Yesaya 18 - Wunta Mempori

Pinau tiano Etiopia

¹ Masola ntu'u, wita luwuno bangka mepani i asa ngkeu luwuno korono i Etiopia,

² anu mpo'oliwi tinenado mokole molalo tahi saru bangka inso a tole balaba anu sumomba a wawo uwoi! Imelakomo, hei mia mentinena anu magasi, a tongku anu me'ondau koroido ka mpekuli mangkilo, a nsuku anu dinoitoako olai ka umpeda, a tongku anu moroso ka lambaha a wita anu itelaloi ira korono!

³ Hei luwuno palilino wawontolino, hei mia anu mpo'iangario tolino! Tewala mewinuatako bandera a luwuno torukuno, kitaomo! Tewala pinuuri tawuwua, rongeomo!

⁴ Hangano kanadiomo pau-Do i Ue ndi ongkue, ”Aku kongko momperodo mentango inso a mpo'ianga-Ku, kana rodono pompemokula ntu'u a ntonga oleo, kana gawu inso a tontoru a mokulano konsowia.”

⁵ Hangano napi haweako tempo sumowi, mansano tompaanomo tempo mensisi, ka tepumpuno sisino gagi wua anggoro anu tamo ronga motaha, Ira sumantiakono piso posanti luwuno sampano ka tumadio saru poleo sampa-sampano.

⁶ Luwuno atuu ta bininta tiado manu-manu anu mpongkaa kondehora susua inso i mentorukuno, ka tiado kondehora tobu. Tempono motu'i-tu'i manu-manu mpongkaa kondehora susua ira mpo'ia i ra'ai ka luwuno kondehora tobu tempono morini.

⁷ I tempo atuu pesomba ta winawa ndi Ondae Ueno luwuakoano, anu mewawao onaemo mia anu me'ondau ka mengkuli mangkilo, asa mpinu'u anu medinoitoako olai ka umpeda, tongku anu moroso ka lambaha, inso a wita anu linalono korono, a Ntorukuno Siono, po'iangano nee-Do Ueno luwuakoano.