Yesaya 19 - Wunta Mempori

Pau-Do anu pabawa a nto Masiri

¹ Pau-Do anu pabawa a nto Masiri. Kitao, Ondae i Ue me'ula a nseru anu magasi ka aiwa i masiri; luwuno lahumoa i Masiri mpondidi-ndidi i aro-Do, ka aroado to Masiri gagi tengkuru a laro aroado.

² Aku lumelu ira to Masiri umewai ira to Masiri, ka dompetea, sompo mia umewaio pepaekompono, ka sompo mia umewaio walino, kota mo'ewai kota, poparentaa mo'ewai poparentaa;

³ sumangado to Masiri ta tetadi, ka tinoodo ka Aku mokomarisuo; ondae ira mpo'ema pontiso a lahumoa ka a mia anu mpebali-bali mata, a onitu ka a mpenaa mpopau anu nahi manasa ta gagi.

⁴ Aku meweengako ira to Masiri a ngkaeno asa mia pe'uea anu lambaha, ka asa mokole anu lambaha ta parenta ira; kanandiomo pau-Do Ueno asa wawontolino.

⁵ Uwoi inso a ngkoro Nili ta pingko, ka korono atuu ta gagi motu'i ntu'u.

⁶ Luwuno potilaloano ta mewoo mana moboo, ka luwuno ana ngkoro Masiri ta gagi morempe ka motu'i, ewo gelaga ka teberau ta gagi moleu.

⁷ Ewo i wiwino ka ngangano kora Nili ka luwuno wita pontiwua a ngkoro Nili ta gagi mokari ka tampula ipuurio angi.

⁸ Anu puu mporako bou ira mpopemahaki, luwuno anu mpomeka a ngkoro Nili ira mpopemasusa, luwuno anu mpobuani i ra'ai ira mpe'i'isei.

⁹ Mia anu mpoweweu lena ira memokoko'ii, beine anu mpoweweu ponsango wuu ka anu mpohoru ira megagi momite.

¹⁰ Anu mpohoru atuudo ta tedoa masusa aroado. Luwuno anu mpo'angga mentinambo ta masusa aroado.

¹¹ Anu langkai potorodo ndi Soani mia mebenge-benge mpena; Puu pompatuduno i Pirao anu lalu monto'ori mompowee patudu anu nahina pengkonaano. Kana'umpeke komiu polio mpotae ndi Pirao, ”Ongkue andio inuledo mia pande mompewowolo, inuledo mokole tempo se'eluno”?

¹² Isua irake miamiu anu pande mompewowolo? Po'ineeomo ka domempaleleakomiu saru mempauakomiu hapa anu Ira putusio Ueno luwuakoano mongkona Masiri.

¹³ Anu langkai potorodo ndi Soani mpoweweu nahi mentee, anu langkai potorodo ndi Memipisi ntepopandei iramo; anu mempinemota'u a nsukudo wawa ira to Masiri a masolaa.

¹⁴ Doweweuomo i Ue penaa marisua i olodo, anu weweu ira to Masiri memarisu a laro luwuno usahano, kana mia molangu anu mokolili ulu tempono melua-lua.

¹⁵ Ka nahina usahano Masiri anu ta mehasili anu wineweuno petewawa ka atano, wineweuno pu'uno ka sampano.

¹⁶ I tempo atuu to Masiri ira mengkana beine; ira mpondidi-ndidi ka ntededengke a ngkae-Do Ueno luwuakoano anu pino'io-Do ndi ondae.

¹⁷ Ka wita Yehuda ta gagi tewukado to Masiri, ka sompo domempauo mia i arodo, ira mpondende hangano pomputusi anu inala-Do Ueno luwuakoano umewai ira.

¹⁸ I tempo atuu ta hina olima kota i Masiri anu mpepauako pau Kana'a ka anu mpesumpa mpetenunu ndi Ondae Ueno luwuakoano. Asa i olono ta pinau Ire-Heresi.

¹⁹ I tempo atuu ta hina meda pontunua pesomba ndi Ondae i Ue i tongano wita Masiri ka tugu pepopoto'ori ndi Ondae i Ue a ntidano.

²⁰ Onae atuu ta gagi petondoni sakosii ndi Ondae Ueno luwuakoano i wita Masiri; tewala mpebooli ira ndi Ondae i Ue hangano luwuno pompokonsii, asalakono Ira tumenao asa mia Puu Pongkadudui ndi ondae, anu ta merokuhi ka ta motola ira.

²¹ Ondae i Ue Ira mepokomengkaa a nto Masiri, ka to Masiri ira mento'ori Ira i Ue i tempo atuu; ondae ira mpesombaako pesomba sinumbele ka pesomba kaanga, ka ira mpontanga ndi Ondae i Ue saru me'owahio pontanga atuu.

²² Ondae i Ue Ira tumunduhi ira to masiri, Ira montunduhi ka mompokotompa; ka ira mpepokule ndi Ondae i Ue ka Ira uminduo pekakaido saru mokotompa ira.

²³ I tempo atuu ta hina sala langkai inso i Masiri lumako i Asuri, ka masiri ira mpesomba mperonga-ronga to Asuri.

²⁴ I tempo atuu Isaraeli, gagi anu ko'otolu i horino Masiri ka Asuri, ta gagi ronso i wawontolino,

²⁵ anu rinonso-Do Ueno luwuakoano saru pau, ”Rinonsoomo Masiri, bawaa-Ku ka Asuri wineweuno kae-Ku, saru Isaraeli, tia pusaka-Ku.”