Yesaya 26 - Wunta Mempori

Ondae i Ue bente anu moroso 26:1-6

¹ I tempo atuu penani andio ta pinenaniako i wita Yehuda, ”Ndi ontae hinao kota anu moroso, tekaduduiato Dopasaomo i Ue rere watu ka bente.

² Ungkahiomo luwuno pewowa langkai, ka ipewinso tongku anu mentee, anu kongko metenunu!

³ Anu moroso aroano Omiu dumagaiakono rodoa, sintuwu manangai, hangano ndi Omiumo ipompe'ala-ala.

⁴ Pe'ala-ala Iramo mpiha i Ue, hangano Ondae Ue Ala onaemo torukuno watu anu nahina tampulaano.

⁵ Hangano Dopokompetuundu iramo anu mpo'ia a mantandeano; kota anu kontasi-tasi Dopotiiomo, Dopotiio hawe a wita ka Doweweuo merete hawe ka ipowoo pampawu.

⁶ Karudo mia memarasai, pele ngkarudo mia molema ta lumolandao.”

Ondae i Ue moweeako ira tuwua bawaa-Do 26:7-19

⁷ Pesalaado mia mentee onaemo moleo, hangano Omiu anu pu'uakono sala moleo.

⁸ A nsala moleoa-Miu mbo'u, kimensisikori Komiu, oo Ue. Anu inehemami onaemo moboio nee-Miu ka rumambe Komiu.

⁹ Sumangaku tekewoi ndi Omiu i tempono wongi, oo, i tempono mo'oru aroaku umungke Komiumo; hangano tewala hawe Komiu bitarao tolino, palilino wawontolino ira mpepaguru hapa anu mentee.

¹⁰ Ande-andeno mia mosa'o gauno pinehohawa, onae nahi ta mepaguru hapa anu mentee; onae ta moweweu molengku a wita po'iangano songka pinolempa, ka nahi ta kumitao maramba-Do i Ue.

¹¹ Oo Ue, kae-Miu tetande, sine nahi domengkitao. Moikoano ka domengkitao po'ehe-Miu a bawaa-Miu ka domemokoko'ii! Po'ineeomo api anu rumopu ira anu umewai Komiu sumongko ira!

¹² Oo Ue, Omiu anu mompatindaakami rodoa, hangano luwuakoano anu inanggamami, Omiumo anu weweuakami.

¹³ Oo Ue, Ue Alamami, pe'uea susua hori ira mempabawai kami, sine butu nee-Miu kimempaleleo.

¹⁴ Ondae memate iramo, nahi ira mentuwu mbo'u, megagi iramo onitu, nahi ira mpewangu mbo'u; menteeano, Ihuku iramo ka rumopu ira, ka tumadio luwuno pinewowolo ndi ondae.

¹⁵ Iweweuomo tongku andio kotetia-tiangino, oo Ue, Iweweuomo tongku andio kotetia-tiangino. Mohawe Komiumo marambaa; tedoaomo Ipokomaluao witado.

¹⁶ Oo Ue, a laro ma'isoa dome'ungke Komiu; tempono pohuku-Miu umalu ira, mpe'anaiki ira a laro mpekakai.

¹⁷ Kana beine mentia anu temponomo ta me'ana, memoluki mahaki, meraipi hangano mahaki me'ana, kanatuumo hieno teweweumami i aro-Miu, oo Ue:

¹⁸ Omami mentia, omami mpemoluki mahaki, sine kana kami mpe'anaako angi; omami nahi kimempolio mpotulungi i tolino, ka nahina anu pine'anaako ka ipo'iangario wawontolino.

¹⁹ Oo, Ue, mia-Miu anu memate ira mentuwu mbo'u, wata ngkoroido ta mewangu mbo'u. Hei mia anu mengkinaburu iramo a laro wita impewangumo ka imengkokora-koramo! Hangano tontoru-Do i Ue onaemo tontoru mewine, ka tolino ta wali me'anaako onitu,

Ondae i Ue mentade bitarao tolino 26:20-21

²⁰ Aiwamo tongkuku, pewinsomo a laro bolongkomu, tondoomo tondo i bungkumu, pewunimo tesarai koa, hawe ka imorini tekuda atuu.

²¹ Hangano menteeano, Ondae i Ue Ira ronga meluarako inso a mpo'ianga-Do Ira humukuo palilino tolino hangano salado, ka tolino mosabao rea anu te'uwu i wawono, nahi wunio mbo'u mia anu mempinepate i ra'ai.