Yesaya 39 - Wunta Mempori

I Hisikia ka mia tinena inso i Babeli

¹ I tempo atuu i Merodaki-Baladani anano i Baladani, mokole i Babeli, montena mia mowawa wunta ka pompowee ndi Hisikia, hangano irongeo nine i Hisikia mahaki sine waliomo tompa.

² I Hisikia mo'unde domehawe. Ipopokitaako ira raha langkai ponaapa arataano, wulaa ka salaka, rampa-rampa ka lana anu masuli olino, luwuno raha langkai ponaapa parewa mpeteano ka luwuno anu hina a laro mponaapa arataano. Nahina anu nahi popokitao i Hisikia ndi ondae moiko a langkanaeno maupo a luwuno wita pinabawaino.

³ Ka i'amba haweomo Nabi Yesaya ndi mokole Hisikia ka mesikeno ndi onae, ”Hapamoke anu mempinaudo mia andiodo? Inso isuake dome'aiwa?” Sumangki i Hisikia, ”Ondae me'aiwa inso i wita anu olai, inso i Babeli!”

⁴ Isikenoo mbo'u, ”Hapake anu domengkitaomo a langkanaemu?” Sumangki i Hisikia, ”Luwuno anu hina a langkanaeku domengkitaomo. Nahina anu nahi kupopokitaako ira a mponaapa arataaku.”

⁵ Ka i'amba motae i Yesaya ndi Hisikia, ”Rongeomo pau-Do Ueno luwuakoano!

⁶ Menteeano, tempono ta hawe, luwuno anu hina a laro langkanaemu ka anu ninaado uempu'umu hawe oleo andio ta winawa i Babeli. Nahina anu ta bininta, kanandiomo pau-Do i Ue.

⁷ Asa ntia inso a inulemu anu ta hinawemu ira me'inala gagi pegawai langkanaeno mokole i Babeli.”

⁸ Sumangki i Hisikia ndi Yesaya, ”Moiko ntu'u pau-Do i Ue anu pinaumu atuu!” Sine pinewowolono, ”Polo ka ihina manangai ka rodoa asa ntinuwuku!”