Yesaya 28 - Wunta Mempori

LAMORO 28–35 MA'ISONO YERUSALE KA TOLAANO Pinau anu ta gagi mongkona Eparai

¹ Masolaomo ntu'u ramba-ramba ulu pino'undeakodo anu memolangu i Eparai, ka peramba-rambado anu ntekokosi atuu butu koa bunga anu mompu'u moleu, anu po'iangano mantande a wawo lembo anu mewalo buuke mia anu mokolili ulu hangano anggoro!

² Menteeano, ta hawe inso ndi Ondae i Ue mia anu mokora ka moroso; kana angi mokora usa watu ka angi meroku anu mompepate, kana usa mokora anu mongkokongiri ka mompolomo, onae ta mepasiako ira a wita.

³ Ramba-ramba ulu pino'undeakodo anu memolangu i Eparai atuu ta linolandaako karu.

⁴ Peramba-rambado anu ntekokosi, bunga anu mompu'u moleu atuu, anu po'iangano mantande a wawo lembono anu mewalo, ta gagi kana wua ara anu tese'eluomo motaha se'eluno tempo motu'i-tu'i; isema anu kumitao tumampu'u tumeleo mansano umopuakono kaeno.

⁵ I tempo atuu Ondae Ueno luwuakoano Ira gagi ramba-ramba ulu anu tekosi, ka peramba-ramba anu maramba a bawaa-Do anu da mentuwu;

⁶ Ondae Ira gagi penaa moleoa a mia anu mentoro mobitara, ka gagi roso a mia anu motempu ponsapoi te'alaako a mpewowa langkai.

Pinau anu ta gagi a luwuno petewawa i Yerusale 28:7-22

⁷ Sine mia mbo'u i ndi'ai memokolili ulu hangano anggoro ka mokolili hangano ara. Moiko sando mpesomba maupo nabi memokolili ulu hangano ara, memarisuako anggoro; ondae memokoliliako ara, mokolili ulu a pongkita, mobea asambali a pomputusi.

⁸ Mentee ntu'u, luwuno meda bukeako telua, nahina po'ianga anu nahi mokoburu.

⁹ Dompotae, ”Ndi semake onae andio ta mompaguruako ponto'orino, ndi semake ta mokomengkaao luwuno pinauno anu ta gagi? A nana'ote anu da saraipo ipinotoe, anu da sarai nami po'uo?

¹⁰ Hangano asalakono andio asalakono atuu, asalakono kanandio asalakono kanatuu, tiangi andio tiangio atuu!”

¹¹ Mentee ntu'u, telalo a mia anu susua pauno ka telalo a mia anu mpepau susua Ondae i Ue Ira mepau a tongku andio.

¹² Mepau Iramo ndi ondae, ”Onaemo andio po'ianga penaa-naaa, poweeako iramo penaa-naado mia anu mokendo; ndiomo po'ianga tetoroa!” Sine nahi domebehe mperorongeakono.

¹³ Onaemo ka ira merongeo pau-Do i Ue anu kanandio, ”Asalakono andio asalakono atuu, asalakono kanandio asalakono kanatuu, tiangio andio tiangio atuu!” Ka itempono dompelempa mentebangku ira sinsingara, mobela, kona rako ka tinawa.

¹⁴ Onaemo pu'uno, rongeomo pau-Do i Ue, hei luwuno puu mpompasinggiri anu meparentao tongku andio anu mekongko i Yerusale!

¹⁵ Hangano mpotae komiumo, ”Mpoweweu kamimo pedandia saru matea, ka saru tolinodo mia mate mpoweweu kamimo tepo'asaa mpau; maupo mowo tumutuwio ka sumampuo, nahi ta kumona kami; hangano kimpokogagiomo pegaupi gagi pepekaduduimami, ka omami mpewuni a laro mpegaupia.”

¹⁶ Onaemo pu'uno, kanandiomo pau-Do i Ue Ala, ”Menteeano, Kupontoroo asa watu i Sioni gagi pundasino, asa watu anu moroso, watu siuno anu masuli olino, asa pundasi anu moroso: Isema anu mompe'ala-ala, nahi ta danggara!

¹⁷ Aku weweuo moleoa gagi koloro posongka, ka menteea gagi koloro pompokomoleo; usa watu ta rumoahio morina pepekaduduia anu nahi mentee, ka uwoi ta molomoo pewuniamu.”

¹⁸ Pedandiamiu saru matea atuu nami ta hina, ka tepo'asa mpaumiu saru tolinodo mia mate atuu nahi ta pinolempa mpiha; tewala moowo tumutuwio ka sumampuo, komiu mepingko te'aluano.

¹⁹ Sompo ihawe, ta rumende komiu, hangano sompo mo'oru onae ta hawe, i tempono meene ka i tempono wongi; tedoa mongkokongiri ntu'u tewala pinokonto'ori pau anu rinonge atuu.

²⁰ Hangano poturia nahi ta sompo ondauno po'ianga mepombole, ka hawu nahi ta sompo maluano petutuwi.

²¹ Hangano Ondae i Ue Ira mentade kana i Torukuno Perasimi, Ira uma'e kana i lembono umpeda Gibeoni, Ira mokogagio wineweu-Do, wineweu-Do anu susua ntu'u atuu; ka Ira umanggao anggaa-Do, anggaa-Do anu kinohali-haliako atuu!

²² Onaemo pu'uno, siimo impopasinggiri, kasi tekense mapee koloro pongumiu, hangano kurongeo mongkona matea anu manasaomo anu hawe inso ndi Ondae Ue Alano luwuakoano a luwuno wita atuu.

Posongka-Do i Ue 28:23-29

²³ Ta'oomo biri ka rongeomo pauku; pekokoongakono ka perorongeakonomo pinauku!

²⁴ Sompo oleoke mia mompadeko, mobingku ka mongkambu witano ka iporawo inii?

²⁵ Kombake mansano merete witano, onae morawo jinta mo'ito ka morawoakono jinta mopute, numaao gandu pinodede ka jelai a mpo'iangano ka sekoi i wiwino?

²⁶ Onae pinaguruomo mongkona anu lineleoako atuu, ka Ondae Ue Alano moweeakono pontiso.

²⁷ Hangano jinta mo'ito nahi sinesaako ponsesa rinende, ka bolano roda nahi pinake mogili jinta mopute, sine jinta mo'ito winombaako tuko, ka jinta mopute mompake tuko.

²⁸ Nde sinesake gandu ranta ka imotutu? Manasa naahi, komba domewombakio mpiha mia ranta ka imotutu! Maupo dompolempao mia i wawono gandu atuu bolano roda saru ngarano, nahi ira megilio mia ranta ka imotutu.

²⁹ Anu wela wineweu mbo'u andio te'inso ndi Ondae Ueno luwuakoano; Ondae kinohali-haliako a laro pomputusi ka maramba a laro posongkaa.