Yesaya 43 - Wunta Mempori

Ondae i Ue , Puu Pongkadudui ka Pontolosi i Isaraeli

¹ Sine kanandio-andio, kanandiomo pau-Do i Ue anu mokogagiko, hei Yako, anu weweuko, hei Isaraeli, ”Siimo doito, hangano Kutolosikomo, Kupoboikomo a neemu, omue onaemo mia-Ku.

² Tewala omue sumaki molalo uwoi, Aku koa kumongkomiko, ke lumalo ira korono, nahi ta molomoko; tewala omue melempa molalo api, nahi ta mokomo'aiko, langano api nahi ta sumongkoko.

³ Hangano Ongkuemo Ue, Ue Alamu, Anu Tedoa Mempori, Ue Alado to Isaraeli, Puu Pongkaduduimu. Kupeweengakono Masiri gagi tolosimu, ka Etiopia saru Sieba gagi eumu.

⁴ Hangano omue mentudu ka maramba a pongkita-Ku ka Kupehohawako, onaemo ka Kupeweengakono mia gagi eumu, ka luwuno tongku gagi euno penaamu.

⁵ Siimo doito, hangano Ongkue kumongkomiko, Aku moweeakomu ana'uemu inso i sabaano oleo, ka pumpuko inso i sumooano oleo.

⁶ Aku mepauakono utara: Peweengakonomo! Ka a nselata: Sii ontoo! Wawa iramo ana-Ku tama inso a olaiano, ka ana-Ku beine inso a luwuno tompano tolino,

⁷ luwuno mia anu pinau mompake nee-Ku anu Kupokogagio tiano maramba-Ku, anu Kuweweuo ka Kupokogagio mbo'u!”

To Isaraeli gagi sakosii-Do i Ue 43:8-21

⁸ Po'aroomo tongku anu morawu maupo hinao matado, anu mobongo maupo hinao birido!

⁹ Impepumpumo luwuno tongku mperonga-ronga, impepumpumo luwuno suku tongku. Isemake i olodo anu polio pauo mongkona luwuno andio, anu mokopaleleo ndi ontae mongkona luwuno anu i ndi'ipua? Po'ineeomo domewawa ira sakosiido, ka imengkaa ondae mentee; po'ineeomo domerongeo mia ka dompotae, ”Mentee kanatuu!”

¹⁰ ”Omiumo sakosii-Ku,” kanandiomo pau-Do i Ue, ”ka tetenaa-Ku anu Kubinikiomo, ka imento'orio ka mpompe'ala-ala ndi Ongkue ka mpokonto'orio nine Ongkuemo Ondae. Se'eluno Ongkue nahina pinesombai wineweu, ka umarino Ongkue nahina mbo'u.

¹¹ Ongkue, Ongkuemo Ue ka nahina puu pongkadudui sangkadio Ongkue.

¹² Ongkuemo anu pauo, mongkadudui ka paleleo; ka nahina pinesombai susua i olomiu. Omiumo sakosii-Ku,” kanandiomo pau-Do i Ue, ”ka Ongkuemo Ue Ala.

¹³ Ka a mpotilalono Ongkuemo Onae, ka nahina anu mokompotolao inso a ngkae-Ku; Ongkue weweuo, isemake anu moko'ontoo?”

¹⁴ Kanandiomo pau-Do i Ue, Puu Pontolosimu, Anu Tedoa Mempori, Ue Alado to Isaraeli, ”Hangano omiu Akumo montena mia lumako i Babeli ka motii ira to Kasidimi gagi mia mpolai, luwuno a laro ngkapala tinondaako peraalido.

¹⁵ Ongkuemo Ue, Anu Tedoa Mempori, Mokolemiu anu mokogagio Isaraeli.”

¹⁶ Kanandiomo pau-Do i Ue, anu moweweu sala telalo a ntahi ka telaloa molalo uwoi anu mongkokodoito,

¹⁷ anu tumenaomo kareta ka ngara ka ipeluarako meteaa, saru mbo'u sorodadu anu moroso ka mosia; ondae ntepombole, nahi dompokompentade mbo'u, ondae memate, pinepate kana sumbu,

¹⁸ ”Siimo imerorambeo mongkona luwuno anu i ndi'ipua, siimo impekokoongakono mongkona luwuno anu inso a tempo se'eluno!

¹⁹ Kitao, Aku weweuo asa anu wo'ohu, anu kanandio-andio tuwuomo, naapoke imento'orio? Oo, Akumo moweweu sala i pada one ka hadio korono a mpada malua.

²⁰ Kondehora mo'ila ira mpelangkai Aku, serigala ka manu-manu unta, hangano Ongkue weweuo uwoi mesumpiri i pada one ka hadio korono a mpada malua, mopo'inu ira bawaa bininiki-Ku;

²¹ bawaa anu Kuweweuo tia-Ku ira mempaleleo telele-Ku.”

Ondae i Ue mekara-kara saru Isaraeli 43:22-28

²² ”Nahi upebooli ndi Ongkue, hei Yako, mentee ntu'u nahina mokendomu ndi Ongkue, hei Isaraeli.

²³ Nahi upowawa bimba pesomba tinunumu ndi Ongkue, ka nahi upelangkaia-Kune pesomba sinumbelemu. Nahi Kupopotembiakomu pesomba kaanga ke mokomokendoakomu dupa.

²⁴ Nahi upo'oliako salaka keuno padamalala mo'ahi woono tia-Ku, ke mokomowohia-Kune tabano pesomba sinumbelemu. Sine omue mopotembia-Kune halamu, omue mokomokendoa-Kune salamu.

²⁵ Ongkue, Ongkuemo Onae anu umoninio pe'ewamu hangano Ongkue-Ku, ka nahi Kupewowoloo halamu.

²⁶ Tuntu Akumo, aiwamo tompekara-kara. Pauomo luwuakoano, ka imengkaa menteemu!

²⁷ Uempu'umu anu amba-ambano tehalaomo, ka luwuno puu mpepaumu mpe'ewa iramo ndi Ongkue.

²⁸ Onaemo pu'uno, Aku weweu ira mokoburu petewawa mempori, ka meweengakono i Yako ka irinopu saru Isaraeli ka itinata.”