Yesaya 23 - Wunta Mempori

Pau-Do anu pabawa a nto Tirusi ka Sidoni 23:1-18

¹ Pau-Do anu pabawa a nto Tirusi. Ponsabangimo, hei luwuno kapala Tarasisi, hangano gagiomo terawo-rawoa, nahina mbo'u raha. Tempono domehawe inso i witado to Kitimi mongkona atuu pinokomengkaa ndi ondae.

² Perodo-rodomo, hei palilino wita i wiwi ntahi, hei puu mpebalu-baluno Sidoni; mia mentinenamu mpesumomba a ntahi.

³ Isuamo koa usumomba balu-balumu onaemo gandu inso i Sihori, sinowi i wita Nili, ranta kota atuu gagi oludo hadio tongku.

⁴ Mokoko'iimo Sidoni, hei bente i wiwi ntahi, hangano tahi mepau, ”Nahi kuhori memoluki mompemahaki ka nahi kupe'ana, nahi kuhori mokolangkai ira nana'ote mongura, ka nahi kupompekakaako nana'ote beine.”

⁵ Mansano teronge hawe i Masiri, ira mpondidi-ndidi kana tempono domerongeo lele mongkona Tirusi.

⁶ Impolaimo melako i Tarasisi, mponsabangimo, hei palilino wita i wiwi ntahi!

⁷ Onaemoke andio kotamu anu mawongko, anu insoano mompu'u tempo i ndi'ipua? Kombake iwawaomo pelempano a mpo'ianga anu olai ka ipo'iamo mpiha i ra'ai?

⁸ Isemake anu putusiakono ndio ndi Tirusi, anu mompowee ramba-ramba ulu, anu luwuno puu mpebalu-baluno langkai potorono ka luwuno puu mpebalu-baluno mia maramba i tolino?

⁹ Ondaemo Ueno luwuakoano anu putusiakono ka mokongkuramao pompelangka-langkaido luwuno anu maramba, ka mokongkodeio luwuno mia pinelangkai i tolino.

¹⁰ Anggaomo leremu kana wita pelerea i koro Nili, hei ana beineno Tarasisi, hangano poweweua kapala nami hina mbo'u!

¹¹ Dotandeomo i Ue kae-Do te'aro a ntahi ka weweu ira poparentaa mpondidi-ndidi; meparenta Iramo mongkona Kana'a ka irinopu luwu benteno.

¹² Mepau Ira, ”Omue nami komo'unde mbo'u, hei ana beine anu tebobarasai, hei ana beine Sidoni! Pentademo, polaimo a nto Kitimi! I ra'ai mbo'u nahi ta hina rodoamu.”

¹³ Kitao witado to Kasidimi! Tongkumo atuu anu weweuo, komba to Asiuri. Dompeweengakonomo Tirusi a ngkondehora i pada one, domewangu iramo menara pongkadua ka dompokomerete iramo benteno kota atuu ka meweweuo kota atuu gagi howuno anu terawo.

¹⁴ Ponsabangimo, hei luwuno kapala Tarasisi, hangano bentemu rinawo-rawoomo!

¹⁵ I tempo atuu Tirusi ta kinolupe pitu pulu nta'u tehineno kana tinuwuno asa mokole. A pokotampulaano pitu pulu nta'u atuu ta gagi i Tirusi kana a laro mpenani mongkona beine belesu kanandio:

¹⁶ ”Alaomo katapi, limbuomo kota, hei belesu anu kinolupe! Po'uniomo temoiko, penaniakomo tehadio penani, ka urinorambe.”

¹⁷ A pokotompaano ta'u atuu Ondae i Ue Ira merioo Tirusi, ranta ka iwali mohawe tambo belesuno, ka onae ta mebelesuako ira luwuno poparentaa anu kongko i wawontolino.

¹⁸ Ura ka tambo pebelesuno ta mempori ndi Ondae i Ue, nahi ta inontoako ke ninaa, sine saru urano atuu ta pinatindaako kaanga anu sompo ka sangka anu tekosi tiado mia anu mpo'ia i aro-Do i Ue.