Yesaya 30 - Wunta Mempori

Komba Masiri sine Ondaemo i Ue mompowee pontulungi

¹ Masola ntu'u nana'ote anu umewa, kanandiomo pau-Do i Ue, anu weweuo tinoo anu komba inso ndi Ongkue, anu mewinsokio tepo'asaa, anu komba hangano Penaa-Ku, ranta ka dompohowu hala metiangi hala.

² Ondae mpelungka melako i Masiri nahi dompo'ema pomputusi-Ku, ira mpepekadudui ndi Pirao ka mpepetaloi i totono pabawano Masiri.

³ Sine pekaduduino i Pirao ta mokoko'ii komiu, petaloia i totono pabawano Masiri ta sumosa'ari komiu.

⁴ Hangano, maupo luwuno anu langkai potorodo i Yerusale mekongko iramo i Soani, ka luwuno tinenano mehawe iramo i Hanesi,

⁵ luwuno ta mohawe mokoko'ii hangano tongku atuu nahi polio moweeako ira anu mentudu, ka nahi polio moweeako ira pontulungi ke anu mentudu; sine butu mompokoko'ii, tendeano moweweuako ira tataado.

⁶ Pau-Do anu pabawa mongkona kondehora i Wita Nege. Telalo a wita anu buke ma'isoa ka te'asi, po'iangado singa waino ka singa lakino mpengaoli, po'iangado ule me'ipo ka ule mepani, domewawao arataa pompolido a wawo bungkuno kalide, ka luwuno parewa pinekariado a wawo palasa unta a tongku anu nahi domempolio mpompowee anu mentudu,

⁷ a nto Masiri anu moweeako ira pontulungi anu nahina pengkonaano; onaemo pu'uno, Kuneeakono, ”Rahabi, kalamboro anu butu mentoro menoro-noro.”

⁸ Kanandio-andio, lakomo, buriomo atuu i arono matado a asa watu medempe, ka nggoriomo atuu a asa lempe, ka igagi sakosii a tempo anu ta hawe ranta nahina tampulaano.

⁹ Hangano ondae atuu tongku anu mpe'ewa, nana'ote anu ineheno megaupi nana'ote anu nahi behe moronge pompaguru-Do i Ue;

¹⁰ anu motaeako ira puu pomparesa, ”Sii mpomparesa,” ka a puu pongkita, ”Siimo impokitaakami mongkona anu mentee, sine impopaumo anu nahi mentudu ndi omami, kitaakamimo mongkona anu komba mentee,

¹¹ pe'apiakomo inso a nsala, pansiamo inso a nsala, siimo popo'aro kami mbo'u saru Ondae Anu Tedoa Mempori, Ue Alado to Isaraeli.”

¹² Onaemo pu'uno, kanandiomo pau-Do Anu Tedoa Mempori, Ue Alado to Isaraeli, ”Hangano omiu nahi mentarimao pau andio, ka mpe'ala-alaakono koroimiu a pompokonsiia ka poweweu anu nahi mentee, saru mpe'ini ndi onae,

¹³ asalakono hala andio ta gagi ndi omiu kana rere watu umete anu tamo ronga tebangku, mesombulako i bungkuno a rere watu anu mantande, terawo-rawono mansa hawe nahi kinoo-koo, i larono asa mpiniro,

¹⁴ ka kana terawono bolusa wineweuno puu mpoweweu parewa inso a wita pulu, anu pinuro-puro nahi pinehohawa, ranta i olono tepurono nahina hinawe maupo te'asa lempe anu moiko ipino'alaako api inso a mpolu ke monsiru uwoi inso a limbo.”

¹⁵ Hangano kanandiomo pau-Do Ue Ala, Ondae Anu Tedoa Mempori, Ue Alado to Isaraeli, ”Saru mpepokule ndi Ongkue ka mpo'ia mpenoro-noro komiu mengkinadudui, i larono impo'ia mpomperodo ka mpompe'ala-ala rosomiu mo'ia.” Sine nahi mebehe,

¹⁶ tendeano impotae, ”Naahi, kami mpolai mpesawi a ngara,” onaemo ka komiu mpolai nahi teto'ori pe'aroamiu. Mpotae komiu mbo'u, ”Kami mpesawi a ngara anu magasi,” ka ta kanatuu koa mbo'u magasido anu lumulu komiu.

