Yesaya 25 - Wunta Mempori

Pau po'unde hangano iwali tampulaomo 25:1-5

¹ Oo Ue, Omiumo Ue Alaku; aku melangkai Komiu, umunde-undeo nee-Miu, hangano Iweweuomo luwuno tinoo-Miu anu kinohali-haliako, anu mompu'u i ndi'ipua pine'ala-ala ka moroso.

² Hangano Iweweuomo kota atuu gagi howuno watu, ka kota anu mebente pekorahakoa atuu gagi howuno anu terawo; ranta bentedo mia hawe atuu nahi pentade mbo'u gagi kota, ka nahi winangu mbo'u ranta nahina tampulaano.

³ Onaemo pu'uno, asa tongku anu moroso ta umunde-unde Komiu; kotado tongku anu melambaha ntu'u ira medoito ndi Omiu.

⁴ Hangano Omiu gagi polaiado mia molema, polaiado mia mongkokolaro a laro masukaraado, pepekaduduia a usa me'angi mokora, pe'engoa a mokulano ntu'u oleo. Menteeano, pepuurino tekudado mia melambaha ntu'u atuu kana usa me'angi mokora i tempo morini,

⁵ kana mokulano ntu'u oleo a motu'iano. Sine, magagado mia mehawe atuu Komiu komino; kana mokulano ntu'u oleo i'engoio seru, kanatuumo penanido mia melambaha ntu'u atuu ta pinokompenaa-naa.

Pelimbuado tongku i Sioni 25:6-12

⁶ Ondae Ueno luwuakoano Ira mompatinda i torukuno andio tiado luwuno tongku, asa pelimbua saru ninahu anu mentaba, asa pelimbua saru uwoi anggoro motu'a, ninahu anu mentaba ka me'unto wukulaa, anggoro motu'a anu tinirisa upeno.

⁷ A wawo ntorukuno andio Ondae i Ue Ira berio sawu po'inombo anu sinoumbuako a luwuno suku tongku ka boru anu binorungiako luwuno tongku.

⁸ Matea nahi Ira mokohinao mbo'u; ka Ondae Ue Ala Ira pahihio uwoi mata inso a luwuno rupa; ka mokoko'iiado bawaa-Do Ira moko'olaio inso i asa wawontolino, hangano Dopauomo i Ue.

⁹ I tempo atuu mia ira mpotae, ”menteeano, Ondaemo andio Ue Alato. Tomensisikori Ira, ka Dokadudui kitamo. Ondaemo andio Ue anu sinisikorito; aiwamo tomengkokora-kora ka mpo'undeakono pontulungi-Do!”

¹⁰ Hangano kae-Do i Ue ta kumaduduio torukuno andio, sine Moabi ta linolanda a mpo'iangano onaeno, kana seami linolanda a laro kineke pontadia anu mokoburu.

¹¹ Maupo iwileo Moabi kaeno i larono kana mia sumowe, Ira puduo i Ue pompelangka-langkaido maupo kana'umpe domperokuhi.

¹² Luwuno bente rere watumu anu mantande Ira mobangkuo, Doweweuo merete saru wita, hawe ka ipowoo pampawu.