Yesaya 41 - Wunta Mempori

Asa mia pompotola inso ndi Ondae i Ue 41:1-7

¹ Penoro-noromo, ronge Akumo, hei luwuno togo; po'ineeomo luwuno tongku mpohawe roso wo'ohu! Po'ineeomo dome'aiwa mperangkuhako, ka do'amba mpepau; moikoomo tomelako mperonga-ronga ka tompekara-kara!

² Isemake anu lumeluo onae inso i sabaano oleo, lumeluo onae anu mohawe ponangia a sompo pelempano, anu meweengako ira tongku i arono ka mokompetuundu ira mokole? Ponaino weweu ira kana pampawu, panano weweu ira kana seami anu tepuuri.

³ Onae lumulu ira ka telalo saru tekadudui, onae montonda sala anu napi hori lumandao karuno.

⁴ Isemake anu weweuo ka umanggao luwuno atuu anu inso i ndi'ipua moboi ira inule? Ongkue, Ue, anu tese'elu, ka saru ondae anu ntelembui; Ongkuemo Ondae.

⁵ Luwuno togo mengkitao ka gagi medoito, tompano mbo'u tolino mpondidi-ndidi; ondae mperangkuhako ka mehawe.

⁶ Anu asa mia tumulungio anu susua ka motaeakono walino, ”Pokorosoomo aroamu!”

⁷ Puu mpolabu mokorosoo aroano puu mpo'angga wulaa, mia anu mompokomedempe labu mompake palu mokorosoo aroano mia anu mompalu a wawo tondoha; mongkona hasilino pinotakono ipotae, ”moiko atuu,” ka i'amba mokorosoakono paso ka si telelu.

Ondae i Ue tumulungio i Ule-ule Isaraeli

⁸ Sine omue, hei Isaraeli, tetenaa-Ku, hei Yako anu bininiki-Ku, inuleno i Burahima anu pinehohawa-Ku;

⁹ omue anu Ku'alakomo inso i tompano tolino ka anu Kupoboikomo inso a luwuno siuno, Kupauakomu, ”Omue tetenaa-Ku, Kubinikikomo ka Kutarimako”;

¹⁰ siimo doito, hangano Ongkue kumongkomiko, siimo doito, hangano Ongkue andio Ue Alamu; Aku mokorosoko, tendeano Aku tumulungiko; Aku uminiakomu kae ngkoana-Ku anu mowawa ponangia.

¹¹ Menteeano, luwuno mia anu tekuda ndi omue ta pinokoko'ii ka kona mongkoko'iia; mia anu me'ewaio pinaumu ira mengkana nahina ka ira memate;

¹² omue ko'umungke ira mia anu mpe'u'ua saru omue, sine nahi kotepohaweako ira; mia anu mpetea umewaiko ta kana nahina ka mooa.

¹³ Hangano Ongkue, Ue, Ue Alamu, uminio kae ngkoanamu ka mepau ndi omue, ”Siimo doito, Ongkuemo anu tumulungiko.”

¹⁴ Siimo doito, hei tolodo Yako, hei ule-ule Isaraeli! Ongkuemo anu tumulungiko, kanandiomo pau-Do i Ue, ka anu tumolosiko onaemo Anu Tedoa Mempori, Ue Alado to Isaraeli.

¹⁵ Menteeano, Kuweweuko gagi dopi ponsesaa anu montaso ka wo'ohu, saru hadio ngisino. Omue kosumesa ira torukuno ka puro-puro ira, ka luwuno pongku mbo'u koweweu ira kana kulino pae.

¹⁶ Omue kodumuku ira, ka i'amba angi ta panee ira, ka angi mokora ta sumiarawo ira. Sine omue ko kokora-kora ndi Ondae i Ue ka telele ndi Ondae Anu Tedoa Mempori, Ue Alado to Isaraeli.

¹⁷ Mia memarasai ka mia memongkokolaro mpo'ungke uwoi, sine nahina, elodo motu'i mokoranga; sine Ongkue, Ue, Aku sumangki ira, Ongkue, Ue Alado to Isaraeli, nahi Aku binta ira.

¹⁸ Aku weweu ira korono mpepansari a wawo luwuno pongku anu londa, ka mata uwoi mebula-bulaka a ntongano bangano; Aku weweuo pada one gagi limbo ka weweuo uwoi mombusi-mbusi inso a wita motu'i.

¹⁹ Aku mompaho keu arasi i pada one, keu akasia, keu muradi ka keu lana; Aku motuwuo keu sanobari a mpada malua ka keu beranga saru keu cemara i horino,

²⁰ ka domengkitao luwuno mia ka mpokonto'orio, menootio ka tumo'orio, nine kae-Do i Ue anu weweuo luwuno andio ka Anu Tedoa Mempori, Ue Alado to Isaraeli, anu mokogagio.

Ondae i Ue umewaio luwuno lahumoa 41:21-29

²¹ Po'aroomo kara-karamu, pau-Do i Ue, pauomo hapa pongkorahakomu, pau-Do Mokoleno i Yako.

²² Po'ineeomo domelako ka domempauakami hapa anu ta gagi! Mongkona anu i ndi'ipua, pauomo hapa pengkonaano, ka kimpekokoongakono, ke mongkona anu ta hawe, paleleomo ndi omami, ka kimento'orio poko'ariano!

²³ Pauakamimo mongkona anu ta hawe lembuino, ka kimento'orio, nine omiu atuu pinesombai; oo, anggaomo hapa anu moiko ke anu mosa'o, ka kimperonga-ronga ntekokodoho mengkitao!

²⁴ Menteeano, omiu kana nahina ka luwuno wineweumiu mooa; mia anu biniki komiu mokoburu ntu'u.

²⁵ Kutenaomo asa mia inso i utara ka onae haweomo, asa mia anu ta mebooliako nee-Ku, inso a nsabaano oleo. Kana puu poweweu kuro mololanda wita pulu, kanatuumo onae ta lumolanda ira anu mempabawa kana rege.

²⁶ Isemake anu pauakono inso a pompu'uano, ranta ka kimento'orio, ka inso i ndi'ipua, onaemo ka kimpotae, ”Ondae mentee.” Mentee ntu'u, nahina mia anu pauakono, nahina mia anu paleleakono, nahina mia anu rumongeo pinaumu.

²⁷ Ongkue anu amba-ambano mepau ndi Sioni, ”Kitaomo ondae me'aiwa,” ka Ongkue moweeakono mia anu mowawa lele moiko a nto Yerusale.

²⁸ Ba tewala mengkita Aku limbu-limbu, nahina maupo te'asa mia, ka nahina i olodo pinesombai atuu anu mokompoweweu tinoo, ke anu mokosangkio tewala Kusikeno ira.

²⁹ Menteeano, luwudo kana nahina, luwuno wineweudo mooa, luwuno tinaha anu tinawado angi mooa.