Yesaya 37 - Wunta Mempori

Yerusale tola inso a ngkaeno i Saniheri

¹ Umarino rumongeo mokole Hisikia mongkona atuu, iberio sangkano ka koroino isoumbuakono sawu po'inombo, ka i'amba mewinso a raha-Do i Ue.

² Ka i'amba tumenao i Eliaki, petewawa poparentaa, i Sebina, puu mpoburi a poparentaa, ka mia pinemota'u i olodo sando mpesomba, saru mpesoumbuako sawu po'inombo, ntepohaweakono nabi Yesaya anano i Amosi.

³ Dompotae ndi onae, ”Kanandiomo pauno i Hisikia: Oleo andio oleo ma'isoa, oleo pohukua ka pompokongkodeia; hangano haweomo tempono ta me'ana, sine nahina rosono ta me'ana.

⁴ Bara'ura Dorongeomo i Ue, Ue Alamu, pauno i rabi-sakehi atuu anu tinenano mokoledo to Asiuri, ueno, ka itata Ira Ue Ala anu tuwu, ranta Ondae i Ue, Ue Alamu Ira moweeakono pohuku hangano luwuno pau anu Dorongeomo. Moikoomo upekakaiako ira anu da mentuwu anu da ntebinta andio!”

⁵ Tempono luwuno pegawaino mokole Hisikia hawe ndi Yesaya,

⁶ motaeomo i Yesaya ndi ondae, ”Pauakonomo uemiu kanandio: Kanandiomo pau-Do i Ue: Siimo doitoakono pau anu rinongemu anu pinaudo atano mokoledo to Asiuri ka dompepaukia-Kune.

⁷ Menteeano, Aku numaao asa penaa a ngkoroino, ranta ka iporonge lele nahi mentee ka ipekule i witano. Aku weweuo ka imate tebangkuako ponai i witano onaeno.”

⁸ Tempono ipekule i rabi-sakehi atuu, ihaweo mokoledo to Asiuri metea umewaio Libina. Hangano, irongeo nine melungkaomo mokole inso i Lakisi.

⁹ Kontongaano atuu mokole moronge lele mongkona i Tirihaka, mokoledo to Etiopia, kanandio, ”To'oriomo Ondae meluarako Iramo metea umewaiko.” Rumongeo mongkona atuu, itena ira mia melako ndi Hisikia saru pe'oliwi,

¹⁰ ”Kanandiomo asalakono imempauakono i Hisikia, mokoledo to Yehuda: Siimo Dopopandeiko Ue Alamu anu pinerorohimu atuu saru medandi: Yerusale nahi ta pineweengako a ngkaeno mokoledo to Asiuri.

¹¹ Menteeano, omue isa'a rumongeo mongkona anu wineweudo mokoledo to Asiuri a luwuno wita nine domeropu iramo. Kana'umpe pesalaano omue kopinotola?

¹² Tongku anu merinopudo uempu'uku, Gosani, Harani, Resepi, ka inuleno i Edeni anu i Telasari, nde hori irake pinesombaido mpotola ira?

¹³ Mokoleno wita Hamati, mokoleno wita Aripadi, mokoleno kota Separawaimi, mokoleno wita Hena, ka mokoleno wita Iwa, isua ira?”

¹⁴ I Hisikia tumarimao wunta atuu inso a ngkaedo mia tinena ka ibasao. Ka i'amba lumako a raha-Do i Ue ka iwileo wunta atuu i aro-Do i Ue.

¹⁵ I Hisikia mekakai i aro-Do i Ue, kanandio,

¹⁶ ”OoUeno luwuakoano, Ue Alado to Isaraeli anu mo'ia a wawo kerubi! Butu koa Omiu Ue Alano luwuno poparentaa i tolino. Omiumo anu mokogagio langi ka tolino.

¹⁷ Ipo'aroomo biri-Miu, oo Ue, ka Irongeomo. Iwileomo mata-Miu, oo Ue, ka Ikitaomo. Irongeomo luwuno pinauno i Saniheri anu i'oliwiomo mokongkodei-Komiu Ue Ala anu tuwu.

¹⁸ Oo Ue, lano luwuno mokoledo to Asiuri domeropu iramo luwuno tongku ka luwuno witado

¹⁹ ka numaa ira pinesombaido a laro api, hangano ondae komba Ue Ala, butu wineweuno kaeno mia, butu keu ka watu, onaemo ka domempinokotampula.

²⁰ Onaemo pu'uno, oo Ue, Ue Alamami, Ikadudui kamimo inso a ngkaeno, kai to'orio luwuno poparentaa i tolino nine butu koa Omiu Ue.”

