Yesaya 38 - Wunta Mempori

I Hisikia mahaki ka pinokotompa

¹ I tempo atuu i Hisikia mahaki ka tedeipo imate. Nabi Yesaya anano i Amosi aiwa ka ipotae ndi onae, ”Kanandiomo pau-Do i Ue: pobintamo pe'oliwi a nsomborimu, hangano omue komate, nahi kotompa mbo'u.”

² I Hisikia wolilio rupano me'aro a rere ka mekakai ndi Ondae i Ue.

³ Ipotae, ”Oo, Ue, po'ineeomo ka Irambeo nine tuwu akumo metenunu i aro-Miu ka inso a moputeno aroaku; moweweu akumo hapa anu moiko a pongkita-Miu.” Ka i'amba i Hisikia mengese tedoa mompemasusa.

⁴ Haweomo pau-Do i Ue ndi Yesaya,

⁵ ”Lakomo ka pauakonomo i Hisikia: Kanandiomo pau-Do i Ue, Ue Alano i Daudi, uempu'umu: Kurongeomo pekakaimu ka Kukitaomo uwoi matamu. Menteeano Aku mokomelaio tumuwumu hopulu ka olima nta'u mbo'u.

⁶ Aku motolako ka kota andio inso a ngkaeno mokoledo to Asiuri ka Aku walao kota andio.

⁷ Ndiomo anu ta gagi petondoni inso ndi Ondae i Ue nine Ondae i Ue Ira weweuo hapa anu Dodandiomo:

⁸ Menteeano, eo-eo a mpontiso mata oleo wineweuno i Ahasi Aku weweuo mosuka hopulu laampa'a i bungkuno inso a olono anu ipelempaiomo.” A mpontiso mata oleo atuu wantano oleo mbo'u mosuka i bungkuno hopulu laampa'a inso a olono anu ipelempaiomo.

⁹ Powadino i Hisikia, mokoledo to Yehuda, umarino mahaki ka tompa inso a hakino;

¹⁰ Ongkue andio motae: A entongano tinuwuku asalakono aku lumako, a mpewowa langkaino tolinodo mia mate ongkue tinantuako a ntoreano tinuwuku.

¹¹ Kupotae: nahi aku kumita Ira mbo'u i Ue a witado mia mentuwu; nahi aku mongkita mbo'u maupo te'asa mia i olodo palilino tolino.

¹² Laika po'iangaku rinongka ka linimba kana kemano puu pompakambi; tuwuku pinalulu kana sawu hinoru, Dopoleio kana toreano bana hinoru. Meene wongi Ipo'inee aku,

¹³ mebooli aku mepetulungi hawe mo'oru; kana singa kanatuumo Dopuro-puroo i Ue luwuno wukuku; meene wongi Ipo'inee aku.

¹⁴ Kana manu-manu wowitu kanandiomo kupepiuli, suaraku nahi meroku kana suarano marapatii. Mataku mokendo mentombu i wawono, oo Ue, ongkue tepokonsii; gagimo pe'iniaku!

¹⁵ Hapake anu aku mokopauo ka kupauo ndi Ondae i Ue? Komba Ondaemoke anu weweuo? Molehako nahi kupompokoturi hangano maparino tuwuku.

¹⁶ Oo Ue, hangano ndiomo aroaku merorohi Komiu; pokorodoomo aroaku, pokomadoo aku, po'ineeomo ka kukongko tuwu!

¹⁷ Menteeano, pompemarasai anu pinembasaiku gagiomo tekaduduiaku; Ipe'eheo ntu'u sumangaku tola inso a masolaa. Mentee ntu'u, Itadiomo luwu halaku inso i aro-Miu.

¹⁸ Hangano, tolinodo mia mate nahi poko'unde-unde Komiu, ka matea nahi poko'umunde-unde komiu; luwuno mia anu metii a laro ngkaburu nahi ponsikori petenunu-Miu.

¹⁹ Sine mia anu tuwu, oo butu koa mia tuwu anu moko'unde-unde komiu, kana ongkue oleo ndio; petenunu-Miu ipauakono ama a luwuno anano.

²⁰ Ondae i Ue memoikoo kumadudui aku! Aiwamo to mpo'unio katapi, asa ntinuwuto a Raha-Do i Ue.

²¹ Ka i'amba motaeomo i Yesaya, ”Moikoomo i inala asa laba wua ara motu'i ka hinahiako a mpiho atuu ka itompa!”

²² Se'eluno i Hisikia motaeomo, ”Hapeke anu ta gagi petondoni nine aku lumako i Raha-Do i Ue?”