Yesaya 34 - Wunta Mempori

Pohuku a nto Edomi ka luwuno tongku 34:1-17

¹ Ime'umpedamo, hei luwuno tongku, rongeomo, ka pekokoongakonomo, hei luwuno suku tongku! Moikoomo irongeo tolino saru luwuno ihino, wawontolino ka luwuno anu tuwu i wawono.

² Hangano Ondae i Ue tekuda a luwuno tongku, ka tekuda Ira ntu'u a luwuno sorodadudo. Dopesusua ira ka domerinopu ka Dopeweengako ira ka domensinumbele.

³ Miano anu memate pinepate ira mempinetadiako, ka inso a wata ngkoroido ta meluarako woo mana moboo; luwuno torukuno mowoako reado.

⁴ Luwuno anano wula ta terawo-rawo, ka langi ta pinalulu kana paluluno wunta, luwuno sorodadudo ira merumonta kana lewe anu moleu inso a ngkeu anggoro, kana wua ngkeu ara anu mokari.

⁵ Hangano ponai-Ku anu i langi molanguakoomo rea, kitao, onae metii bitarao Edomi, tongku anu Kupesusuao ka irinopu.

⁶ Ondae i Ue hinao asa ponai-Do anu meremuako rea ka tewaluleako taba: reado ana bimba ka bembe lakino saru tabano wua horido bimba lakino. Hangano Ondae i Ue moweweu ponsumbelea pesomba i Bosora ka ponsumbelea langkai i wita Edomi.

⁷ Bante ira memate tebangku mperonga bimba ka bembe atuu, ka luwuno sapi lakino anu mongura meronga sapi lakino anu mota'u, luwuno wita ta molanguako rea, ka witado tewaluleako taba.

⁸ Hangano Ondae i Ue pakosio asa oleo pombaloa ka ta'u pohukua umalaakono Sioni.

⁹ Luwuno korono i Edomi ta bali gagi tere, ka witano gagi walira; witano ta gagi tere anu kolanga-langa.

¹⁰ Meene wongi wita atuu nahi ta mate apino, ahuno membombo ranta nahina tampulaano. Wita atuu ta gagi terawo-rawo hawe a luwuno inule, nahi ta hori hina mia telaloio.

¹¹ Manu-manu undani ka landa anu ira mpo'iangario, manu-manu koa ka manu-manu paa-paa anu ira mpo'ia i larono. Ondae i Ue Ira mompadindiakono koloro posongka powawa marisua ka watu pompokomobea ka imooa.

¹² Luwuno mia pinemota'uno ira mempaleleo, ”Nahina mokole i ra'ai!” luwuno petewawano tampulaomo.

¹³ Ewo rui ira mentuwu a luwuno benteno, ewo ka rui a luwuno bente pekorahakoano, ranta ka igagi po'iangado serigala, ka tanalapado manu-manu unta.

¹⁴ I ra'ai kondehora pada one ntepohawe saru dahu mo'ila, ka bembe mesarungka tepohaweakono walino; koa wongi hinao mbo'u i ra'ai ka mohawe po'iangga penaa-naa.

¹⁵ I ra'ai ule me'ipo mpeseno ka mpesu'ului, mpo'opoti ranta mewotuo su'uluido; manu-manu paa-paa mpepumpu mbo'u i ra'ai, ka singge saru tarono.

¹⁶ Ungkeomo a laro wunta-Do i Ue ka basaomo: Nahina maupo te'asa inso a luwuno anu tuwu atuu linalo ka nahina anu tai nahi tarono; hangano kanatuumo parenta anu meluarako inso a nganga-Do Ue, ka Penaa Ondae-Do pumpu iramo.

¹⁷ Ondae isa'a montende Iramo undi ka tumia-tiaakono koloro posongka wita atuu i olodo; ira mpentorokio ranta nahina tampulaano ka ira mpo'ia i tu'ai ranta mapa'api-api inule.