Yesaya 36 - Wunta Mempori

LAMORO 36–39 I YESAYA TEMPONO MOKOLE HISIKIA Yerusale ikaduo i Sanaheri, mokoledo to Asiuri

¹ A nta'u kohopulu ka opaa poparentaano mokole Hisikia lumakoomo i Sanaheri, mokoledo to Asiuri, sumapoio luwuno kota pekorahakoa i Yehuda, ka ipongko'alao.

² Mokoledo to Asiuri tumenao asa mia rabi-sakehi inso i Lakisi lumako i Yerusale ndi mokole Hisikia saru bawaano sorodadu anu langkai. Onae mo'ala po'ianga umpeda pangkorono limbo i wawono a nsala langkai a Mpada Penatu.

³ Ka i'amba i Eliakimi anano i Hilikia, petewawa langkanae, meluarako tepohaweakono, meronga saru i Sebina, puu mpoburi a poparentaa, saru i Yoahi anano i Asapi, puu pompekaria arataano poparentaa.

⁴ Motae i rabi-sakehi atuu ndi ondae, ”Pohaweomo ndi Hisikia: Kanandiomo paudo mokole langkai, mokoledo to Asiuri: Pompe'ala-ala hapa andio anu ininimu?

⁵ Potaemu pinauno wiwimokoa gagiomo akala ka roso a mpeteaa! Kanandio-andio isema pinerorohimu, ranta ka u'ewa ndi ongkue?

⁶ Kitao, omue merorohio Masiri, tuko balo anu tepudu atuu, anu ta dumuhuo ka lumompahio kaeno mia anu metumbo ndi onae. Kanatuumo teweweuno i Pirao, mokole i Masiri, a luwuno mia anu merorohio.

⁷ Ke bara'ura komotae ndi ongkue: Omami mpomperorohi ndi Ondae i Ue, Ue Alamami. Kombake Ondae atuu anu luwuno po'iangano pesombaa ndi Ondae ka luwuno meda pontunua pesomba ndi Ondae ipoko'olaiomo i Hisikia? Kombake onae motaeakono Yehuda ka Yerusale: Butu i arono meda pontunua pesomba andio omiu asalakono mpenggolontu mpesomba!

⁸ Kanandio-andio, impeta'omo saru ondae ueku, mokoledo to Asiuri; Aku moweeakomu rua nsowu ngara, poolo inso ndi omue upolio meweengako ira mia anu mokompesawikio.

⁹ Kana'umpe ka upolio monsaari asa mia petewawa sorodadu i olono atado ueku maupo anu lalu kodei? Kahinaano omue momperorohi Masiri ka upohawe kareta ka sorodadu mpengara!

¹⁰ Ka mbo'u, nahike saru Ondae i Ue kulako umewaio wita andio ka kuropuo? Ondae isa'a i Ue mepau ndi ongkue: Lakomo sapoio wita atuu ka ropuomo!”

¹¹ Ka i'amba motaeomo i Eliaki, i Sebina ka i Yoahi ndi rabi-sakehi atuu, ”Pepaumo a mpau Arami a atamiu andiodo, hangano kimento'orio. Sine siimo ipepauakami a mpau Yehuda kontongaado merongeo palili anu mekongko a wawo rere watu.”

¹² Sine i rabi-sakehi atuu motae, ”Nde butu ndi uemiu ka ndi omiuke dotena aku ueku ka kupauo luwuno pau andio? Kombake saru mbo'u a mia anu mpentoro a wawo rere watu, anu kumaano ta'ido ka uminuo emedo saru omiu?”

¹³ Ka i'amba i rabi-sakehi atuu mentadeomo ka ipebooli meroku a mpau Yehuda, ipotae, ”Rongeomo paudo mokole langkai, mokoledo to Asiuri!

¹⁴ Kanandiomo paudo mokole: Siimo ipopandei komiu i Hisikia, hangano onae nahi polio motola komiu!

¹⁵ Si mpo'ineeo i Hisikia popandei komiu ka impomperorohi ndi Ondae i Ue ka ipotae: Ondae i Ue manasa Ira motola kita; kota andio nahi ta pineweengako a ngkaeno mokoledo to Asiuri.

¹⁶ Si merongeo i Hisikia, hangano kanandiomo paudo mokoledo to Asiuri: Poweweumo pedandia sintuwu saru ongkue ka peluarakomo tepohaweakune, asalakono sompo mia inso i olomiu ta mongkaa inso a ngkeu anggorono ka keu arano saru mo'inu inso a nsumuruno,

¹⁷ ranta ka kuhawe ka wawa komiu a asa wita kana witamiu, wita anu hinao gandu ka uwoi anggoro, wita anu hinao lere anggoro ka roti.

¹⁸ Ka si mansa popandei komiu i Hisikia ka ipotae: Ondae i Ue Ira motola kita! Nde mehori irake pinesombaido tongku singge mpopotola witado inso a ngkaeno mokoledo to Asiuri?

¹⁹ Isua iramoke pinesombai i wita Hamati ka Aripadi? Isua iramoke pinesombai i wita Separawaimi? Nde dompotolaomoke Samaria inso a ngkaeku?

²⁰ Isemake i olodo luwuno pinesombai i wita andio anu motolaomo witado inso a ngkaeku, ranta ka Dopolio i Ue motolao Yerusale inso a ngkaeku?”

²¹ Sine luwuno mia mperodo-rodo ka nahi domesangkio maupo te'asa mpudu pau, hangano hinao parentano mokole, unino, ”Si mesangkio!”

²² Ka i'amba lumakoomo i Eliakimi anano i Hilikia, petewawa langkanae ka i Sebina, puu mpoburi a poparentaa, ka i Yoahi anano i Asapi, puu pompekaria arataano poparentaa, me'aro ndi Hisikia, saru sangka anu bineri, ka i'amba pauako ira mokole pauno i rabi-sakehi atuu.