Yesaya 32 - Wunta Mempori

Poparentaa anu moleo 32:1-8

¹ Menteeano, asa mokole ta moparenta montonda menteea, ka luwuno petewawa ira mpetewawa montonda moleoa,

² ondae singge mia ta kana po'ianga mererei a angi ka po'ianga mererei a angi mokora, kana waaano uwoi a motu'iano, kana po'engoino asa watu langkai a wita anu londa.

³ Matano mia ta mongkita nahi ta tetutuwi mbo'u, ka birino mia anu moronge ta menootio.

⁴ Aroano mia anu madara ta monto'ori montimbanga ka elono mia anu montala'u'u ta mokompepau moiko.

⁵ Mia monge-monge nahi ta pinau mbo'u mia moiko peleluno, ka anu mompopo'oo nahi ta pinau mbo'u mia pinelangkai.

⁶ Hangano mia monge-monge mompau monge-mongeno, ka aroano montoo anu mosa'o; onae moweweu gau mosa'o ka mompau anu mompokopansia mongkona Ondae i Ue, mo'ineeo kompono mia mokoninggo mooa mpiha ka mia mokoranga nahina inua.

⁷ Pompopo'oodo anu mpopopo'oo mosa'o ntu'u, luwuno tinoono mokoburu ta sumolangiakono ira pau mpegaupi mia marasai, maupo mia mongkokolaro tumeahakono tiano.

⁸ Sine mia me'aroa moiko montoo anu moiko, onae wela sumu'uo luwu anu moiko.

Pepopoto'ori ka pomuleano Yerusale 32:9-20

⁹ Hei beine anu mentuwu rodo, impewangumo, rongeomo suaraku, hei nana'ote beine anu mentuwu nahina monsosanggoli, pekokoongakonomo pinauku!

¹⁰ I larono asa nta'u torea, komiu mpondidi-ndidi, hei mia anu mentuwu nahina monsosanggoli, hangano po'opua wua anggoro nahi gagi, ka nahina po'opua anu susua mbo'u.

¹¹ Imedoitomo, hei ana beine anu mentuwu rodo, impondidi-ndidimo, hei ana beine anu mentuwu nahina monsosanggoli, lohuomo ka ime'euomo sangkamiu, impokonaomo sawu po'inombo a ntongamiu!

¹² Topaomo radamiu, sabangiomo leremiu anu tekosi, ka keu anggoromiu anu membali wuano.

¹³ Sabangiomo witano tongkuku anu ituwuario ewo ka rui, oo, luwuno rahamiu po'ianga pesana-sanaa a ngkota anu mengkokora-kora.

¹⁴ Hangano bentemiu ta bininta ka kotamiu anu maroa ta gagi boni-boni. Pongku ka menara ta gagi wita merete ranta nahina tampulaano, gagi po'ianga pesana-sanaado kalide ntobu ka gagi po'iangano pinotuwu mongkaa ewo,

¹⁵ hawe kai inuwu ndi ontae Penaa inso i wawono; pada one ta gagi lere wua mpinopaho, lere wua mpinopaho ta rineke tobu.

¹⁶ Moleoa ta mo'ia i pada one, menteea ta mo'ia mpiha a lere wua mpinopaho.

¹⁷ Isua itineahako menteea, i ra'ai hinao rodoa, ka wuano menteea onaemo rodoa ka rodoa ranta nahina tampulaano.

¹⁸ Tongkuku ta mo'ia a mpo'ianga anu sintuwu, a mpo'ianga anu nahina monsosanggoli a mpo'ianga penaa-naaa anu rodo.

¹⁹ Tobu tehoa hangano usa watu ka kota pinotii hawe i totono ntu'u.

²⁰ Me'ura komiumo anu moiko imporawo umpeda a waaano uwoi, anu mokompopotola sapi ka kalide mpelempa mpongkaa ewo!