Yesaya 13 - Wunta Mempori

LAMORO 13–23 POHUKU TIADO LUWUNO TONGKU Pohuku tiano Babeli 13:1-22

¹ Pau-Do anu pabawa a nto Babeli anu tinarimano i Yesaya anano i Amosi a laro pongkita.

² Wuatako iramo bandera a wawo ntorukuno anu londa, peboolimo ndi ondae temeroku; pekaweakonomo kaemu ka dompewinsokio pewowa langkaido ulea mokole!

³ Kuparenta iramo mia anu Kupokomemporio, Kupoboi ira mia-Ku anu moroso anu mo'unde a mpoponangi-Ku, ka motiio tekuda-Ku.

⁴ Rongeo! Hinao maroaa a wawo ntorukuno, kana suarado hadio mia anu ntepumpu! Rongeo! Hinao maroaa inso a luwuno poparentaa, inso a luwuno tongku anu mpepumpu! Ondae i Ueno luwuakoano tekonai momparesa baresi mpetea.

⁵ Ondae me'aiwa inso a wita olai, oo inso i tompano langi: Ondae i Ue saru parewa ntekuda-Do Ira rumawo-rawoo asa wawontolino.

⁶ Ponsabangimo, hangano oleo-Do i Ue umpedaomo, haweno gagi pabawa pe'iwalia inso ndi Ondae Anu Tedoa Pabawa.

⁷ Onaemo pu'uno, sompo kae ta gagi molema, aroano sompo mia ta gagi tengkuru,

⁸ ka ira ntededengke. I'ali ira mekiki kompo ka haki me'ana, ira pompemahaki kana beine ta me'ana. Ira mambekikita saru pompemokokongiri, rupado motaha kana i'alu ira haki mokula.

⁹ Mentee ntu'u, oleo-Do i Ue hawe nahina pompehohawa, saru bamburu ka saru tekuda-Do anu tensila ka Doweweuo tolino boni-boni, tempono Doropu ira mia ntehala inso i wawono.

¹⁰ Hangano anano wula ka luwuno pehowudo i langi nahi ta mopansari wantano; mata oleo ta gagi wongi-wongi tempono isaba, ka wula nahi ta mopansari wantano.

¹¹ A wawontolino Aku sumuloakono wineweuno anu mosa'o, ka a mia mosa'o gauno Aku sumuloakono salado; pompelangka-langkaino mia anu mompelangka-langkai Aku mokompenaa-naao, ka pompelangka-langkaino mia lambaha Aku puduo.

¹² Aku weweuo mia molaaopo sekono wulaa mpena, ka mia motungkoopo ungkeano sekonopo wulaa Opiri.

¹³ Onaemo pu'uno, Aku weweuo langi mondidi-ndidi, ka tolino mbo'u telelu tola inso a mpo'iangano, hangano tekuda-Do Ueno luwuakoano, a oleo tekuda-Do anu tensila.

¹⁴ Kana lagiwa anu linulu ka kana bimba anu nahi pinakambi, kanatuumo ondae ira mpewolili, singge mia a tongkuno, ka molai, singge mia lumako i witano.

¹⁵ Sompo mia anu kona rako ta tinobo, ka sompo mia anu tinawa ta tebangku mateako ponai.

¹⁶ Nana'ote kodeido ira mempinirego i arono matado, luwuno rahado ta merinontu ka kombiado ira mempinewowaliako.

¹⁷ Kitao, ndi ondae Aku tumena ira to Madai, mia anu nahi domperioo salaka ka nahi inehedo wulaa.

¹⁸ Luwuno panado ta sumiarawo ira mia mongura; ondae nahi ira mpehohawao anadalo, matado mongkita nana'ote nahina pompehohawa.

¹⁹ Babeli, mewanta luwuno poparentaano, peramba-rambado to Kasidimi anu tekosi, ta mengkena kana Sodomo ka Gumora i tempono Dowowangunsuleo.

²⁰ Onae nahi ta hori mbo'u pino'iangario, nahi ta pino'iangari mbo'u hawe a luwuno inule; to Ara nahi ira mpekema i ra'ai, puu mpopakambi nahi ira mpowawa pinotuwudo mpepombole i ra'ai.

²¹ Sine kondehora i pada one anu ira mpepombole i ra'ai, ka rahado ta bukeako manu-manu koa; manu-manu unta ira mpo'ia i ra'ai, ka onitu ira mpo'ense-ense i ra'ai;

²² dahu mo'ila ira mpohopa a laro benteno, ka serigala a laro langkanae pinesanaa. Tempono ta ronga hawe, ka tinuwuno nahi ta pinokomelai.