Yesaya 21 - Wunta Mempori

Pohuku-Do anu pabawa a nto Babeli 21:1-10

¹ Pau-Do anu pabawa a ”Mpada One i Wiwi Ntahi.” Kana lompiu sumapoio Wita Nege, kanatuumo haweno inso i pada one, inso a wita anu mongkokodoito.

² Aasa pongkita anu mongkokongiri pinaleleomo ndi ongkue, ”Puu porontu morontu, puu ponsolangi monsolangi! Lakomo, hei Elami, kaduomo, hei Madai! Luwuno pompemasusaa hangano onae Aku mokompenaa-naao.”

³ Onaemo pu'uno, tongaku tedoa mahaki, mahaki kompo umalu aku kana mahakino kompono beine anu me'ana; mompemasusa aku hangano hapa anu rinongeku, tededengke aku hangano hapa anu kinitaku.

⁴ Aroaku tesosanggelo, doitoa lumimbu aku, tekamburi anu kinekewoiku ibalio gagi asa anu mompokodoito.

⁵ Meda pinatinda, pentoroa me'inatora, mia mpongkaa ka mpo'inu. ”Hei tadulako sorodadu impepatindamo! imelanaomo kanta!”

⁶ Kanandiomo pau-Do i Ue ndi ongkue, ”Lakomo, naaomo asa mia puu pompadaso, hapa anu kinitano asalakono ipauakomu.

⁷ Tewala mongkita asa bawaa, sorodadu mpengara mpepasa-pasa, bawaano kalide, bawaano unta, asalakono ipekokoongakono ntu'u ka tedoa mantii.”

⁸ Ka i'amba mebooliomo mia anu mongkita atuu, ”A pompadasoa, oo ueku, mentade aku asa oleo mondo, ka a mpodagaia metangkoro aku i larono asa wongi.”

⁹ Kitao, mehawe iramo asa bawaa mia, sorodadu mpengara mpepasa-pasa! Ka i'amba mebooliomo, ”Tedontaomo, tedontaomo Babeli, ka luwuno tinaha lahumoano ntesiarawo a wita.”

¹⁰ Hei tongkuku anu tinunduhi ka linolanda! Hapa anu rinongeku inso ndi Ondae Ueno luwuakoano, Ue Alado to Isaraeli, kupauakomumo.

Pau-Do anu pabawa a nto Duma 21:11-12

¹¹ Pau-Do anu pabawa a nto Duma. Asa mia mebooli ndi ongkue inso i Seiri, ”Hei puu mpodagai, da tehineke wongi andio? Hei puu mpodagai, da tehineke wongi andio?”

¹² Puu mpodagai atuu sumangki, ”Mo'oru ta hawe, sine wongi mbo'u. Tewala komiu mpesikeno, ime'aiwamo mbo'u ka impesikenomo!”

Pau-Do anu pabawa a nto Arabia 21:13-17

¹³ Pau-Do anu pabawa a nto Arabia. A ntonga ewo, a mpada malua komiu mperato, hei to Dedani anu mpebalu-balu!

¹⁴ Hei palilino wita Tema, impeluarakomo, wawaomo uwoi a mia anu mokoranga, lakomo, totowoako iramo roti mia mpolai!

¹⁵ Hangano ondae mpolaiako ponai, oo inso a mponai anu tebuta, inso a mpana anu linongkuomo, ka inso a mongkokongiriano peteaa.

¹⁶ Hangano kanandiomo pau-Do i Ue ndi ongkue, ”I larono tempo asa nta'u mbo'u, mengkena kana luwuno oleodo sorodadu mentinambo, luwuno marambano Kedari ta pingko.

¹⁷ Inso i olodo puu pompona anu moroso ka mosia inso a inuleno i Kedari anu ta tebinta tedeimokoa, hangano Dopauomo i Ue, Ue Alado to Isaraeli.”