Yesaya 17 - Wunta Mempori

Pohuku-Do anu pabawa tiano Damasi ka Eparai 17:1-11

¹ Pau-Do anu pabawa a nto Damasi. Menteeano, Damasi nahi ta gagi mpiha kota, sine kogagi howuno anu terawo;

² luwuno kota kodeino ta bininta mpiha ka gagi po'iangado bawaano pinotuwu, anu mpepombole nahina monsosanggoli maupo isema.

³ Luwuno bente pekorahakoa ta tetadi inso ndi Eparai ka pabawa poparentaa ta tampula inso i Damasi, to Arami anu da mentuwu luwuno ta tampula mengkena kana marambado to Isaraeli, kanatuumo pau-Do Ueno luwuakoano.

⁴ I tempo atuu marambano i Yako ta makura, ka manangaino ta tenono;

⁵ teweweuno kana tempono mia sumowi mokungku keuno gandu ka kaeno mo'opui tonggino; kana tonggino anu bininido mia a lembodo to Repaimi.

⁶ Sine ta hina anu tebinta tiado anu mponsowi lembuino kana i tempono mia mposodoli wua saitu, butu orua ke otolu laba wua anu tebinta a ntonggino ka opaa ke olima a sampa-sampano anu mewua, kanatuumo pau-Do i Ue, Ue Alado to Isaraeli.

⁷ I tempo atuu mia ta mengkita ndi Ondae anu mokogagio, ka matano ta mengkita ndi Ondae Anu Tedoa Mempori, Ue Alado to Isaraeli;

⁸ onae nahi ta mengkita mbo'u a meda pontunua pesomba wineweuno kaeno onaeno, ka nahi ta mengkita mbo'u a inanggano wunga ngkaeno, a ngkaruno pelahumoaa ka luwuno meda pontunua dupa.

⁹ I tempo atuu luwuno kotamu ta bininta gagi boni-boni, kana i ndi'ipua kotado to Hewi ka to Amori bininta hangano to Isaraeli.

¹⁰ Hangano ukolupe Iramo Ue Ala anu kumaduduiko, ka nahi upewowoloo torukuno watu rosomu. Onaemo pu'uno, maupo upoweweu lere anu tekosi ka mompahoakono pinopaho anu inso a wita susua,

¹¹ maupo upetu'uio walao a oleo upahoo, ka tisomono poliomo wineweu ka imensisi, sine kanandio, konsowia ta ronga tampula a oleo masusaa tempono pompemarasaimu nahi tepomule.

Pohuku tiano Asuri 17:12-14

¹² Masola ntu'u, rurunduno hadio tongku, rurundu kana rurunduno bombano ntahi! U'urudo suku tongku, umu'uru kana u'uruno uwoi anu mongkokongiri!

¹³ Ondae me'u'uru kana u'uruno uwoi anu langkai, sine Ondae anu wurarai ira ranta ka dompolai olai, linulu kana kulino pae a ntorukuno iluluo pepuurino angi ka kana ota iluluo lompiu.

¹⁴ Tamo ngkiniwia, gagiomo mongkokongiria! Napi mo'oru, nahi domekongko mbo'u! Onaemo atuu tiado mia anu pomuru kita, ka onaemo atuu anu tinantui tiado mia anu merontu kita.