Yesaya 3 - Wunta Mempori

Potuntu-Do i Ue a luwuno petewawa

¹ Menteeano, Ondae i Ue, Ueno luwuakoano, Ira tumadio inso i Yerusale ka inso i Yehuda tuko ka pontumbo, luwuno pepatinda kaanga ka inua;

² puu mpetea ka sorodadu, puu mpobitara ka nabi, anu mompau nahi manasa ta gagi ka mia memota'u,

³ petewawa sorodadu ka mia pinelangkai, puu pompatudu, puu mpebali-bali mata ka anu pande sihiri.

⁴ Aku mokogagi ira ana ntama kontuwuado gagi petewawa; ira mpoparenta montonda po'eheno aroado.

⁵ Palili ira mambepokonsii, asa mia ka anu susuano; mia mongura mompepaukiako mia mota'u, mia pinokongkodei mompepaukiako mia maramba.

⁶ Mia ta dumadaio pe'etuno amano ka motae, ”Omue da hinao lemba meloemu, gagimo petewawamami, anu tekale-kale kamimo andio i totono pabawamu!”

⁷ Sine i tempo atuu pe'etuno ta sumangki, ”Nahi kubehe gagi sando; a rahaku nahina kaanga ke maupo lemba meloe; si potoro aku gagi petewawa tongku.”

⁸ Mentee ntu'u, Yerusale tetiduomo ntu'u ka Yehuda tekale-kaleomo; hangano pau ka wineweudo ndi Ondae i Ue, umewaio maramba-Do.

⁹ Wineweu mpobibiniki tumuntu ira ondaedo ka kana Sodomo, domempopauo halado, nahina mbo'u anu winuni. Memasola iramo ntu'u mia atuudo! Hangano mpoweweu iramo masolaano koroido ondaedo.

¹⁰ Pauako iramo mia mentee, moiko ntu'u teweweudo a lembuiano, hangano ira mpongkaa hasilino inanggado.

¹¹ Masola ntu'u mia mosa'o gauno! Masolaa ta umaluo, wineweuno kaeno ta sinuloako ndi onae.

¹² Bawaa-Ku! Nana'ote mpokonsii ira, beine meparenta ira. Hei bawaa-Ku, luwuno petewawa mpompokontesaa, sala anu tinondamiu dompokopansiao!

¹³ Ondae i Ue mo'ala po'ianga Ira motuntu ka mentade Ira bitarao luwuno tongku.

¹⁴ Ondae i Ue mentade gagi puu mpobitara a mia memota'u ka luwuno petewawa bawaa-Do, ”Omiumo anu mengkaano ka ipingko lere anggoro atuu, parewa merinontu inso a mia tepokonsii tehowu a laro rahamiu.

¹⁵ Hapa pabawamiu bobarasai ira bawaa-Ku ka umisao ka imotutu rupado mia tepokonsii?” Kanandiomo pau-Do Ue Alano luwuakoano.

Pohuku-Do i Ue a beine mpompelangka-langkai

¹⁶ Ondae i Ue mepau: Beine Sioni gagi iramo mpompelangka-langkai ka mpelempa saru we'u anu pinokomoleo saru mpemae mata, ondae mpelempa mpepe'unde ka uni kekele a ngkarudo.

¹⁷ Onaemo pu'uno, Ondae i Ue Ira weweuo uludo beine Sioni buke kumbi ka Ira mosabao i Ue anu wela winunido.

¹⁸ A oleo atuu Ondae i Ue Ira tumadio luwuno peramba-rambado: mala-mala karu, ramba-ramba ulu anu pinotako a ra'i ka ramba-ramba rada;

¹⁹ tole-tole, mala-mala kae ka pesoumbu;

²⁰ ramba-ramba ulu, mala-mala tokia, peboo ntonga, ponaapa mina-mina ka tino'ori;

²¹ sinsi pontondoni ka sinsi enge;

²² sangka a mpogawea, lemba meloe, salenda ka dompe;

²³ tami, lemba lena, peboo ulu ka sangka i bungkuno.

²⁴ Winoo mana moboo gagi euno rampa mana mo'ahi, asa koloro gagi euno peboo ntonga, ulu anu londa gagi euno ramba-rambano wuu, asa lewe sawu po'inombo gagi euno sangka mare'e; ka tondonino mokoko'iia gagi euno tekosino.

²⁵ Mia ntamamiu ira memateako ponai, ka luwuno puu mpeteamiu memate a mpeteaa.

²⁶ Luwuno pewowa langkaino Sioni ira mperaali ka mpo'inombo, kotano kana beine anu bininta asa-asano tepontoro a wita.