Yesaya 44 - Wunta Mempori

Butu Ondae i Ue , Ue Ala anu Me'ueo Isaraeli 44:1-8

¹ ”Sine kanandio-andio, rongeomo, hei Yako, tetenaa-Ku, ka hei Isaraeli, anu Kubinikiomo!

² Kanandiomo pau-Do i Ue anu mokogagiko, anu weweuko mompu'u inso a laro mpe'anakaa ka anu tumulungiko: Siimo doito, hei tetenaa-Ku i Yako, ka hei Yesiuruni anu Kubinikiomo!

³ Hangano, Aku umuwuo uwoi a wawo wita anu mokoranga, ka usa marombo a wawo wita anu mokari. Aku umuwuo Penaa-Ku a inulemu, ka ronso-Ku a ana'uemu.

⁴ Ondae ira mentuwu i olono ewo, kana luwuno keu gandarusa a wiwi waaano uwoi.

⁵ Anu asa ta motae: Ongkue mia-Do i Ue, anu susua pauo koroino meneeako i Yako, ka anu susuano mbo'u burio a ngkaeno: Tia-Do i Ue, ka motoroo koroino meneeako i Isaraeli.”

⁶ Kanandiomo pau-Do i Ue, Mokole ka Puu pontolosino Isaraeli, Ueno luwuakoano, ”Ongkuemo anu tese'elu ka Ongkuemo anu telembui; nahina pinesombai sangkadio Ongkue.

⁷ Isemake kana Ongkue? Po'ineeomo ka ipebooli, po'ineeomo ka ipauo ka popauo ndi Ongkue! Isemake paleleo inso i ndi'ipua mongkona luwuno anu ta hawe? Hapa anu ta hawe, po'ineeomo ka kimempinauako!

⁸ Siimo pondende ka siimo doito! Kombake inso i ndi'ipua Kupaleleomo ka Kupauomo mongkona atuu ndi omiu. Omiumo sakosii-Ku! Hinaoke pinesombai sangkadio Ongkue? Nahina Torukuno Watu anu susua, nahina anu tino'ori-Ku!”

Benge-bengea mompesomba tinaha 44:9-20

⁹ Mia anu mpoweweu tinaha, luwuno nahina hapa-hapado, ka arataa pinehohawado atuu nahina tuduno. Luwuno sakosiido nahi domengkitao ka nahi domponto'ori hapa-hapa; onaemo pu'uno ira mempinokoko'ii.

¹⁰ Isemake anu weweuo asa pinesombai ka tumawao tinaha anu nahina tuduno?

¹¹ Menteeano, luwuno anu tumondao ta pinokoko'ii, ka luwuno puu mpoweweuno butu koa mia. Po'ineeomo dompepumpu luwu ka mpentade! Ondae ira medoito ta mohawe mokoko'ii mperonga-ronga.

¹² Saru luwuno parewado puu mpo'angga labu weweuo a laro waro api ka paluakono palu. Onae umanggaakono luwuno roso a ngkaeno. Tendeano onae montaha mokoninggo ranta pingkoomo rosono, ka onae nahi po'inu uwoi onaemo ka imolema telusa.

¹³ Puu mpo'angga keu padindio koloro posongka ka mogaresi weweuno songka asa tadeno tinaha. Onae umanggaakono pa'o ka gumaresiakono jangka, ka i'amba weweuo tadeno kana asa tama, kana tekosino tadeno mia, ka ta ninaa a laro raha mpelahumoaa.

¹⁴ Onae tumuehi ira keu arasi ke mobiniki keu saru ke keu tarabanti, anu pino'ineeno ka ituwu langkai i olodo keu a ntobu, ke onae mompaho keu pinusi, ka usa mokolangkaio.

¹⁵ Keuno gagi keu ponahudo mia, anu inalano gagi peraramiano, ke mokomelangao pontunu roti. Sine, iweweuo mbo'u gagi pinesombai ka ipesombaio; i'anggao gagi tinaha ka ipesomba ndi onae.

¹⁶ Asa ntia itunuo a laro api ka i wawono iraramio bau. Ka i'amba kumaano bau anu rinaramino atuu ranta mowohi. Onae merarami ka ipotae, ”Ha, mokula-kulaomo, kukitao langano api.”

¹⁷ Toreano keu atuu iweweuo gagi pinesombai, gagi lahumoano. Onae menggolontu mesombaio ka mekakai ndi onae. Ipotae, ”Tulungi akumo hangano omuemo pinesombaiku!”

¹⁸ Nahi dompoto'ori hapa-hapa ka nahina tino'orido hapa-hapa, hangano matado metako tepusu, ranta nahi dompongkita, kanatuu koa mbo'u aroado, ranta nahi dompokonto'orio.

¹⁹ Nahina anu tumimbangao, nahi sompo ponto'ori ke mokonto'orio ka ipauo, ”Entongano kutunuomo a laro api ka a wawo warono mbo'u kutunuo roti, kuraramio bau, ka ku'amba kumaano. Kana'umpe ta moiko toreano kuweweuo gagi lahumoa minokoburuako? Kana'umpe aku menggolontu mesomba a ngkeu motu'i?”

²⁰ Mia anu marepaako butu awu, ipopo'ooo aroano anu tesaa; onae nahi pokokaduduio koroino ke motae, ”Kombake anu a ngkae koanaku andio butu pegaupi?”

Ondae i Ue Puu Pontolosi Isaraeli 44:21-28

²¹ Pewowoloomo luwuno andio, hei Yako, hangano omuemo tetenaa-Ku, hei Isaraeli. Kuweweukomo, omuemo tetenaa-Ku; hei Isaraeli, omue nahi Aku kumolupeko.

²² Kupokotampulaomo luwuno salamu kana gawu luwuno halamu kana seru. Pepokulemo ndi Ongkue, hangano Kutolosikomo!

²³ Kokora-koraomo mawongko, hei langi, hangano moweweu Iramo i Ue, Kokora-koramo, hei pe'anakaano tolino! Kokora-koramo po'unde, hei luwuno torukuno, hei tobu ka luwuno keu i larono! Hangano i Yako Dotolosiomo i Ue, ka mopokitao maramba-Do i Isaraeli.

²⁴ Kanandiomo pau-Do i Ue, Puu Pontolosimu, anu weweuko mompu'u inso a mpe'anakaa; ”Ongkuemo Ue, anu mokogagio luwuakoano, anu asa-asa-Ku wileo langi, anu tumalesakono tolino nahina montuluni.

²⁵ Ongkuemo anu umoninio luwuno tondonino anu mpompau manasa nahi ta gagi ka memae-maeako ira mia hadio tino'orido; anu weweu ira mia pande mposongka nahi gagi, ka woliteo ponto'orido gagi benge-bengea;

²⁶ Ongkuemo anu mokorosoo pinauno tetenaa-Ku ka weweuo tinoo anu pinaleledo tinena-Ku; Ongkuemo anu mepau mongkona Yerusale: Moikoomo ipino'iangi! ka mongkona luwuno kotano Yehuda: Moikoomo iwinangu, Aku wali wanguo terawono!

²⁷ Ongkuemo anu mepau a ondaloano tahi: Gagimo motu'i, Aku mokomotu'i ira koronomiu!

²⁸ Ongkuemo anu mepau mongkona Koresi: Onae puu pompakambi-Ku. Luwuno po'ehe-Ku ta umihiio saru pauo mongkona Yerusale: Moikoomo iwinangu! Ka mongkona Raha Mempori: Moikoomo ipinundasi!”