¹⁷ Asa nsowu mia ta molai a pompokodoitono asa mia, a pompokodoitono olima mia komiu mpolai, ranta ka imebininta kana keu tinandapako petondoni a wawo punsuno torukuno ka kana bandera a wawo pongku.

Dandi tekaduduiano Sioni 30:18-26

¹⁸ Onaemo pu'uno, Ondae i Ue mesisikori Ira mopokitao pompehohawa-Do ndi omiu; onaemo ka Dopentade mehohawa komiu. Hangano Ondaemo Ue Ala anu moleo; meme'uraomo mia anu sumisikori Ira!

¹⁹ Mentee ntu'u, hei tongku i Sioni anu mpo'ia i Yerusale, nahi komengese mpiha. Menteeano, Ondae i Ue Ira mehohawako, tewala omue meboo-booli; i tempono Dorongeo peboolimu, Ira sumangki.

²⁰ Maupo Dopoweeakomiu i Ue roti ma'isoa ka uwoi marasaia, sine anu Paguruko nahi Ira mewuni mbo'u, ka matamu ta kumita Ira mpiha.

²¹ Birimu ta rumongeo pau andio inso i bungkumu, ”Ndiomo salano, pelempamo tumondao,” tewala komiu mpekoana ke mpemanggali.

²² Omue komokoburuako ira tinahamu anu mewaluako salaka ke luwuno lahumoamu anu me'apiiako wulaa; onae kotumadio kana sawu hawe wulano beine saru motaeakono, ”Polaimo!”

²³ Ka i'amba Ondae i Ue Ira mompotiiakono usa a inii anu rinawomiu i wita, ka roti hasilino wita atuu ta mo'ahi ka hadio ntu'u. I tempo atuu pinotuwumu ira mpongkaa ewo a ntonga mpada anu malua;

²⁴ luwuno sapi ka kalide anu mpo'angga wita ira mpongkaa kaanga sinalo anu mo'ahi, anu dinukuako sikopa ka sarampa poduku.

²⁵ I wawono sompo torukuno anu mantande ka sompo pongku anu telanso ta mompowaa uwoi a oleo pompepatea anu langkai, tempono dontehoa menara.

²⁶ Mewineno wulantii ta kana mewineno oleo mokula ka mewineno oleo mokula ta meluka opitu, kana mewine opitu oleo, i tempono Ondae i Ue waluo mobela langkaino bawaa-Do ka mokotompao mobela hanga mpetunduhia.

Pohuku-Do Ue Ala a nto Asiuri 30:27-33

²⁷ Kitaomo, nee-Do i Ue hawe inso a mpo'ianga anu olai, tekuda-Do tensila a laro ahu mokapa anu membombo, wiwi-Do bukeako tekuda, ka elo-Do kana api anu mengkaa ka ipingko;

²⁸ pepuurino penaa-Do kana korono anu mompolomo, anu uwoino hawe a we'u. Ondae aiwa Ira montirisaako pontirisa matea a luwuno tongku ka mompokona koloro sama anu mompokotesosaelo a asedo luwuno suku tongku.

²⁹ Komiu mpenani kana i tempono wongi, tempono mia mpepokomempori tiano porame-ramea, ka aroamu ta mo'unde kana i tempono mia melempa tinondaako siloli ta mewuatako a ntorukuno-Do i Ue, a Ntorukuno Watudo to Isaraeli.

³⁰ Ondae i Ue Ira moporongeo suara-Do anu maramba, Ira mopokitao kae-Do anu montunduhi saru tekuda anu mongkokongiri ka langano api anu mengkaa ka ipingko, saru usa marombo, angi mokora ka usa watu.

³¹ Hangano, Asiuri ta doitoako suara-Do i Ue, i tempono Dotunduhiako ira tuko.

³² Hangano, sompo petunduhi mompake tuko pontunduhi anu Dopotiio i Ue ndi onae, ta tinondaako rebana ka katapi, ka Ira metea umewaio Asiuri saru po'iono kae a laro mpeteaa.

³³ Hangano inso i ndi'ipua inatoraomo po'ianga pontunua, anu mbo'u pinatindaako mokole, pompotuwua api wineweu ondalo ka malua, buke api ka keu; penaa-Do i Ue mokomo'aio kana korono walira.