Yesaya 31 - Wunta Mempori

Ondaemo i Ue kumongkomio Sioni 31:1-9

¹ Masola ntu'u mia anu lumako mepetulungi i Masiri, anu momperorohi ngara, anu mompe'ala-ala a ngkaretano anu hadio, ka a sorodadu mpengara anu tedoa hadio, sine nahi dompengkita ndi Ondae Anu Tedoa Mempori, Ue Alado to Isaraeli, ka nahi dome'ungke Ira i Ue.

² Sine, Ondae tedoa pande mosongka. Ira mompotii masolaa, ka nahi Dopokuleo pau-Do; Ira mentade umewai ira mia mpoweweu mosa'o, ka umewaio anu mompokowali mia lambaha.

³ Hangano to Masiri mia koa, komba Ue Ala, ka ngarado onaemo anu ta tampula, komba penaa. Tewala Dotandeo i Ue kae-Do, telendoomo anu montulungi ka tedontaomo anu tinulungi, ondae mepingko luwu mate mperonga-ronga.

⁴ Hangano kanandiomo pau-Do i Ue ndi ongkue: Kana asa singa ke singa mongura bamburu kumorahakono pinongko'alano, ka nahi tededengke rumongeo peboolido luwuno bawaano puu mpopakambi anu tinena umewaio, ka nahi tenangi a magagado, kanatuumo Ondae Ueno luwuakoano Ira metii metea a wawo ntorukuno Sioni ka a wawo pongkuno.

⁵ Kana manu-manu mongkapa-kapa a wawo nsenono, kanatuumo Ondae Ueno luwuakoano Ira kumongkomio Yerusale, kumongkomio ka kumaduduio, dumagaio ka motolao.

⁶ Impepokulemo, hei to Isaraeli, ndi Ondae anu tedoa iramo pinebungkui!

⁷ Mentee ntu'u, a oleo atuu omiu singge mia ta tumadio lahumoa salaka ka lahumoa wulaano wineweuno kaemiu anu bukeako hala.

⁸ Asiuri ta tebangkuako ponai, sine komba ponaino mia, ka ta pingko ikaano ponai, sine komba ponaino pe'asa miano; ondae ira mpolai inso a mponai, ka mia mongurado ira megagi puu mpo'angga dinadai.

⁹ Anu kumadudui ira ta moliu hangano doito, ka tadulako sorodaduno ta molai tededengke binta ira bandera, kanandiomo pau-Do i Ue anu me'ueo api i Sioni ka awu pompotuwua api i Yerusale.