Yesaya 14 - Wunta Mempori

Pasinggiri mongkona mokole Babeli

¹ Tempono Ondae i Ue mehohawao i Yako ka binikio Isaraeli pohona mbo'u saru mo'inee ira mpo'ia i witado, mia mehawe ira mpe'asaako ira ka mpesaloako inuleno i Yako.

² Luwuno tongku susua mewawa ira to Isaraeli mpekule a mpo'iangado, ka i'amba to Isaraeli ira mpe'ue tongku atuu i wita-Do i Ue gagi ata tama ka beine. Kanatuumo domentawa ira mia anu tumawa ira ka pabawaio luwuno anu mokonsii ira.

³ A oleo Ondae i Ue mokompenaa-naao pompemahaki ka danggaramu saru mpo'angga mobea dinadai anu pinopotembiako ndi omue,

⁴ omue komoporongeo pasinggiri andio mongkona mokole Babeli, ”Bee, tompaanomo anu mompokonsii, tompaanomo pompokonsiia!

⁵ Dopuduomo i Ue tukono mia mosa'o gauno ka tarasulu anu pabawa,

⁶ anu tumunduhiako ira bamburu luwuno tongku, saru petunduhi anu nahina otu-otuno; anu lumolandaako ira tekuda luwuno tongku, lumulu ira nahina penaa-naano.

⁷ Asa wawontolino gagi rodo; luwuno memawongko saru maroa mpebooli.

⁸ Luwuno mbo'u keu sinobari, maupo keu arasi i Libano mpo'undeakomu, dompotae: ’Mompu'u utebangku, nahina mbo'u anu aiwa tumuehi kami!’

⁹ Tolinodo mia mate i totono mondidi-ndidi tumotowoo hawemu, onitudo mia mate iwangu ira ka domentotowoko; luwuno petewawa i tolino anu memate iramo; luwuno mokoledo tongku anu memate iramo iweweu ira mpentade inso a ngkadera poparentaado.

¹⁰ Luwudo mpompu'u mpepau ndi omue, dompotae: ’Omue mbo'u gagikomo molema kana omami, gagiomo mengkena saru omami!’

¹¹ A ntolinodo mia mate pinotiiomo marambamu ka unido gambusumu; ule-ule gagi pe'empehimu moturi, ka wingo gagi hawumu.”

¹² ”Bee, tedontakomo inso i langi, hei Anano wula i Sabaano Oleo, Ana ntamano Towea, umarikomo pinepasiako a wita, hei poponangi a luwuno tongku!

¹³ Omue anu hieno motae i laro aroamu: Aku mewuatako i langi, aku montadeo kadera poparentaaku mewawoio anano wula-Do Ue Ala, ka aku mentoro a wawo ntorukuno pobitaraa-Do anu pabawa, a punsuno torukuno Saponi.

¹⁴ Aku mewuatako lumaloio mantandedo seru, ka mengkenaako Ira Anu Tedoa Mantande!

¹⁵ Mengkaano, a laro tolinodo mia mate upinotii, a mpo'ianga ondaloano ntu'u wingke matea.

¹⁶ Mia anu mengkitako ira mpekokoongakono ka mpenootio, dompotae: Onaemoke andio anu weweuo tolino mondidi-ndidi, ka weweu ira poparentaa ntelelu?

¹⁷ Onaemoke andio anu weweuo wawontolino kana pada one, anu rumawo-rawoo kotano, ka nahi potola ira mia mentinawano mpekule a rahado?

¹⁸ Luwuno mokoledo tongku anu memate iramo mpepombole a laro marambaa, singge mia a laro ngkaburuno.

¹⁹ Sine omue tetadiako olai inso a ngkaburu, kana tumba anu moboo; mehawuako wata ngkoroido mia anu mentinoboako ponai ka tedonta tepasiako a laro watu wingke matea, kana wata ngkoroino kondehora anu linolanda.

²⁰ Omue nahi komohawe pekaburua kana teweweudo mokole atuudo, hangano urawo-rawoomo witamu ka mepate ira palilimu. Po'ineeomo ana'uedo mia anu mpoweweu mosa'o nahi pinopau ranta nahina tampulaano.

²¹ Patindaako iramo anano po'ianga ponsumbelea, hangano salado uempu'udo, ka si dompewangu mpetorokio wawontolino saru mebuketio wawontolino saru luwuno kota.”

²² ”Aku mentade umewai ira,” kanandiomo pau-Do Ueno luwuakoano, ”Aku mokotampulao neeno Babeli ka inuleno anu da mentuwu, ana'ue ka ana'ue ntukono,” kanandiomo pau-Do i Ue.

²³ Aku weweuo Babeli gagi po'ingaado manu-manu koa i pada one ka gagi uwoi epe. Kota atuu Aku rumoahio morina hawe ka itampula, kanandiomo pau-Do Ueno luwuakoano.

Pohuku-Do anu pabawa tiano Asiuri 14:24-27

²⁴ Ondae Ueno luwuakoano mesumpa Iramo kanandio, ”Menteeano kana anu Kupewowoloo, kanatuumo ta gagi, ka kana anu tinoo-Ku, kanatuumo ta wineweu:

²⁵ Aku mepate ira to Asiuri a laro wita-Ku ka lumolanda ira a wawo ntorukuno-Ku; pasanga anu ninaado a bawaa-Ku ta tinadi kanatuu koa mbo'u tinembi anu dopopotembiako ira a oweado.”

²⁶ Onaemo atuu tinoo anu wineweuomo mongkona asa wawontolino, ka onaemo atuu kae anu tinande a luwuno tongku.

²⁷ Ondae Ueno luwuakoano montoo Iramo, isemake anu polio umonsoio? Kae-Do tinandeomo, isemake anu polio weweuo ka iwali pinadii?

Pohuku-Do anu pabawa tiano Pilisitea

²⁸ A nta'u mateano mokole Ahasi haweomo pau-Do anu pabawa andio:

²⁹ Siimo impo'unde, hei luwuno to Pilisitea, lano tarasulu mia anu tumunduhiko tepuduomo, sine inso a inuleno ule ta meluarako ule me'ipo, ka anano ta gagi ule mepani.

³⁰ Anu kodei tuwuno inso a ana aka-Ku ta mohawe kaanga ka mia memongkokolaro ira mpepombole rodo, sine inulemu Aku mepateako ira mokoninggo, ka anu da mentuwu Aku mepate ira.

³¹ Ponsabangimo, hei pewowa langkai! Peboolimo, hei kota! Impondidi-ndidimo, hei luwuno to Pilisitea! Hangano inso i utara membomboomo ahu mpeteaa, nahina anu mosuka inso a baresino.

³² Sangki hapake anu ira mewineeako a mia mentinenado tongku atuu? ”Doponaakonomo i Ue empehino Sioni, ka i ra'aimo mia memarasai inso a bawaa-Ku dompohawe pekaduduia.”