahina ponto'orido mia anu mpowawa tinaha inso a ngkeu kanantuu koa mbo'u ondae anu mpekakai a mpinesombai anu nahi polio mongkadudui.

²¹ Pauomo ka pohaweomo pe'empehimu, oo, po'ineeomo donteriso mperonga-ronga: Isemake anu paleleo mongkona andio inso a tempo se'eluno ntu'u, ka pauakono mompu'u i ndi'ipua? Kombake Ongkue, Ue? Nahina anu susua, nahina pinesombai susua sangkadio Ongkue! Ue Ala anu moleo ka Puu pongkadudui, nahina anu susua sangkadio Ongkue!

²² Impepokulemo ndi Ongkue ka imengkinadudui, hei luwuno tompano tolino! Hangano Ongkuemo Ue Ala ka nahina anu susua.

²³ Anee-Ku Ongkue-Ku mesumpa Akumo, inso a nganga-Ku meluarakoomo menteea, asa pau anu nahi ta pinokompokule mbo'u, ’Luwuno ira mpenggolontu i aro-Ku, ka luwuno elo mpesumpa mpetenunu anee-Ku,

²⁴ saru mpotae: Moleoa ka roso butu hinao ndi Ondae i Ue. Luwuno mia anu tekuda ndi Ondae ta aiwa ndi Ondae ka mohawe mokoko'ii,

²⁵ sine luwuno inuleno i Isaraeli ira mpohawe moleoa ka mpo'unde ndi Ondae i Ue.’ ”