Yesaya 35 - Wunta Mempori

Tekaduduiado bawaa-Do i Ue 35:1-10

¹ Pada one ka wita motu'i ta mo'unde, pada malua ta kokora-kora ka mensisi;

² kana bunga rosi onae ta marombo sisino, mengkokora-kora, oo mengkokora-kora ka maroa mengkokora-kora. Marambano Libano ta wineeako ndi onae, mewantano Karameli ka Saroni; oo, ira mengkitao maramba-Do i Ue, mewanta-Do Ue Alato.

³ Pokorosoomo kae anu molema ka pokorosoomo olontuu anu leedu.

⁴ Pauako iramo mia anu motewe aroado, ”Impokorosoo aroamiu, siimo imedoito! Kitaomo, Ondae Ue Alamiu Ira hawe saru pombaloa, saru pohuku-Do Ue Ala. Ondae isa'a hawe kumadudui komiu!”

⁵ I tempo atuu matano mia morawu ta pinokotompa, ka birino mia mobongo ta moronge.

⁶ I tempo atuu mia pungku ta melonso-lonso kana rusa ka ngangano mia bebe ta kokora-kora; hangano mata uwoi mesumpiri i pada one, ka korono a mpada malua.

⁷ Wita me'one anu mokula-kula ta gagi limbo, ka wita londa gagi insoano uwoi; a mpepomboleano serigala ta tuwu intowu ka tole balaba.

⁸ I ra'ai ta hina sala langkai, anu nineeako Sala Mempori; mia anu nahi mempori nahi ta lumaloo, – sine sala atuu pinatindaako bawaa-Do – mia mpelakopi ka maupo mia benge-benge nahi ta tesaa i wawono.

⁹ I ra'ai nahi ta hina singa, kondehora lambaha nahi ira ntelaloio ka nahi ta hinawe i ra'ai; sine mia anu mentinolosi ira mpelempa i ra'ai,

¹⁰ mia anu mempinotola-Do i Ue ira mpekule ka mpewinso i Sioni saru mengkokora-kora, po'unde nahina tampulaano ta gagi peramba-ramba uludo; mawongkoa ka po'unde ta buke ndi ondae, masusa ka pompemasusa me'olaiako.