Yesaya 40 - Wunta Mempori

LAMORO 40–66 TIANO KO'ORUA TEKADUDUIADO TONGKU ANU A LARO PONTADIA Lele tolaa 40:1-11

¹ Tarero iramo, tarero iramo bawaa-Ku, kanandiomo pau-Do Ue Alamu,

² pokorodoomo aroano Yerusale ka pebooliakonomo ndi onae, nine tepe'ataano tompaanomo, nine salano puuliomo, hangano montarimaomo pohuku inso a ngkae-Do i Ue meluka mpendua hangano halano.

³ Hinao suara anu meboo-booli, ”Patindaomo i pada one pesalaa-Do i Ue, pokoleoomo a mpada malua sala langkai pesalaa-Do Ue Alato!

⁴ Sompo lembono asalakono hinowui, sompo torukuno ka pongku pinokomerete; wita anu mepongku asalakono pinokogagi wita anu merete, wita anu mebanga gagi melembo,

⁵ asalakono maramba-Do i Ue ta pinokomengkaa ka luwuno mia ira mengkitao mperonga-ronga; mentee ntu'u, Dopauomo i Ue.”

⁶ Hinao suara anu mepau, ”Peboolimo!” Sangkiku, ”Hapake anu asalakono kupebooliako?” ”Luwuno mia kana ewo ka luwuno momoikono kana bunga a mpada.

⁷ Ewo gagi mokari, bunga gagi moleu, tewala Ondae i Ue mepuuriakono penaa-Do. Menteeano tongku atuu kana ewo.

⁸ Ewo gagi mokari, bunga gagi moleu, sine pau-Do Ue Alato kongko mpiha ranta nahina tampulaano.”

⁹ Hei Sioni, omue mowawa lele moiko, pewuatakomo a ntorukuno anu mantande! Hei Yerusale, omue mowawa lele moiko, pokolangkaio suaramu temeroku, pokolangkaiomo suaramu, si doito! Pauako iramo kotano Yehuda, ”Kitao, Ondaemo atuu Ue Alamu!”

¹⁰ Kitao, Ondae Ue Ala hawe saru roso ka saru kae-Do Dopokomengkaao pabawa-Do. Kitao, ondae anu megagi tambono pe'i'isei-Do kongko saru Ondae, ondae anu hinawe-Do mpelempa i aro-Do.

¹¹ Kana asa mia puu pompakambi Dopakambi ira bawaano pinotuwu-Do ka Dopumpuako ira kae-Do; ana bimba Do'awi ira, ineno bimba Dotaate ira.

Isema mengkenaako Ira i Ue ?

¹² Isema monsa'uako pelengkaeno uwoi ntahi ka langi isongkaakono otuweno, awu wita isa'uakono ponsa'u, luwuno torukuno itimbaakono neraca, ke luwuno pongku mompake pontimba?

¹³ Isema anu polio sumongkao Penaa-Do i Ue ke moweeako Ira pontiso gagi puu pompatudu-Do?

¹⁴ Ndi sema Ondae i Ue Dopo'ema patudu ka Dopohawe pompewowolo? Isema anu paguru Ira i Ue ka Dopolempao moleoa? Ke isema paguruako Ira ponto'ori ka moweeako Ira pontiso ka Dopoweweu mompake pompewowolo?

¹⁵ Menteeano, luwuno tongku onaemo kana asa iti uwoi a laro pontambu ka pinongkena kana asa labano pampawu a neraca. Menteeano luwuno togo nahi torea inso a mobeano awu motutu.

¹⁶ Libano nahi sompo pekeu ponahu ka kondehorano a ntobu nahi sompo tiano pesomba tinunu.

¹⁷ Luwuno tongku kana nahina i aro-Do, ondae Dotudu ira mooa ka nahina pengkonaano.

¹⁸ Gagi, saru isema komiu mpongkenaako Ira Ue Ala ka hapa anu komiu pokompengkenaako Ira?

¹⁹ Saru tinahake? Puu mpolabu anu weweuo, ka anu pande mo'angga wulaa umapiiakono wulaa, ka moweweu hadio rante salaka tiano.

²⁰ Mia anu mompotade tinaha keu, mobiniki keu anu nahi ronga mowuru, mo'ungke puu mpo'angga anu pande ntu'u ka ipontadeo tinaha anu nahi ta telelu.

²¹ Nahi mento'orioke? Nahi merongeoke? Nahi mempinauakoke inso amba-ambano? Nahi mento'orioke kana'umpe ininaa empehino tolino?

²² Ondaemo anu mo'ia i wawono longkuno tolino anu palilino kana kosume; Ondaemo anu wileo langi kana sawu ka pasao kana kema ka ipino'iangai!

²³ Ondaemo weweu ira anu langkai potorodo gagi nahina ka anu mokogagi ira puu mpobitara tolino nahina pengkonaano!

²⁴ Da saraipo domempinaho, da saraipo domerinawo, da saraipo sampa pinokompehakado mehaka a laro wita, Ondae tumampu'u mepuuri ndi ondae, ranta ka domemokari ka ipeneeakono angi mokora kana seami.

²⁵ Saru isema komiu mpongkenaa-Kune, kana ntu'u Ongkue mesongka saru onae? pau Anu Tedoa Mempori.

²⁶ Po'aroomo matamu i langi ka kitaomo: Isema anu mokogagio luwuno anano wula atuu ka wawa ira luwuno sorodadudo mpeluarako, saru moboio luwuno needo? Hangano Ondae tedoa pabawa ka tedoa moroso, nahina maupo te'asa anu nahi hawe.

²⁷ Tembio ka upepau kanatuu, hei Yako, ka mepau kanandio, hei Isaraeli, ”Tuwuku tewuni inso ndi Ondae i Ue, ka tiaku nahi Doperioo Ue Alaku?”

²⁸ Nahi uto'orioke, ka nahi urongeoke? Ondae i Ue atuu Ue Ala nahina tampulaa-Do anu mokogagio tolino inso i tompano hawe i tompano; Ondae nahi Domokendo ka nahi Domolema, nahi pinokonto'ori pompewowolo-Do.

²⁹ Anu mokendo Dopoweeakono roso ka tumiangio rosono anu nahi pokompelelu.

³⁰ Luwuno mia mongura gagi tedoa mpopemokendo, luwuno ana ntama kontuwuado ntebangku tetidu,

³¹ sine mia anu sumisikori Ira i Ue mohawe roso wo'ohu: ondae kana rajawali anu meneeako rosono panino; ondae mpelulu ka nahi domegagi molema, ondae mpelempa ka nahi domegagi mokendo.