Yesaya 33 - Wunta Mempori

Ondae i Ue gagi puu pongkadudui ka mokole i Sioni 33:1-24

¹ Masolakomo ntu'u, hei anu monsolangi anu napi sinolangi, ka omue, hei puu mporuntu anu napi rinontu! Tewala umarikomo monsolangi, omue isa'a kosinolangi; tewala omue umari morontu, omue isa'a korinontu.

² Oo Ue, Ipehohawa kami, Omiu sinisikorimami! Igagimo kae pongkongkomimami sompo mo'oru, ka tekaduduiamami i tempo ma'isoa!

³ Tempono teronge suara rurundu mpolai iramo tongku, tempono Ipentade ntesiarawo iramo suku tongku.

⁴ Mia mpopumpu pinomuru kana kosume modoko mongkaa montele kaangano; domensapoio kana ponsapoino bawaano kosume.

⁵ Ondae i Ue tedoa mantande, hangano Ondae mo'ia a mantandeano; Sioni Dopokobukeakono moleoa ka menteea.

⁶ Ta hawe tempo rodoamu, hadio ntu'u tekaduduia, ponto'ori anu mentee ka ponto'ori. Doitoako Ira i Ue, onaemo arataa kaeano Sioni.

⁷ Kitao, miano i Arieli mperaali a nsala, anu mentinena mpo'ema manangai mpengese mpopemasusa.

⁸ Luwuno sala langkai gagi boni-boni ka mia mpelakopi nahina mbo'u. Pedandia hinapuomo, luwuno sakosii nahina tinarima, ka mia nahi tinudu.

⁹ Wita mo'inombo ka me'i'isei; Libano montembi pontata ka gagi telusa; Saroni gagiomo kana pada malua, Basani ka Karameli rumonta leweno.

¹⁰ Kanandio-andio, Aku mentade, pau-Do i Ue, kanandio-andio, Ongkue mo'ia a mantandeano ntu'u, kanandio-andio, Ongkue pinokomantande!

¹¹ Omiu mementiaako ewo mokari, ka komiu mpe'anaako seami; tekudamiu onaemo api anu kumaakomiu.

¹² Tongku ira mentinunu gagi kapuru, ira mentinunu a laro api kana poleno ewo rui.

¹³ Hei mia anu me'olai, rongeomo hapa anu Kuweweuomo, hei mia anu me'umpeda, to'oriomo moroso-Ku!

¹⁴ Mia mentehala ntededengke i Sioni mia anu mpebungkui Ira i Ue ipabawai ira doitoa. Dompotae, ”Isemake i oloto anu polio mo'ia umpeda api anu mompokomo'ai andio? Isemake i oloto anu polio mo'ia umpeda a pompotuwua api anu nahina tampulaano andio?”

¹⁵ Mia anu tuwu a laro menteea, anu mepau a menteeano, anu nahi pontarima untu hasilino pompokonsiia, anu metapisakono kaeno, ka si pontarima pompowee nahi pototono, anu umonsoo birino, ka si rongeo tinoo po'uwua rea, anu mepusu, ka si kitao wineweu mosa'o,

¹⁶ onaemo kana mia anu mo'ia rodo a mpo'ianga mantande, benteno mo'ia a pongku watu anu melaapimpi; rotino wela tetinda, uwoi inuano sompo.

¹⁷ Matamu ta kumitao mokole a laro marambano, ta kumitao wita anu tewile malua.

¹⁸ Aroamu ta rumambeo mongkokongiria anu umariomo, ”Isuake puu mpodoa, isuake puu mpontimba, ka isuake mia anu dumoa ira menara?”

¹⁹ Nahi kokumitao mbo'u tongku anu nahi ponto'ori gau atuu, tongku anu pepauno nahi mengkaa menteeno, nahi tino'ori, anu pepauno montala'u'u, nahi pinokonto'ori.

²⁰ Kitaomo Sioni, kota tepumpua langkaito! Matamu ta kumitao Yerusale, po'ianga anu rodo, kema anu nahi pelimba-limba, pandorano kongkono mpiha nahi binuta, ka luwuno kolorono nahi ta tebite.

²¹ I ra'ai Ondae i Ue atuu maramba Ira ntu'u ndi ontae, kana po'ianga bukeako korono ka waaano anu malua; nahi telaloio bangka binose, ka nahi sakio kapala langkai.

²² Hangano, Ondaemo i Ue puu mpobitarato, Ondaemo i Ue tadulako sorodaduto; Ondaemo i Ue mokoleto, Ira kumadudui kita.

²³ Luwuno koloromu luntuomo, nahi pokotanggoo moroso karuno somba a mpo'iangano, nahi pokowileo somba. I tempo atuu mia ira mpetia-tiao hadio rinontu, ka maupo mia pungku ta mo'ala pinomuru.

²⁴ Nahina maupo te'asa mia anu mo'ia i ra'ai ta motae, ”Ongkue mahaki,” ka luwuno palilino ta inampuni salano.