Yesaya 42 - Wunta Mempori

Penanino Tetenaa-Do i Ue 42:1-9

¹ Kitao, atuu tetenaa-Ku anu inini-Ku, mia bininiki-Ku, anu ndi onae Kupemoikoo. Kunaaomo Penaa-Ku ndi onae, ka ipokomengkaao songka a luwuno tongku.

² Onae nahi ta mebooli ke mokolangkaio suarano ke moporongeo suarano a nsala.

³ Balo anu telupe nahi ta umotuhio, sumbu anu mo'oro langano nahi ta mepateo; onae ta metenunu mokomengkaao songka.

⁴ Onae nahi ta gagi momite ka nahi ta telupe, ranta ka iteahakono songka i tolino; luwuno togo mpoperorohi pompaguruno.

⁵ Kanandiomo pau-Do Ue Ala, Ue, anu mokogagio langi ka wileo, anu tumalesakono tolino saru luwuno anu tuwu i wawono, anu moweeakono penaa a mia anu mo'iangario ka penaa ndi ondae anu mentuwu i wawono:

⁶ ”Ongkue, Ue, Kupoboikomo a laro menteea, Ku'iniomo kaemu; Kuweweukomo ka mokogagiko po'oloti pedandia tiado mia, mewineno luwuno tongku,

⁷ ka mowile mata anu morawu, ka moluarako mia hinuku inso a ntorungku ka luwuno mia anu mpentoro a wongi-wongiano inso a raha po'ukoa.

⁸ Ongkue Ue, onaemo nee-Ku; nahi Kupeweengakono maramba-Ku a nsusuaano ke telele-Ku a ntinaha.

⁹ Mongkona anu pinau i ndi'ipua kanandio-andio gagiomo mengkaa, mongkona anu wo'ohu Aku pauo. Se'eluno ipe'umbaako mongkona atuu, Aku mopoto'oriakomu.”

Po'unde-unde ndi Ondae i Ue anu gagi pongkiari 42:10-17

¹⁰ Penaniakonomo penani wo'ohu tia-Do i Ue ka unde-unde Iramo inso i tompano tolino, hei omiu anu mpetii a ntahi, hei luwuno ihino, luwuno togo saru luwuno palilino.

¹¹ Moikoomo ipokolangkaio pada one suarano saru luwuno kotano ka inia anu dompo'iangario to Kedari! Moikoomo domengkokora-kora palilino Pongku Watu, moikoomo dompeboo-booli inso a punsuno luwuno torukuno!

¹² Moikoomo dompelangkai Ira i Ue, ka mempaleleo maramba-Do a luwuno togo.

¹³ Ondae i Ue meluarako metea kana pongkiari, kana sorodadu Dopokingkio roso-Do metea; maroa Ondae kokora-kora, oo, mebooli Ira hio, a luwuno iwali-Do Dopokomengkaao pongkiari-Do.

¹⁴ Nahi Kupepau mompu'u i ndi'ipua, menoro-noro Aku, Kupeteao aroa-Ku; kanandio-andio Aku meraepi kana beine anu me'ana, Aku memuuli ka mewunsuli.

¹⁵ Aku mokolonda ira torukuno ka pongku, ka mokomoleuo luwuno pinopahono; Aku weweuo luwuno korono gagi wita motu'i ka mokomo'are ira limbo.

¹⁶ Aku tumaate ira mia memorawu a nsala anu nahi domento'orio, a pesalaa anu nahi domento'orio. Aku wawa ira mpelempa. Aku weweuo wongi-wongi i arodo gagi mewine ka wita anu mpebanga-bangano gagi wita anu merete. Mongkonamo anu kanatuu Aku weweuo ndi ondae, anu asalakono Aku weweuo.

¹⁷ Mia anu mompe'ala-ala a lahumoa pina'o ta mewolili i bungkuno ka mokoko'ii, kanatuumo mia anu mpotae a ntinaha tinawa, ”Omiumo pinesombaimami.”

I Isaraeli, tetenaa-Do i Ue anu morawu ka nahi gagi 42:18-25

¹⁸ Rongeomo, hei mia memobongo pengkitamo ka kitaomo, hei mia memorawu!

¹⁹ Isemake anu morawu sangkadio tetenaa-Ku, ka anu mobongo kana tinena anu tinena-Ku? Isemake anu morawu kana tinena-Ku morawu kana tetenaa-Do i Ue?

²⁰ Hadio anu kinitamu, sine nahi upekokoongakono, uta'oo birimu, sine nahi poronge.

²¹ Dopemoikoomo i Ue hangano moleo-Do ka ipinokomengkaa langkaino ntu'u ka marambano pompaguru-Do;

²² sine ondae asa tongku anu pinomuru ka rinontu, luwudo ntekonta a laro ngkineke ka mewinuni a laro raha po'ukoa; ondae megagi pomurua ka nahina anu motola ira, ka gagi rontua ka nahina anu motae, ”Pokuleomo!”

²³ Isemake i olomiu anu behe monta'o biri tiano mongkona andio, anu behe mompekokoongako ka merorongeakono tiano tempo anu ta hawe?

²⁴ Isemake anu meweengakono i Yako ka irinontu, ka i Isaraeli a anu mompomuru? Kombake Ondae i Ue isa'a? Hangano, mentehala kitamo ndi Ondae. Ondae nahi domebehe mentondao sala-Do, ka pompaguru-Do nahi dobehe merongeo.

²⁵ Onaemo pu'uno, Do'uwuo ndi onae mokulano tekuda-Do ka mongkokongirino peteaa, anu mokomo'aio inso a luwuno siuno, sine nahi pe'o'oleakono, ka anu tumunuo, sine nahi pekokoongakono.