Yesaya 16 - Wunta Mempori

¹ Oliwiomo ana bimba, hei poparenta i wita, inso i Sela molalo pada one lumako i torukuno ana beine Sioni.

² Kana manu-manu anu menee mepaso'ulu, sinaari inso a nsenono, kanatuumo ana beineno Moabi a luwuno pesakia a ngkoro Aranoni.

³ ”Pepatudumo, alaomo pomputusi, gagimo pe'engoa anu me'engo tekonai ntonga oleo; wuni iramo mia mentinadi, siimo popo'oo ira mia mpolai!

⁴ Po'inee iramo mia mentinadi inso i Moabi mperato ndi omue, gagimo po'iangado mpewuniakono anu mompepate! Tewala tampulaomo anu mompokonsii mateomo anu moropu ka mia lambaha pingkoomo inso a wita,

⁵ asa kadera poparentaa ta tineahako a laro mpetenunu mompehohawa ka i wawono, a laro ngkemano i Daudi ta wela mentoro asa puu mpobitara anu tumeahakono moleoa, ka anu ronga moweweu menteea.”

⁶ Kimerongeomo mongkona pompelangka-langkaino Moabi, onae tedoa mompelangka-langkai, mongkona pompelangka-langkaino anu tedoa lansara, mongkona laba mpauno anu mooa.

⁷ Onaemo pu'uno, po'ineeomo to Moabi domposabangi, po'ineeomo domposabangi luwu hangano Moabi. Rumambeo kukisi kisimisino Kiri-Hareseti po'ineeomo impebula ka imetampula mpiha!

⁸ Hangano luwuno lereno Hesiboni merurungku, kanatuu koa mbo'u keu anggorono i Sibima, wua anggorono anu moiko ntu'u mokomolangu iramo anu mempabawa a luwuno tongku, keu anggoro atuu i ndi'ipua malua po'iangano hawe i Yaeseri, lumele hawe i pada one, luwuno sampano tewero hawe i asa towano tahi.

⁹ Onaemo pu'uno, metonda aku mengese saru Yaeseri hangano keu anggorono i Sibima; aku bahoakomu uwoi mataku, hei Hesiboni ka Eleale, hangano tompaanomo maroa mpebooliako a po'opua wua mpinopaho ka ponsowia gandumu.

¹⁰ Tampulaomo mawongkoa ka maroa mpebooli inso a lere wua mpinopaho; tetadiomo inso a luwuno lere anggoro maroano pohio ka maroano pebooli, nahina ponsesaa anggoro a pompuro'iano, pohiodo menaa-naaaomo.

¹¹ Onaemo pu'uno, kana merokuno unino katapi kanatuumo aroaku mondidi-ndidi hangano Moabi, kanatuu koa mbo'u aroaku hangano Kire-Heresi.

¹² Maupo Moabi lumako mesomba ka me'isei a wawo pongku pesombaa ka mewinso mekakai a mpo'ianga memporino, nahi mohawe maupo hapa.

¹³ Onaemo atuu pau anu pinau-Do i Ue mongkona Moabi mompu'u i ndi'ipua.

¹⁴ Sine kanandio-andio Ondae i Ue mepau, ”I larono otolu nta'u, mengkena kana tempo po'anggado sorodadu mentinambo, marambano Moabi, saru luwuno maroano anu langkai, ta gagi pompokongkodei, ka mia anu tebinta tamo koa ntu'u tedei ka nahina rosodo.”