Yesaya 24 - Wunta Mempori

LAMORO 24–27 PINAU ANU TA GAGI MONGKONA TAMPULAANO WAWONTOLINO Tolino pinokotampula 24:1-13

¹ Menteeano, Ondae i Ue Ira rumoahio morina tolino ka mo'ineeo, Ira waliteo, ka sumiarawoo palilino.

² Ka kana anu gagi a mpalili kanatuumo a nsando mpesomba, kana a ata tama kanatuumo a mpe'ueano tama, kana a ata beine kanatuumo a mpe'ueano beine, kana a mia mo'oli kanatuumo a mia mo'asa, kana a mia monsabo kanatuumo a mia mompesaboako, kana a mia anu mepasua kanatuumo a mia anu mompowee pasua.

³ Tolino ta rinoahi morina ntu'u, ka pinomuru ranta pingko ntu'u, hangano Ondaemo i Ue anu pauo pau andio.

⁴ Tolino tengkuru ka moleu, oo, wawontolino me'i'isei ka moleu, langi ka tolino meronga me'i'isei.

⁵ Tolino mokoburu hangano palilino, hangano ondae mpolingei songka, mpolimpa'i pompakosi ka mehapuo pedandia nahina tampulaano.

⁶ Onaemo pu'uno, pontotonaa ta kumaano tolino, ka palilino ta mohawe pohuku; onaemo pu'uno, palilino tolino ta makura, ka mia anu da tuwu tedeimo koa.

⁷ Uwoi anggoro mo'are, keu anggoro me'i'isei, ka luwuno anu ineheno mo'inu anggoro mpompemasusa.

⁸ Maroano unino rabana menaa-naaomo, maroano mia anu memawongko tampulaomo, ka maroano unino katapi menaa-naaomo.

⁹ Nahina mbo'u mo'inu anggoro tinondaako penani, ara gagi mopa'ino mia uminuo.

¹⁰ Terawo-rawoomo kota anu maroa magaga, sompo raha tinondoomo, nahi pinokompewinsoki mbo'u.

¹¹ Teronge peraali a nsala hangano nahina anggoro; luwuno po'unde menaa-naaomo, mawongkono tolino tampulaomo.

¹² Anu da tebinta a laro ngkota butu howuno anu terawo, pewowa langkai rinawo-rawoomo.

¹³ Hangano kanandiomo ta gagi i wawontolino, i olodo tongku, kana i tempono mia monsodoli wua saitu, kana i tempono po'opua lembuino, tewala po'opua wua anggoro umariomo.

Po'unde-unde inso a bawaa anu da mentuwu 24:14-16a

¹⁴ Saru suara meroku kokora-kora, hangano maramba-Do i Ue, ondae mpohio inso i sumooano oleo,

¹⁵ ”Onaemo pu'uno, pelangkai Iramo i Ue a luwuno wita i sabaano oleo, nee-Do i Ue, Ue Alado to Isaraeli, a luwuno wita i wiwi ntahi!”

^16a Inso i tompano tolino kimerongeo penani po'unde-unde, ”Maramba tia-Do Anu Tedoa Moleo!”

Urasa'o a mpalilino tolino 24:16b-23

^16b Sine mebooli aku, ”Tampula akumo, tampula akumo! Masola akumo! Luwuno anu nahi petenunu, nahi hori metenunu! Moweweu mpiha nahi petenunu! Luwuno anu nahi petenunu mpoweweu mpiha nahi petenunu!”

¹⁷ Doitoa, kineke pompete'umalaa ka oho, sumikoriko, hei palilino tolino!

¹⁸ Ka anu molai hangano uni anu mongkokodoito ta tedonta a laro kineke, ka anu mewuatako inso a laro kineke ta kona oho. Hangano pentangoa i langi ira nte'ungkahi ka empehino tolino ta melelu.

¹⁹ Tolino tepuro-puro, tolino terawo-rawo tolino telelu mokora ntu'u.

²⁰ Tolino mobangku-bangku kana mia molangu melelu kana laika mensoe-soe; hala pe'ewano tedoa mokomobeao, onae tebangku ka nahi ta mewangu mbo'u.

²¹ A oleo atuu Ondae i Ue Ira humukuo sorodadu langi i langi ka luwuno mokole ntolino i wawontolino.

²² Ondae ira mepinumpu mperonga-ronga, kana mia tinaha wininso a laro ngkeke; ondae ira mewininso a laro torungku ka ta hinuku umarino tempo anu tehine.

²³ Wulantii ta tekoko'ii, ka oleo mokula ntu'u ta mohawe mokoko'ii, hangano Ondae Ueno luwuakoano Ira meparenta i Torukuno Sioni ka i Yerusale, ka Ira mopokitao maramba-Do i arodo mia pinemota'udo bawaa-Do.