Yesaya 29 - Wunta Mempori

Yerusale kinadu sine kinadudui 29:1-8

¹ Masola ntu'u Arieli, Arieli, kota pekemaano i Daudi! Po'ineeomo ta'u me'eu ta'u luwuno porame-ramea pinotilaloako me'eu-eu!

² Aku mokoma'isoo Arieli, ranta mia mpekalaki ka mpopemasusa, ka kota atuu ta gagi kana pompotuwua api ndi Ongkue.

³ Aku mekema kumaduko, ka moweweu po'ianga pompadasoa ka ute'asi, ka mompontade hadio bente pekorahakoa kumaduko.

⁴ Omue komepau inso i totono, inso a laro wita, pinaumu nahi teronge lahi inso a laro pampawu; suaramu ta me'uni kana suarano onitu inso a laro wita, ka pinaumu ta teronge kana petanga-tanga inso a laro pampawu.

⁵ Sine, pehowuno sorodadudo iwalimu ta tampula kana awu motutu, ka pehowuno mia lambaha ta gagi kana kuli mpae anu tepanee. Hangano nahi kinoo-koo, i larono asa mpiniro,

⁶ kokumitao hawe-Do Ueno luwuakoano a laro rundu, lelu ka uni mongkokodoito, a laro lompiu ka angi mokora, a laro langano api anu mongkaa ranta ka ipingko.

⁷ Ka i'amba pehowuno sorodadudo tongku anu mpetea umewaio Arieli, luwuno mia anu meteaakono ka luwuno bente pekorahako pongkaduano, mia anu mpokoma'isoo ta kana mo'ipi ka kana pongkita wongi.

⁸ Kana pandirino asa mia anu mokoninggo mo'ipi onae tekonai mongkaa, mansano mekaangako, kompono da mooa, ke kana pandirino asa mia anu mokoranga mo'ipi onae tekonai mo'inu, mansano mekaangako, mengkaa onae da mokendo, burokono da motu'i, kanandiomo teweweuno pehowuno sorodadudo tongku anu mpetea umewaio torukuno Sioni.

Tataano tongku anu morawu 29:9-16

⁹ Intekokodohomo, ranta ka intekokodoho mpiha, impepusumo, ranta ka impepusu mpiha! Imemolangumo, sine komba hangano anggoro, impobangku-bangkumo, sine komba hangano ara!

¹⁰ Hangano Doweweu komiumo i Ue ka impoturi rodo; matamiu, onaemo luwuno nabi, Dopokompepusu iramo ka rupamiu, onaemo luwuno puu pongkita, Doborungi iramo.

¹¹ Ndi omiu pongkita inso a luwuno atuu kana ihino asa wunta anu tinondoni. Tewala atuu wineeako mia anu bisa mobasa, saru pe'oliwi, ”Basaomo andio,” onae ta sumangki, ”Nahi kupolio hangano wunta atuu tinondoni.”

¹² Tewala wunta atuu wineeako mia anu nahi pokompobasa, saru pe'oliwi, ”Basaomo andio,” onae ta sumangki, ”Nahi kupokompobasa.”

¹³ Mepau Iramo i Ue, ”Hangano tongku andio aiwa me'umpedaako ngangano ka melangkaia-Kune wiwino, sine aroano olai inso ndi Ongkue, ka pesombano ndi Ongkue butu koa parentano mia anu hinapalano,

¹⁴ menteeano, Aku weweu ira mbo'u mongkona anu kinohali-haliako a tongku andio, kinohali-haliako anu mompokotededengke; ponto'orido mia anu mponto'ori ta tetadi, ka pandedo mia anu mempande ta tampula.”

¹⁵ Masola ntu'u mia anu wunio tedoa ondalo tinoono ndi Ondae i Ue, anu luwuno inanggano iweweuo a laro wongi-wongi saru motae, ”Isemake anu kumita kami ka isemake anu tumo'ori kami?”

¹⁶ Luwuno impoposuleo! Polioke anu moweweu parewa inso a wita pulu pinongkena kana wita pulu? Polioke anu wineweu mepau mongkona anu weweuo, ”Komba onae anu weweu aku?” Polioke anu wineweu tadeno mepau mongkona anu weweuo, ”Onae nahi ponto'ori hapa-hapa?”

Tekaduduia ineuaako pompokonsiia 29:17-24

¹⁷ Kombake tedeimo koa mbo'u tempo, Libano ta bali gagi lere wua mpinopaho, ka lere wua mpinopaho ta rineke tobu?

¹⁸ I tempo atuu mia mobongo ta rumongeo luwuno pauno asa wunta, ka tepotola inso a wongi-wongia, matano mia morawu ta mongkita.

¹⁹ Mia ntebobarasai ira mpo'unde mbo'u ndi Ondae i Ue, ka mia anu tedoa memongkokolaro ira mengkokora-kora mpo'unde ndi Ondae Anu Tedoa Mempori, Ue Alado to Isaraeli!

²⁰ Hangano mia lambaha ntu'u ta menaa-naa ka puu mpopasinggiri ta pingko, ka luwuno mia anu magasi mpoweweu mosa'o ira mempinokotampula,

²¹ ondaemo anu moruana mpopokosala mia a laro asa kara-kara, ka mpota'oakono oho anu monteahako songka a mpewowa langkai, ka anu mpoposule moleoa a mia mentee me'empehiako anu nahi mengkaa pepu'uano.

²² Onaemo pu'uno, kanandiomo pau-Do i Ue, Ue Alado inuleno i Yako, Ondaemo anu tumolosio i Burahima, ”Mompu'u kanandio-andio i Yako nahi pohawe mbo'u mokoko'ii, ka rupano nahi momite mbo'u.

²³ Hangano, i tempono domengkitao inuleno, hapa anu wineweuno kae-Ku i tongado, ira mpokomemporio nee-Ku; ira mpokomemporio Anu Tedoa Memporino i Yako, ka dontededengkeako Ira Ue Alado to Isaraeli;

²⁴ mia anu tesosaelo pinewowolono ta humaweo pengkonaano, ka mia anu hadio pompemasusano ta mohawe pompaguru.”