Yesaya 22 - Wunta Mempori

Pau-Do anu pabawa a nto Yerusale 22:1-14

¹ Pau-Do anu pabawa a ”Lembono Pongkitaa.” Hinao hapa ndi omiu, ranta luwuno palilimu mpewuatako a wawo atono raha,

² hei kota anu bukeako magaga ka marisua, hei kota anu mengkokora-kora? Miamu anu mate mempinepate komba mempinepateako ponai, ka komba mbo'u memate a laro mpeteaa.

³ Luwuno tadulako sorodadumu mempolai mperonga-ronga, mentinawa ira maupo nahina ana mpana pinotola; luwuno anu merinako tinawa mperonga-ronga, maupo olaiomo dompolai.

⁴ Onaemo pu'uno, ka kupotae, ”Limbaomo pengkitamu inso ndi ongkue, po'inee akumo kupengese a laro marasai; siimo pe'i'isei tumarero aku hangano mateado ana beineno tongkuku.”

⁵ Hangano oleo tewukaa, petuundua ka marisua Dopotiio i Ue, Ueno luwuakoano, i ”Lembono Pongkitaa” teronge tehoano rere watu ka pebooli mepetulungi hawe a ntorukuno!

⁶ Elami mompokonaomo kadu mpana, me'ula a ngkareta saru sorodadu mpengara, ka Kiri moluarako kanta.

⁷ Luwuno lembono witamu anu lalu tekosi bukeako kareta ka sorodadu mpengara, ondae mpebaresi mpe'aro a mpewowa langkai,

⁸ ka tepotolaomo tekaduduiano Yehuda. I tempo atuu omue mengkita a mpepatindaa parewa mpetea a ”Raha Langkai Tobu.”

⁹ Imengkitao hadio ntu'u umete a rere watuno kota Daudi ka komiu mepumpuo uwoino Limbo i Totono;

¹⁰ luwuno raha i Yerusale imedoao, ka raha atuudo impobangku ira ta mompokomoroso rere watu;

¹¹ popumpua uwoi imeweweuo i olono orua rere watu atuu popumpua uwoi inso a limbo anu tehine; sine omiu nahi mpengkita ndi Ondae anu weweuo, ka nahi mpengkita ndi Ondae anu mokogagiomo mompu'u i ndi'ipua.

¹² I tempo atuu Ondae i Ue, Ueno luwuakoano tumena ira mia mpengese ka mponsabangi, mpekeru ulu ka mpebooako sawu po'inombo;

¹³ sine kitao, anu hina tendeano po'undea ka mawongkoa, mia mpontida sapi ka mponsumbele bimba, mpongkaa bau ka mpo'inu anggoro, saru mpebooli, ”Aiwamo ka tompongkaa ka mpo'inu, hangano tisomo kita memate!”

¹⁴ Sine Ondae Ueno luwuakoano mepokomengkaa Iramo a biriku, ”Mentee ntu'u, salamiu andio nahi ta inonini, hawe ka imemate,” pau-Do i Ue, Ueno luwuakoano.

Mongkona i Sebina ka i Eliakimi

¹⁵ Kanandiomo pau-Do i Ue, Ueno luwuakoano, ”Lakomo a mpetewawano langkanae andio, aropiomo i Sebina anu umorusuo langkanae,

¹⁶ ’Hapa orusuamu i ndi'ai? Isema uempu'umu i ndi'ai, ka upongkeke kaburu tiamu i ndi'ai, hei anu mongkeke kaburu a mantandeano, anu mompa'o po'iangano a pongku watu?

¹⁷ Menteeano, Ondae i Ue Ira metadiakomu te'olai, hei mia moroso! Ira uminiko moroso

¹⁸ ka kupaluluko moroso gagi asa mpalulu ka lumundiko kana golu a wita anu tewile malua; i tu'aimo komate, ka i tu'aimo po'iangado kareta pompelangkai ndi omue, hei omue mokoko'iiado somborino uemu!

¹⁹ Aku metadiakomu inso a potoromu, ka inso a pentoroamu kodinontai.

²⁰ I tempo atuu Aku moboio tetenaa-Ku, i Eliakimi anano i Hilikia;

²¹ Lemba meloemu Aku mokonaakono, peboo ntongamu Aku mebooakono ndi onae, ka pabawamu Aku meweengakono a ngkaeno; onae ta gagi ama a mpalili Yerusale ka suku Yehuda.

²² Aku numaao kunsino rahano i Daudi a wawo oweano: tewala i'ungkahio, nahina anu mokotondoo; tewala itondoo, nahina anu moko'ungkahio.’

²³ Aku metandapakono kana pandora a rere watu anu moroso ranta onae ta gagi kadera pompelangkaia a mpe'etuno.

²⁴ Ndi onae ta pinopotembiako luwuno tembiado pe'etuno: tuna ka tumba, luwuno parewa anu kodei, inso a sangkiri hawe a ngkuro.

²⁵ I tempo atuu, kanandiomo pau-Do Ueno luwuakoano, pandora anu tinandapako moroso a rere watu anu moroso atuu nami ta moroso mbo'u, ranta ka itepudu ka tedonta, ka luwuno tembiano atuu terawo-rawo. Mentee ntu'u, Dopauomo i Ue.”