Yesaya 2 - Wunta Mempori

Pongku Sioni, pu'uno manangaiado tongku 2:1-5

¹ Pau anu tinarimano i Yesaya anano i Amosi a laro pongkita mongkona Yehuda ka Yerusale.

² Ta gagi a oleo pokotampulaano: torukuno po'iangano raha-Do i Ue ta mentade lumaloio punsuno luwuno torukuno ka kontasi-tasi i wawono luwuno pongku; luwuno tongku ta hadio ntu'u melako i ra'ai,

³ ka hadio sukuno tongku ira melako saru mpotae, ”Aiwa, tompewuatako a ntorukuno-Do i Ue, a raha-Do Ue Alano i Yako, ka Dopaguruakita luwuno pesalaa-Do, ka tompesala a mpesalaa-Do; hangano inso i Sioni ta saba pompaguru ka pau-Do i Ue inso i Yerusale.”

⁴ Ira bitarao luwuno tongku ka putusio kara-karano hadio sukuno tongku. Ira melabuo luwuno ponaido gagi mata mpadeko ka kansaido gagi piso ponsewo; tongku nahi ira mpontande mbo'u ponai mo'ewai tongku susua, nahi ira mpepaguru mbo'u mpetea.

⁵ Hei, suku inuleno i Yako, aiwa tompelempa a laro mewine-Do i Ue!

Ondae i Ue umewaio tongku anu mompelangka-langkai 2:6-22

⁶ Mentee ntu'u, itadi iramo ntu'u bawaa-Miu, inuleno i Yako, hangano witado bukeako anu mpompau nahi manasa ta gagi inso i sabaano oleo ka sihiri kana a nto Pelisiti, ondae mpesangkalima saru mia mehawe.

⁷ Witano buke wulaa ka salaka, nahi tetidahi arataano; witano buke ngara, nahi tetidahi hadiono karetano.

⁸ Witano buke lahumoa; ondae mpenggolontu mpesomba a wineweuno kaedo ondaedo a wineweuno wunga ngkaedo.

⁹ Mia pinokompetuundu, mia pine'uru-uru siimo tandeo hala tembiado!

¹⁰ Polaimo a ntorukuno watu, pewunimo a laro aano wita inso a mongkokongiri-Do i Ue ka mewantano maramba-Do!

¹¹ Mia anu mengkita saru mompelangka-langkai ta pine'uru-uru, mia anu mompelangka-langkai ta pinokompetuundu; butu koa Ondae i Ue anu tedoa mantande a oleo atuu.

¹² Hangano Ondae Ueno luwuakoano pakosio asa oleo umewaio luwuno anu mompelangka-langkai umewaio anu tumandeo koroino; – luwuno ta pine'uru-uru –

¹³ umewaio luwuno keu arasi i Libano anu kontasi-tasi ondau ka moleo, umewaio luwuno keu tarabanti i Basani;

¹⁴ umewaio luwuno torukuno anu ondau, ka luwuno pongku anu kontasi-tasi;

¹⁵ umewaio luwuno menara anu ondau ka luwuno rere watu anu moroso;

¹⁶ umewaio luwuno kapala Tarasisi ka luwuno kapala anu tedoa tekosi.

¹⁷ Mia anu mompelangka-langkai ta pinokompetuundu, mia anu mompelangka-langkai ta pine'uru-uru; butu koa Ondae i Ue anu tedoa mantande a oleo atuu.

¹⁸ Luwuno lahumoa ta tampula luwu.

¹⁹ Ka mia ira mpewinso a laro ngkunepo a ntorukuno watu ka a laro aano wita hangano mongkokongiri-Do i Ue ka mewantano maramba-Do, i tempono Dopentade mokodoitoo tolino.

²⁰ A oleo atuu lahomoa salaka ka lahumoa wulaa anu wineweu ta pinesombai ira mpetadiakono mia a ntehu ka poneki,

²¹ ka ipokompewinso a laro olo-olono torukuno watu ka a laro pelengkuano pongku watu hangano mongkokongiri-Do i Ue ka mewantano maramba-Do, i tempo Dopentade mokodoitoo tolino.

²² Penaa-naamo pomperorohi a mia, anu butu hinao penaa a engeno; hapa tuduno momperorohi ndi onae?