²¹ Ka i'amba i Yesaya anano i Amosi montena mia tepohaweakono i Hisikia saru pe'oliwi, ”Kanandiomo pau-Do i Ue, Ue Alado to Isaraeli: hangano mekakaikomo ndi Ongkue mongkona i Saniheri, mokoledo to Asiuri,

²² ndiomo pau anu Dopauomo i Ue mongkona onae: Ana beine Sioni, ana beine atuu, ipokongkodeikomo, ipasinggiriko. Ana Beine Yerusale bitu-bitu uluomo i bungkumu.

²³ Isemake anu pinokongkodeimu ka pinepaukiakomu? Te'aro ndi semake upokomerokuo suaramu ka mengkita saru mompelangka-langkai? Te'aro ndi Ondae Anu Tedoa Mempori, Ue Alado to Isaraeli!

²⁴ Molalo luwuno tinenamu upokongkodei Iramo i Ue. Upotae, ’Saru hadiono karetaku ongkue mewuatako a luwuno po'ianga mantande a mentorukuno, a mpo'ianga anu lalu olai i torukuno Libano; kutuehi ira keu arasino anu me'ondau ka langkai, keu sinobarino anu tebiniki; hawe akumo a punsuno anu lalu mantande, a ntobuno anu mokapa.

²⁵ Mongkeke akumo ka mo'inu uwoi i witado mia susua kupokomo'areakonomo pelengkaruku luwuno korono i masiri!’

²⁶ Kombake urongeomo nine Kutantuiomo mompu'u da olai tempono? Kupewowoloomo inso a tempo se'eluno, ka kanandio-andio Kupokogagiomo; omue weweu ira kota pekorahakoa boni-boni, gagi howuno anu terawo,

²⁷ ka palilino nahina rosodo gagi ntededengke ka mokoko'ii. Ondae megagi kana pinopaho a ntongampada kana ewo molowulu, kana ewo a wawo ato, anu moleu hangano angi i sabaano oleo.

²⁸ Kuto'orio pentoromu ke pentademu, peluarako ka pewinsomu, pomemuno tekudamu ndi Ongkue.

²⁹ Hangano momemukomo ndi Ongkue, ka pompelangka-langkaimu mewuatakoomo hawe a biri-Ku, Aku mokonao kai-Ku a engemu ka sama-Ku a ngangamu. Aku mokuleko telalo a nsala inso isua u'aiwa.

³⁰ Ndiomo anu ta gagi petondoni ndi omue, Hisikia: I larono ta'u andio mia mpongkaa hapa anu tuwu onaeno, ka i larono ta'u ko'orua, hapa anu tuwu inso a mpinopaho anu amba-ambano. Sine, i larono ta'u ko'otolu, imporawomo inii, imensowimo, impoweweumo lere anggoro, ka impongkaamo wuano.

³¹ Mia anu mentola i olodo suku Yehuda, anu da ntebinta, ira mpehaka mbo'u i totono ka mehasiliako wua i wawono.

³² Hangano, inso i Yerusale ira mpeluarako mia anu ntebinta ka inso a ntorukuno Sioni mia anu mentola; mahakino aroa-Do Ueno luwuakoano Ira weweuo mongkona andio.

³³ Onaemo pu'uno, kanandiomo pau-Do i Ue mongkona mokoledo to Asiuri. Onae nahi ta mewinso a ngkota andio ka nahi ta mompotola ana mpanano te'aro i ndi'ai. Onae mbo'u nahi ta aiwa saru kanta ka nahi ta mohowu wita gagi rere pongkadua.

³⁴ Onae ta mekule telalo a nsala tempono i'aiwa, sine a ngkota andio nahi ta mewinso, kanandiomo pau-Do i Ue.

³⁵ Aku walao kota andio ka itekadudui, hangano Ongkue ka hangano i Daudi, tetenaa-Ku.”

³⁶ Ka i'amba meluarakoomo Mala'eka-Do i Ue ka mepateo asa etu halo pulu ka olima nsowu mia a mpekemaado to Asiuri. Tisomono, tempono dompewangu mia mo'oru, tengkitaomo luwuno gagiomo wata ngkoroi!

³⁷ Onaemo ka ipelungka mekule i Saniheri, mokoledo to Asiuri ka mo'ia i Niniwe.

³⁸ Pohona tempono ipekakai a laro raha po'iangano Nisiriroki, pinesombaino, i Adarameleki ka i Sareseri anano, mepateakono ponai. Ka do'amba molai i wita Arara. Ka i'amba i Esaradoni, anano, gagi mokole umeuo.